ନିର୍ବାଚନ ଆୟୋଗଙ୍କ ନିଷ୍ପତ୍ତି ବିରୋଧରେ ବର୍ଷିଲେ ମମତା

ପଶ୍ଚିମବଙ୍ଗ  : କେନ୍ଦ୍ର ନିର୍ବାଚନ ଆୟୋଗଙ୍କ ନିଷ୍ପତ୍ତି ଅପ୍ରତ୍ୟାଶିତ, ଅଗଣତାନ୍ତ୍ରିକ ବୋଲି କହି ବର୍ଷିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ମମତା କହିଛନ୍ତି, ବିଜେପି ପୂର୍ବ ପ୍ରସ୍ତୁତି ଅନୁସାରେ ଷଡ଼ଯନ୍ତ୍ର କରି ଏଭଳି ନିଷ୍ପତ୍ତି ନେବା ସହ ଏଥିପାଇଁ ନିର୍ବାଚନ ଆୟୋଗଙ୍କୁ ବ୍ୟବହାର କରିଛି।

ଆଜି ପଶ୍ଚିମବଙ୍ଗରେ ମୋଦିଙ୍କ ରାଲି ଶେଷ ହେଉଥିବାରୁ ଏହାସହ ପ୍ରଚାର ବନ୍ଦ କରିବାକୁ ମୋଦି ଓ ଅମିତ ଶାହାଙ୍କ ନିର୍ଦ୍ଦେଶରେ ନିର୍ବାଚନ ଆୟୋଗ ଏ ନିଷ୍ପତ୍ତି ନେଇଥିବା ମମତା ଅଭିଯୋଗ କରିଛନ୍ତି।

ଉଲ୍ଲେଖନୀୟ ଯେ, କୋଲକାତାରେ ମଙ୍ଗଳବାର ଘଟିଥିବା ରାଜନୈତିକ ହିଂସାକାଣ୍ଡ ଓ ଇଶ୍ୱର ଚନ୍ଦ୍ର ବିଦ୍ୟାସାଗରଙ୍କ ପ୍ରତିମୂର୍ତ୍ତୀ ଭଙ୍ଗାଯିବା ଘଟଣାକୁ ଗୁରତର ସହ ନେଇଛନ୍ତି ନିର୍ବାଚନ କମିଶନ୍। ପ୍ରଥମ ଥର ପାଇଁ ରାଜ୍ୟରେ ଧାରା ୩୨୪କୁ ଲାଗୁ କରାଯାଇଛି। ଏହା ବଳରେ ନିର୍ବାଚନ କମିଶନ ନିର୍ବାଚନ ତଦାରଖ, ପରିଚାଳନା ଓ ନିୟନ୍ତ୍ରଣ ନେଇ ନିଜ କ୍ଷମତାର ଉପଯୋଗ କରିଛନ୍ତି।

ଫଳରେ ନିର୍ଦ୍ଧାରିତ ସମୟର ଦିନକ ଆଗରୁ ପ୍ରଚାର ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ୧୯ରେ ଶେଷ ପର୍ଯ୍ୟାୟ ମତଦାନ ହେବାକୁ ଥିବା ବେଳେ ଆଜି ରାତି ୧୦ଟା ପରଠାରୁ ଆଉ ପ୍ରଚାର କରିହେବ ନାହିଁ।