ଏକତରଫା ପ୍ରେମରୁ ହତ୍ୟାକାଣ୍ଡ : ବିବାହ ପୂର୍ବରୁ ଭାଇକୁ ହତ୍ୟା, ଗିରଫ ପରେ ରହସ୍ୟ ଉପରୁ ହଟିଲା ପରଦା

ବାଲିପାଟଣା ଥାନା ଅଞ୍ଚଳରେ ଆଶିଷ ଓଝା ହତ୍ୟାକାଣ୍ଡର ପର୍ଦ୍ଦାଫାସ୍ । ଏକତରଫା ଫ୍ରେମ ପାଇଁ ଆଶିଷ ଓଝାଙ୍କୁ କରାଯାଇଥିଲା ହତ୍ୟା । ପ୍ରେମିକାର ବାହାଘର ପୂର୍ବରୁ ତା ଭାଇକୁ ରାସ୍ତାରୁ ହଟାଇବା ଲାଗି ମୁଖ୍ୟ ଅଭିଯୁକ୍ତ ରାଜା, ଦୁଇ ସହଯୋଗୀଙ୍କୁ ନେଇ କରିଥିଲା ଷଡ଼ଯନ୍ତ୍ର । ସାଙ୍ଗ ଜରିଆରେ ମଦ ପିଇବାକୁ ଡାକି ଚଣ୍ଟି ଚିପିବା ସହ ବିଲ ପାଣିରେ ଶ୍ୱାସରୁଦ୍ଧ କରି ହତ୍ୟା କରିଥିଲା । ଘଟଣାରେ ୩ ହତ୍ୟାକାରୀଙ୍କୁ ଗିରଫ ପରେ ଏବେ ରହସ୍ୟ ଉପରୁ ହଟିଛି ପରଦା ।

ତିନି ଅଭିଯୁକ୍ତ ରାଜା, ସିପୁ, ରାକା , ଯେଁଉମାନେ ଆଶିଷ ହତ୍ୟାକାଣ୍ଡର ଅଭିଯୁକ୍ତ । ଏକତରଫା ପ୍ରେମ ବିରୋଧ କରିବାରୁ ହୋଇଥିଲା ହତ୍ୟାକାଣ୍ଡ । ସାଙ୍ଗକୁ ମୋହରା କରି ଆଶିଷକୁ ମଦ ପିଆଇବାକୁ ଡକାଇ ନିର୍ମମ ଭାବେ ହତ୍ୟାକରିଥିଲେ ଅଭିଯୁକ୍ତ ମାନେ । ପୂର୍ବରୁ ମୁଣ୍ଡ ଗଡାଇବାକୁ ଧମକ ଦେଉଥିବା ରାଜା ପ୍ରେମକାର ବାହାଘରକୁ ଟାର୍ଗେଟ କରିଥିଲା । ଯୋଜନା ମୁତାବକ ଆଶିଷର ଘନିଷ୍ଠ ବନ୍ଧୁକୁ ରାକାକୁ ହାତକରି ରାଜା ମଦ ପିଇବାକୁ ଡାକିଥିଲା । ରାକା ଏବଂ ଆଶିଷ ମଦ ପିଇ ଫେରୁଥିବାବେଳେ ରାଜା ଏବଂ ସିପୁ ଆଶିଷକୁ ଆକ୍ରମଣ କରିଥିଲେ ।

ପ୍ରଥମେ ବୋତଲ ଆକ୍ରମଣରେ ପରେ ତଣ୍ଟି ଚିପି ଦେଇଥିଲେ । କାଳେ ଆଶିଷ ବଞ୍ଚିଯିବ, ଏଣୁ ତାକୁ ବିଲ ଭିତରେ ଥିବା କାଦୁଅରେ ବୁଢାଇ ହତ୍ୟା କରିଥିଲେ । ହତ୍ୟାର ଶିକାର ଆଶିଷର ମୋବାଇଲ ଫୋନ ନଈ ଭିତରେ ପକାଇ ଚମ୍ପଟ ମାରିଥିଲେ । ହତ୍ୟାକାଣ୍ଡର ପରଦିନ ମୁଖ୍ୟ ଅଭିଯୁକ୍ତ ରାଜା ଧରା ପଡିବା ପରେ ସିପୁ ଓ ରାକାକୁ ବାନ୍ଧିଥିଲା ପୋଲିସ ।

ଆଶିଷ ହତ୍ୟା ମାମଲାରେ ଘଟଣାସ୍ଥଳରୁ ହତ୍ୟାକାଣ୍ଡରେ ବ୍ୟବହୃତ ଗାମୁଛା ପାଇଛି ପୋଲିସ । ଆଶିଷର ସାଇକେଲ ଏବଂ ଅଭିଯୁକ୍ତ ରାଜାର ବାଇକ ବି ପୋଲିସ ଜବତ କରିଛି । ଅଭିଯୁକ୍ତ ମାନଙ୍କୁ ନେଇ ସିନ ରିକ୍ରିଏସନ କରିବା ସହ ଅଭିଯୁକ୍ତଙ୍କୁ ରିମାଣ୍ଡରେ ଆଣିଛି ପୋଲିସ । ସେପଟେ ନଈରେ ପଡ଼ିଥିବା ଫୋନକୁ କାଢିବା ଲାଗି ଅଗ୍ନିଶମ ବିଭାଗକୁ କହିଛି ପୋଲିସ । ଏକତରଫା ପ୍ରେମର କରୁଣ ପରିଣତି ଗୋଟିଏ ପଟେ ଭେଣ୍ଡାପୁଅକୁ ହରାଇ ଆଶିଷଙ୍କ ପରିବାର ଶୋକରେ ଥିବା ବେଳେ ସେପଟେ ଜେଲର ଚାରିକାନ୍ଥ ଭିତରେ ପଶ୍ଚାତାପର ନିଆଁରେ ଜଳୁଛି ପ୍ରେମିକ ରାଜା ।