Gold Prices Fall: ପୁଣି ଦେଢ଼ ଲକ୍ଷ ତଳକୁ ଖସିଲା ସୁନା, ଯୁଦ୍ଧ ଭିତରେ ଖୁସି ଖବର

ଯୁଦ୍ଧ ଭିତରେ ଖସିଲା ସୁନା ଦର । ପୁଣି ଦେଢ଼ଲକ୍ଷ ତଳେ ହଳଦିଆ ଧାତୁ । ଲଗାତର ଦାମ୍ ବୃଦ୍ଧି ପରେ ହ୍ରାସ ହେଲା ସୁନାଦର । ମାର୍କେଟରେ ସୁନାକୁ ନେଇ ଆଉ ଆଗ ଭଳି ନାହିଁ ଗ୍ରାହକଙ୍କ ସେ ଖୁସି ।

ଗତ କିଛି ମାସ ଧରି ସୁନା ଗ୍ରାଫ୍ ଉପର ତଳ ହେବା ପରେ ଏକାଥରେ ଛଇଁଥିଲା ଦେଢ଼ ଲକ୍ଷ ଟଙ୍କା । ଆଉ ପରେ ଧୀରେ ଧୀରେ ଖସି ଲକ୍ଷେ ୩୮ ହଜାରରେ ପହଞ୍ଚିଥିଲା । ଆଉ ପୁଣି ବଢ଼ି ଦେଢ଼ଲକ୍ଷ ଟପିଥିଲା ।  

ହେଲେ ଏବେ ଲଗାତର ସୁନା ଦର ବୃଦ୍ଧି ପରେ ଆଜି ସାମାନ୍ୟ ହ୍ରାସ ଘଟିଛି । ଅର୍ଥାତ୍ ୨୨ କ୍ୟାରେଟ ସୁନା ଭରି ପ୍ରତି ୧୮ ଶହ ଟଙ୍କା କମିଛି । ତେଣୁ ଆଜି ବଜାରରେ ୨୨ କ୍ୟାରେଟ୍ ସୁନାଦର ୧୦ ଗ୍ରାମ୍ ପ୍ରତି ଲକ୍ଷେ ୪୮ ହଜାର ୨ଶହ ଟଙ୍କା ରହିଛି । ବେଶ୍ କିଛିଦିନର ବ୍ୟବଧାନ ପରେ ଦେଢ଼ ଲକ୍ଷ ତଳକୁ ଖସିଛି ସୁନା ।

୨୪ କ୍ୟାରେଟ୍ ସୁନା ଦରରେ ବି ପରିବର୍ତ୍ତନ ହୋଇଛି । ଆଜି ୨୪ କ୍ୟାରେଟ ସୁନା ଭରି ପ୍ରତି ୧୯ ଶହ ୬୦ ଟଙ୍କା କମିଛି । ତେଣୁ ଗହଣା ବଜାରରେ ୨୪ କ୍ୟାରେଟ୍ ସୁନାଦର ୧୦ ଗ୍ରାମ୍ ପ୍ରତି ଲକ୍ଷେ ୬୧ ହଜାର ୬୮୦ ଟଙ୍କା ରହିଛି ।

ଗତକାଲି ୧୦ ଗ୍ରାମ୍ ପ୍ରତି ୨୪ କ୍ୟାରେଟ୍ ସୁନାଦର ଲକ୍ଷେ ୬୩ ହଜାର ୬୪୦ ଟଙ୍କା ରହିଥିଲା । ବର୍ତ୍ତମାନ ବିବାହ ଋତୁ ଚାଲୁଥିବାରୁ ବଜାରରେ ସୁନାରେ ଚାହିଦା ବେଶ୍ ରହିଛି । ହେଲେ ଦର ଢେର ଅଧିକ ରହିଥିବାରୁ ଗରିବ ମଧ୍ୟବିତ୍ତ ଅସୁବିଧାର ସାମ୍ନା କରୁଛନ୍ତି ।

ସେପଟେ ବଜାରରେ ରୁପାର ଦାମ୍ ବି ନିଆଁ ଭଳି ହୁତୁହୁତୁ ଜଳୁଛି । ତିନି ଲକ୍ଷ ଟପିଥିବା ରୁପା ଖସିଛି ସତ ହେଲେ ଗ୍ରାହକଙ୍କ ଚାହିଦା ଠାରୁ ଢେର ଅଧିକ ରହିଛି । ସେହିଭଳି ରୁପା କେଜି ପ୍ରତି ବର୍ତ୍ତମାନ ଦୁଇ ଲକ୍ଷ ୯୦ ହଜାର ଟଙ୍କା ରହିଛି । ଆଜି ଦରରେ କୌଣସି ପରିବର୍ତ୍ତନ ହୋଇନଥିଲେ ମଧ୍ୟ ଗ୍ରାହକଙ୍କ ପାଇଁ ଏ ଦାମ୍ ବେଶ୍ ଅଧିକ ଥିବା କୁହାଯାଉଛି ।

ପ୍ରତିଦିନ ଗ୍ରାହକଙ୍କ ସହ ଲୁଚକାଳି ଖେଳୁଛି ସୁନା-ରୁପା ଦର । ଗରିବ-ମଧ୍ୟବିତ୍ତଙ୍କ ମୁଣ୍ଡରେ ଚଡ଼କ ପକାଉଛି । ତେଣୁ ଆଗକୁ ଦାମ୍ ଆହୁରି କମିବାର ଆବଶ୍ୟକତା ଥିବା ଗ୍ରାହକ କହିଛନ୍ତି ।