Next-Gen Devotion: ସାଂସ୍କୃତିକ ପୁନରୁତ୍ଥାନ ଦିଗରେ ଯୁବପିଢ଼ି, ତୀର୍ଥଯାତ୍ରା ଓ ଧର୍ମ ଅନୁଷ୍ଠାନରେ ବଢ଼ୁଛି ଅବଦାନ

ଆଧ୍ୟାତ୍ମିକତା .. ଆତ୍ମା ଓ ପରମ ଚେତନା ସହିତ ସଂଯୋଗ ସ୍ଥାପନ କରିବାର ଏକ ଯାତ୍ରା, ଯାହା ଜୀବନରେ ଶାନ୍ତି, ପ୍ରେମ ଓ ସନ୍ତୁଳନ ଆଣିଥାଏ । ଏହା କୌଣସି ନିର୍ଦ୍ଦିଷ୍ଟ ଧର୍ମ କିମ୍ବା ବିଶ୍ୱାସ ସହିତ ଜଡିତ ନୁହେଁ ବରଂ ଆତ୍ମ-ଜ୍ଞାନ, ଆତ୍ମ-ପରିବର୍ତ୍ତନ ଏବଂ ସମସ୍ତ ପ୍ରାଣୀଙ୍କ ମଧ୍ୟରେ ସମାନ ଦିବ୍ୟ ଶକ୍ତି ଅନୁଭବ କରିବାର ଏକ ପ୍ରକ୍ରିୟା । ଏହା ଆଭ୍ୟନ୍ତରୀଣ ଶାନ୍ତି ଏବଂ କରୁଣା ମାଧ୍ୟମରେ ଜୀବନର ଗୁଣବତ୍ତା ବୃଦ୍ଧି କରେ ।

ସାମ୍ପ୍ରତିକ ସମୟରେ ସୋମନାଥ ସ୍ୱାଭିମାନ ପର୍ବ, ଅଯୋଧ୍ୟା ମନ୍ଦିର ଏବଂ ମହାକୁମ୍ଭ ମେଳା ଭଳି କାର୍ଯ୍ୟକ୍ରମରେ ଯୁବପିଢ଼ିଙ୍କ ବୃଦ୍ଧି ପାଉଥିବା ଯୋଗଦାନ ଭାରତୀୟ ସଂସ୍କୃତି ଏବଂ ଆଧ୍ୟାତ୍ମିକତା ସହିତ ସେମାନଙ୍କର ଗଭୀର ସମ୍ପର୍କକୁ ପ୍ରତିଫଳିତ କରେ। ଯୁବପିଢ଼ି ଦେଶର ବିଭିନ୍ନ ତୀର୍ଥସ୍ଥଳୀକୁ ଯାତ୍ରା କରିବା ସହ ଇଣ୍ଟରନେଟରେ ସେମାନଙ୍କର ସାଂସ୍କୃତିକ ଐତିହ୍ୟକୁ ସମସ୍ତଙ୍କ ସହ ସେୟାର କରୁଛନ୍ତି ।

ସଦଗୁରୁ ଏବଂ ପ୍ରେମାନନ୍ଦ ଜୀ ମହାରାଜଙ୍କ ପରି ଆଧ୍ୟାତ୍ମିକ ଗୁରୁଙ୍କ ଦ୍ୱାରା ଅନୁପ୍ରାଣିତ ହୋଇ ତୀର୍ଥସ୍ଥାନ ଏବଂ ଧାର୍ମିକ ସ୍ଥଳ ପ୍ରତି ଅଧିକ ଆକର୍ଷିତ ହେଉଛନ୍ତି। ଏହି ଧାରା ଭାରତର ସାଂସ୍କୃତିକ ପୁନରୁତ୍ଥାନର ଏକ ସକାରାତ୍ମକ ସଙ୍କେତ।

