DA Raised for Government Employees: ସରକାରୀ କର୍ମଚାରୀଙ୍କୁ ଦଶହରା-ଦୀପାବଳି ଉପହାର,  ବଢ଼ିଲା DA

ବଢ଼ିଲା କେନ୍ଦ୍ରୀୟ ସରକାରୀ କର୍ମଚାରୀ ଓ ପେନସନଧାରୀଙ୍କ ମହଙ୍ଗା ଭତ୍ତା। DA ୩% ବୃଦ୍ଧି କରିଛନ୍ତି କେନ୍ଦ୍ର ସରକାର। ପିଛିଲା ଭାବେ ୧ ଜୁଲାଇ ୨୦୨୫ରୁ ଲାଗୁ ହେବ। ପ୍ରାୟ ୪୯ ଲକ୍ଷ କର୍ମଚାରୀ ଓ ୬୫ ଲକ୍ଷ ପେନସନଧାରୀ ଉପକୃତ ହେବେ। ଏ ସମ୍ପର୍କିତ ପ୍ରସ୍ତାବରେ ମୋହର ମାରିଛି କେନ୍ଦ୍ର କ୍ୟାବିନେଟ। ବୈଠକ ପରେ ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ। .. 

ଏହି ବୃଦ୍ଧି ୧ ଜୁଲାଇ, ୨୦୨୫ରୁ ଲାଗୁ ହୋଇଛି । ତେଣୁ କର୍ମଚାରୀ ଏବଂ ପେନସନଭୋଗୀମାନେ ମଧ୍ୟ ଜୁଲାଇ, ଅଗଷ୍ଟ ଏବଂ ସେପ୍ଟେମ୍ବର ତିନି ମାସର ବକେୟା ପାଉଣା ପାଇବେ।
ଦଶହରା ଏବଂ ଦୀପାବଳି ପୂର୍ବରୁ, କେନ୍ଦ୍ର ସରକାର ଲକ୍ଷ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କୁ ସେମାନଙ୍କର DA ବୃଦ୍ଧି କରି ଉପହାର ଦେଇଛନ୍ତି।

ଏହି ନିଷ୍ପତ୍ତି ଦରମା ଏବଂ ପେନସନରେ ଯଥେଷ୍ଟ ପରିବର୍ତ୍ତନ ଆଣିଛି। ଏହି ବୃଦ୍ଧି ଫଳରେ କର୍ମଚାରୀମାନେ ପାର୍ବଣ ଋତୁରେ ବର୍ଦ୍ଧିତ ମାସିକ ଦରମା ଏବଂ ତିନି ମାସର ବକେୟା ପାଉଣା ପାଇବେ।
ବିଭିନ୍ନ ସ୍ତରର ଦରମାରୁ DA ବୃଦ୍ଧି ପରେ କର୍ମଚାରୀଙ୍କ ମୋଟ ଦରମାରେ କେତେ ପାର୍ଥକ୍ୟ ରହିଛି ତାହା ଆସନ୍ତୁ ବୁଝିବା।

୩% DA ବୃଦ୍ଧି ପରେ ମାସିକ ଦରମାରେ ପରିବର୍ତ୍ତନ 

ମହଙ୍ଗା ଭତ୍ତା ୩% ବୃଦ୍ଧି ଦ୍ୱାରା ହାର ୫୫% ରୁ ୫୮% କୁ ବୃଦ୍ଧି ପାଇଛି। କର୍ମଚାରୀଙ୍କ ମାସିକ ଦରମାରେ ଏହି ବୃଦ୍ଧି ସିଧାସଳଖ ସେମାନଙ୍କ ମୂଳ ଦରମା ଉପରେ ନିର୍ଭର କରିବ।
୧୮ ହଜାର ଟଙ୍କା ମୂଳ ଦରମା ଥିବା କର୍ମଚାରୀମାନେ ୯୯୦୦ ଟଙ୍କା ଡିଏ ପାଉଥିଲେ । ଏବେ ଏହି ଡିଏ ୧୦ ହଜାର ୪୪୦ ଟଙ୍କା ହେବ । ଅର୍ଥାତ ମାସିକ ଦରମା ୫୪୦ ଟଙ୍କା ବଢ଼ିବ ।

ସେହିପରି ୩୦ ହଜାର ଟଙ୍କା ମୂଳ ଦରମା ଥିବା କର୍ମଚାରୀଙ୍କର ୯୦୦ ଟଙ୍କା, ୫୦ ହଜାର ଟଙ୍କା ମୂଳ ଦରମା ଥିବା କର୍ମଚାରୀଙ୍କର ଡିଏ ୧୫୦୦ ଟଙ୍କା ଓ ୬୦ ହଜାର ଟଙ୍କା ମୂଳ ଦରମା ଥିବା କର୍ମଚାରୀ ମାସକୁ ୧୮୦୦ ଟଙ୍କା ଅଧିକ ଡିଏ ପାଇବେ ।  

ସେହିପରି ୧୭ଟି ରାଜ୍ୟରେ ଖୋଲିବ ୫୭ଟି ନୂଆ କେନ୍ଦ୍ରୀୟ ବିଦ୍ୟାଳୟ। ରବି ଋତୁ ପାଇଁ ନୂଆ ୬ଟି ଶସ୍ୟ ପାଇଁ ଏମଏସପି ପ୍ରଦାନ କରାଯିବ। ଏସବୁ ପ୍ରସ୍ତାବରେ ମୋହର ମାରିଛି କେନ୍ଦ୍ର କ୍ୟାବିନେଟ୍। ...