Forced Marriage Case: ବାହା ହୋଇ ବେଦିରୁ ଉଠିଲେ, କେଇ ଘଣ୍ଟାରେ ଥାନାରେ ହେଲା ଛାଡ଼ପତ୍ର

ଅଗ୍ନିକୁ ସାକ୍ଷୀ ରଖି ବାହା ହେଲା । ବେଦୀରେ ବର ହାତରୁ ସିନ୍ଦୂର ପିନ୍ଧିଲା କନିଆଁ । ହେଲେ ବାହାଘରର ମାତ୍ର କିଛି ଘଣ୍ଟା ଭିତରେ ଉଭୟଙ୍କ ଭିତରେ ଆପୋସ ବୁଝାମଣାରେ ଡିଭୋର୍ସ ହୋଇଗଲା ।

ଗୋଟିଏ ଦିନରେ ଅଲଗା ହୋଇଗଲେ ସ୍ବାମୀ-ସ୍ତ୍ରୀ । ଏପରି ଏକ ଘଟଣା ଏବେ ଖୁବ୍ ଚର୍ଚ୍ଚାରେ । ଉତ୍ତର ପ୍ରଦେଶ ହମିରପୁର ଜିଲ୍ଲାର ଏହି ନବ ଦମ୍ପତି ଅଲଗା ହେବା ପରେ ସମାଜ ଆଗରେ ଦୁଇ ପରିବାରଙ୍କ ମୁଣ୍ଡ ତଳକୁ ହୋଇଯାଇଛି । 

କୁହାଯାଉଛି, ରୀତିନୀତି ଅନୁସାରେ ବର ଧରମ ସିଂହ କୁଶୱାହା ଓ କନ୍ୟା ମିଥିଳେଶ କୁମାରୀଙ୍କ ବିବାହ ଶେଷ ହୋଇଥିଲା । ବିବାହ ପରେ କନ୍ୟାକୁ ନେଇ ବର ପକ୍ଷ ନିଜେ ଘରେ ପହଞ୍ଚିଥିଲେ । ହେଲେ ସେଠାରେ କନ୍ୟା ମିଥିଳେଶ ସ୍ବାମୀଙ୍କ ସହ ରହିବାକୁ ରାଜି ହୋଇନଥିଲେ ।

ଏମିତି କି ବିବାହର ପ୍ରଥମ ରାତିରେ ସ୍ବାମୀଙ୍କୁ ନିଜ ରୁମ ଭିତରକୁ ପ୍ରବେଶ ପାଇଁ ଅନୁମତି ଦେଇନଥିଲେ । ଆଉ ଏ ବାହାଘର ତାଙ୍କ ଇଚ୍ଛାରେ ହୋଇନଥିବା କହିଥିଲେ । ଫଳରେ ଏହି ଘଟଣା ପରେ ହମିରପୁରର ରଥ ପୋଲିସ ଷ୍ଟେସନ ଯାଏଁ କଥା ଯାଇଥିଲା ।

ପୋଲିସ ଏନେଇ ନବବଧୂଙ୍କୁ ବହୁତ ବୁଝାସୁଝା କରିଥିଲେ ମଧ୍ୟ କିଛି ସୁଫଳ ମିଳିନଥିଲା । ଉଭୟ ବର କନ୍ୟା ଛାଡ଼ପତ୍ର ପାଇଁ ଅଡ଼ି ବସିଥିଲେ ଶେଷରେ ସେମାନଙ୍କର ଡିଭୋର୍ସ ମଧ୍ୟ ହୋଇଛି । 

ନବବଧୂ ମିଥିଳେଶଙ୍କ କହିବା କଥା, ସେ ଅନ୍ୟ ଏକ ପୁଅକୁ ଭଲପାଉଥିଲେ । ଏ କଥା ତାଙ୍କ ଘର ଲୋକ ଜାଣି ମଧ୍ୟ ତାଙ୍କୁ ଜୋରଜବରଦସ୍ତି ବାହା ଦେଇଛନ୍ତି । ତା’ ଛଡ଼ା ସେ ବାହା ହେବାକୁ ମନା କ୍ରିବାରୁ ତାଙ୍କୁ ମାଡ଼ ମାରି ବାହା କରାଇଛନ୍ତି । ନବବଧୂଙ୍କ ନିକଟରୁ ଏହି କଥା ଶୁଣିବା ପରେ ଉଭୟ ପରିବାର ସହ ପୋଲିସ ଆଲୋଚନା କରିଥିଲା ।

ଏନେଇ ରଥ ପୋଲିସ ଷ୍ଟେସନ ଇନଚାର୍ଜ ରାକେଶ ସିଂହ କହିଛନ୍ତି, ପୋଲିସ ଉଭୟ ପକ୍ଷ ସହିତ ଏହି ବିଷୟରେ ଦୀର୍ଘ ସମୟ ଧରି ଆଲୋଚନା କରିଥିଲେ । ଯେତେବେଳେ କନ୍ୟା ରହିବାକୁ ରାଜି ହେଲେ ନାହିଁ ।

ତେଣୁ ଦୁଇ ପରିବାର ଅଲଗା ହେବାକୁ ନିଷ୍ପତ୍ତି ନେଇଥିଲେ । ତେଣୁ ଛାଡ଼ପତ୍ର ଏକମାତ୍ର ବିକଳ୍ପ ଥିଲା । ଆଉ ଏ ନିଷ୍ପତ୍ତି ପରେ କନ୍ୟା ତାଙ୍କ ପିତାମାତାଙ୍କ ଘରକୁ ଫେରିଗଲେ।