ନିକଟରେ ଗୁଜରାଟ ସୋମନାଥ ମନ୍ଦିରରେ ଚାରି ଦିନିଆ ସୋମନାଥ ସ୍ୱାଭିମାନ ପର୍ବର ଆୟୋଜନ ହୋଇଥିଲା । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେଇଥିଲେ । ଏହି ଉତ୍ସବ ଭାରତର ଲୋକଙ୍କ ଜୀବନଶକ୍ତି ଏବଂ ଭାରତୀୟ ସଭ୍ୟତାର ସର୍ବୋତ୍ତମ ପ୍ରମାଣ । ଅତୀତରେ ଭାରତ ଓ ଭାରତୀୟ ଅନେକ ପ୍ରକାର ବର୍ବରତାର ଶିକାର ହୋଇଛନ୍ତି ।

ଭାରତର ଗୌରବମୟ ସଭ୍ୟତାକୁ ଧ୍ୱଂସ କରିବା ପାଇଁ ଅନେକ ଥର ପ୍ରୟାସ ମଧ୍ୟ କରାଯାଇଛି । ତଥାପି ଆମର ପୂର୍ବଜମାନେ ବାରମ୍ବାର ବିଦେଶୀ ଶତ୍ରୁଙ୍କ ସହ ଲଢ଼ି ଏହାର ଅମୂଲ୍ୟ ଐତିହ୍ୟକୁ ସଂରକ୍ଷଣ ଏବଂ ସୁରକ୍ଷା ପାଇଁ ପ୍ରୟାସ କରିଛନ୍ତି । ଗତ ଦଶନ୍ଧି ମଧ୍ୟରେ ଦେଶ ଅନେକ ଘଟଣା ଦେଖିଛି, ଯାହା ଭାରତର ହଜିଯାଇଥିବା ଆତ୍ମସମ୍ମାନ ଏବଂ ଗର୍ବକୁ ଫେରାଇ ଆଣିଛି ।

ଅଯୋଧ୍ୟାର ଶ୍ରୀରାମ ଜନ୍ମଭୂମିରେ ଭବ୍ୟ ମନ୍ଦିର ନିର୍ମାଣ ଏହାର ଏକ ଅନନ୍ୟ ଉଦାହରଣ। ଏକ ବିରାଟ ଲଢ଼େଇ ପରେ ଯେତେବେଳେ ମନ୍ଦିରର ପୁନଃନିର୍ମାଣ ହୋଇଥିଲା,  ଦେଶ ବିଦେଶରୁ ଅନେକ ଭକ୍ତ ରାମଲାଲ୍ଲାଙ୍କ ଦର୍ଶନ ପାଇଁ ଆସିଥିଲେ । ଏବେ ବି ରାମଲାଲ୍ଲାଙ୍କ ଦର୍ଶନ ପାଇଁ କାହିଁ କେଉଁଆଡ଼ୁ ଭକ୍ତ ଛୁଟି ଆସୁଛନ୍ତି ।  ଏହି ଭକ୍ତମାନଙ୍କ ମଧ୍ୟରୁ ସର୍ବାଧିକ ହେଉଛନ୍ତି ଦେଶର ଯୁବପିଢ଼ି। ଗତ ବର୍ଷ ପ୍ରୟାଗରାଜର ମହାକୁମ୍ଭ ମେଳାରେ ଲକ୍ଷ ଲକ୍ଷ ଭକ୍ତ ଯୋଗ ଦେଇଥିଲେ ।

ଭକ୍ତମାନଙ୍କ ମଧ୍ୟରେ ସର୍ବାଧିକ ସଂଖ୍ୟା ଥିଲେ ଦେଶର ଯୁବପିଢ଼ି । ଏପରି ଧାର୍ମିକ କାର୍ଯ୍ୟକ୍ରମରେ ଭାରତର ଯୁବପିଢ଼ିଙ୍କ ବୃଦ୍ଧି ପାଉଥିବା ସହଭାଗୀତା  ପ୍ରକୃତରେ ଏକ ସୁଖଦ  ଅଭିଜ୍ଞତା। ଦେଶର ସାଂସ୍କୃତିକ ଐତିହ୍ୟ ବିଷୟରେ ଯୁବପିଢ଼ି ଇଣ୍ଟରନେଟ୍ ମାଧ୍ୟମରେ  ସ୍ୱର ଉତ୍ତୋଳନ କରୁଛନ୍ତି । ବିଭିନ୍ନ ପ୍ଲାଟଫର୍ମରେ ଭାରତୀୟ ସଂସ୍କୃତି ଏବଂ ସଭ୍ୟତା ଉପରେ ସେମାନଙ୍କର ମତାମତ ବାଣ୍ଟୁଛନ୍ତି ।

ଏବେ ତୀର୍ଥଯାତ୍ରା ଏବଂ ପବିତ୍ର ସ୍ଥାନଗୁଡ଼ିକୁ ଯାତ୍ରାରେ ଭାରତର ଯୁବପିଢ଼ିଙ୍କ ଅଂଶଗ୍ରହଣ ବଢ଼ି ବଢ଼ି ଚାଲିଛି । ଭାରତର ପାର୍ବତ୍ୟ କ୍ଷେତ୍ରରେ ଅବସ୍ଥିତ ମନ୍ଦିର ଦର୍ଶନ କରିବାକୁ ପହଞ୍ଚୁଛନ୍ତି ଦେଶର କୋଣର ଅନୁକୋଣରୁ ଯୁବଗୋଷ୍ଠୀ ।

ପ୍ରଯୁକ୍ତିବିଦ୍ୟା, ଚିକିତ୍ସା, ପରିଚାଳନା ଏବଂ ଅନ୍ୟାନ୍ୟ ଅନେକ କ୍ଷେତ୍ରରେ ପାଠ ପଢ଼ୁଥିବା ଯୁବଗୋଷ୍ଠୀ ଆଧ୍ୟାତ୍ମିକତା ଏବଂ ଧର୍ମ ପ୍ରତି ଗଭୀର ଆଗ୍ରହୀ ଥିବା ଦେଖିବାକୁ ମିଳୁଛି । ପ୍ରତିବର୍ଷ ଗ୍ରୀଷ୍ମ ଋତୁରେ ହେଉଥିବା ଚାରିଧାମ ଯାତ୍ରାରେ ମଧ୍ୟ ସେମାନେ ସକ୍ରିୟ ରୂପରେ ଅଂଶଗ୍ରହଣ କରୁଛନ୍ତି । 

ପ୍ରତିବର୍ଷ  ହଜାର ହଜାର ଯୁବକ କେଦାରନାଥରେ ପହଞ୍ଚିବା ପାଇଁ ବିପଦପୂର୍ଣ୍ଣ ପର୍ବତ ପଥ ଦେଇ ଯାତ୍ରା କରୁଛନ୍ତି। ଆଉ ଇଣ୍ଟରନେଟରେ ଯାତ୍ରାର ସୁଖଦ ଅନୁଭୂତି ଓ ସୁନ୍ଦର ସ୍ମୃତି ସମସ୍ତଙ୍କ ସହ ବାଣ୍ଟୁଛନ୍ତି । ଫଳରେ ଅନ୍ୟମାନେ ସେମାନଙ୍କ ଠାରୁ ଆଧ୍ୟାତ୍ମିକ ଏବଂ ଧାର୍ମିକ ଯାତ୍ରା କରିବାକୁ ପ୍ରେରଣା ପାଉଛନ୍ତି । ଯୁବଗୋଷ୍ଠୀଙ୍କ ଏହି ଯାତ୍ରା ଯୋଗୁଁ ଭାରତର ଦୁର୍ଗମ ଅଞ୍ଚଳରେ ଥିବା ମନ୍ଦିର, ମଠ ଏବଂ ଆଶ୍ରମ ବିଷୟରେ ଲୋକେ ଜାଣିପାରୁଛନ୍ତି, ଯାହା ସାମାଜିକ ଏବଂ ଆର୍ଥିକ ଲାଭ ମଧ୍ୟ ପ୍ରଦାନ କରୁଛି ।

ନିକଟରେ ଉତ୍ତରାଖଣ୍ଡ ସରକାରଙ୍କ ଦ୍ୱାରା କରାଯାଇଥିବା ଏକ ସର୍ଭେ ଅନୁସାରେ ଉତ୍ତରାଖଣ୍ଡର ପ୍ରସିଦ୍ଧ କୈଞ୍ଚି ଧାମ ସମ୍ପର୍କରେ କିଛି ତଥ୍ୟ ପ୍ରକାଶ ପାଇଛି । ତଥ୍ୟ ଅନୁସାରେ ବାବା ନୀବ କରୋଲିଙ୍କ ସ୍ଥାନକୁ ଆସୁଥିବା ଭକ୍ତଙ୍କ ସଂଖ୍ୟା ନିରନ୍ତର ବୃଦ୍ଧି ପାଉଛି। ଏହି ଭକ୍ତମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି ୧୫ ରୁ ୩୦ ବର୍ଷ ବୟସର ଯୁବକ।

ଏଥିରୁ ସ୍ପଷ୍ଟ ଯୁବକମାନେ ଆଧ୍ୟାତ୍ମିକ ପ୍ରଗତି ଏବଂ ଶାନ୍ତି ପାଇଁ ଏପରି ସ୍ଥାନକୁ ଯାଉଛନ୍ତି । ସୂଚନାର ଅଗଣିତ ଉତ୍ସ ମାଧ୍ୟମରେ ଭାରତର ଧାର୍ମିକ ଏବଂ ଆଧ୍ୟାତ୍ମିକ ଜଗତ ବିଷୟରେ ସମସ୍ତ ତଥ୍ୟ ପ୍ରତ୍ୟେକ ବର୍ଗ ଏବଂ ଗୋଷ୍ଠୀ ପାଖରେ ପହଞ୍ଚିପାରୁଛି । ଯେଉଁଥିରୁ ପ୍ରଭାବିତ ହୋଇ ଭାରତର ଯୁବପିଢ଼ି ଏପରି ସ୍ଥାନକୁ ଯିବାସହ ଭାରତୀୟ ସଂସ୍କୃତିର ପ୍ରଚାର ପ୍ରସାର କରୁଛନ୍ତି ।

ଯୋଡ଼ି ହେଉଛନ୍ତି ଯୁବପିଢ଼ି

ଭାରତର ସନ୍ଥ ଏବଂ ଆଧ୍ୟାତ୍ମିକ ଗୁରୁଙ୍କ ଚିନ୍ତାଧାରା ଦ୍ୱାରା ପ୍ରଭାବିତ ହୋଇ ଯୁବକମାନେ ଆଧ୍ୟାତ୍ମିକ ଧାରା ସହିତ ଯୋଡ଼ି ହେଉଛନ୍ତି । ଉଦାହରଣ ସ୍ୱରୂପ, ଇଶା ଫାଉଣ୍ଡେସନର ପ୍ରତିଷ୍ଠାତା ସଦଗୁରୁ ଜଗ୍ଗି ବାସୁଦେବ ତାଙ୍କ ଭାଷଣରେ ଆଧ୍ୟାତ୍ମିକତାକୁ ବିଜ୍ଞାନ ସହିତ ଯୋଡ଼ି ଉପସ୍ଥାପନ କରନ୍ତି। ସେ ବୈଜ୍ଞାନିକ ପରୀକ୍ଷଣ ମାଧ୍ୟମରେ ଆଧ୍ୟାତ୍ମିକତାର ସୂକ୍ଷ୍ମ ନୀତିଗୁଡ଼ିକୁ ପ୍ରକାଶ କରନ୍ତି। ହଜାର ହଜାର ଯୁବକ ଏବଂ ଯୁବତୀ ତାଙ୍କ ଅଭିଯାନ ଏବଂ କାର୍ଯ୍ୟକ୍ରମରେ ଅଂଶଗ୍ରହଣ କରନ୍ତି। 

ବୃନ୍ଦାବନରେ ବାସ କରୁଥିବା ପ୍ରସିଦ୍ଧ ସନ୍ଥ ପ୍ରେମାନନ୍ଦ ଜୀ ମହାରାଜଙ୍କ ଚିନ୍ତାଧାରା ଦ୍ୱାରା ଶହ ଶହ ଲୋକ ଅନୁପ୍ରାଣିତ ମଧ୍ୟ ହୁଅନ୍ତି । ପ୍ରେମାନନ୍ଦ ଜୀ ତାଙ୍କ ଭାଷଣରେ ଧର୍ମକୁ ସେବା ଏବଂ ଆଚରଣ ସହିତ ଜଡିତ କରି ଉପସ୍ଥାପନ କରନ୍ତି। ତାଙ୍କ ବାଣୀର ପ୍ରଭାବ ଯୁବପିଢ଼ି ଉପରେ ସ୍ପଷ୍ଟ ଭାବରେ ଦୃଶ୍ୟମାନ ହୁଏ।

ଭାରତୀୟ ସମାଜର ଏହି ପରିବର୍ତ୍ତନ ହୃଦୟସ୍ପର୍ଶୀ ଓ ସନ୍ତୋଷଜନକ ମଧ୍ୟ । ବିଶ୍ୱର ଅନେକ ଦେଶ ଏବେ ଯୁଦ୍ଧ ତଥା ରାଜନୈତିକ ଅସ୍ଥିରତା ଦେଇ ଗତି କରୁଛନ୍ତି । ଏପରି ସମୟରେ ଭାରତୀୟ ଯୁବପିଢ଼ିଙ୍କର ସେମାନଙ୍କର ମୂଳ ସହିତ ପୁନଃ ଯୋଡ଼ିହେବା  ଏବଂ ଆଧ୍ୟାତ୍ମିକ ପଥ ଅନୁସରଣ ଏକ ସକାରାତ୍ମକ ସଙ୍କେତ ନିଶ୍ଚୟ ।

ସ୍ୱାମୀ ବିବେକାନନ୍ଦ କହିଥିଲେ, ଯୁବପିଢ଼ି ନିଜର ଜାତି, ମହାନ ସଂସ୍କୃତି, ସଭ୍ୟତା, ଧର୍ମ ଏବଂ ଗୌରବମୟ ଅତୀତକୁ ଭୁଲିବା ଉଚିତ ନୁହେଁ ।  ମନେରଖ ଆମେ କିଏ? ଆମ ଶିରାପ୍ରଶିରାରେ କାହାର ରକ୍ତ ପ୍ରବାହିତ ହେଉଛି? ଏକ ମହାନ ଭାରତର ମୂଳଦୁଆ ସ୍ଥାପନ କର ଯାହା ବିଶ୍ୱକୁ ମାର୍ଗଦର୍ଶନ କରିପାରିବ। ଆଉ ଏଥିରୁ ପ୍ରେରଣା ପାଇ ଦେଶର ଯୁବପିଢ଼ି ଯୋଗ, ଧ୍ୟାନ ଏବଂ ଆଧ୍ୟାତ୍ମିକତାକୁ ନିଜ ଜୀବନରେ ସାମିଲ କରୁଛନ୍ତି ।

ମହାନ ପୂର୍ବପୁରୁଷମାନଙ୍କୁ ସ୍ମରଣ କରି ଦେଶର ସାଂସ୍କୃତିକ ପୁନରୁଦ୍ଧାରରେ ଏକ ଅମୂଲ୍ୟ ଅବଦାନ ପ୍ରଦାନ କରୁଛନ୍ତି । ଭାରତର ପ୍ରାଚୀନ ସଭ୍ୟତା ଏବଂ ସଂସ୍କୃତି ଆଜିର ସମାଜରେ ଏକ ପୁନଃଜାଗରଣକୁ ଇନ୍ଧନ ଦେଉଛି। ଏହି ପରିବର୍ତ୍ତନ ଭାରତକୁ ଏକ ନୂତନ ଦିଗଦର୍ଶନ ଦେଉଛି ଏବଂ ଏକ ନୂତନ ଭାରତ ନିର୍ମାଣ କରୁଛି।