କୁନି ଝିଅ ଆଗରେ ଚାକିିରି ତୁଚ୍ଛ : ଛୁଟି ନମିଳିବାରୁ ଇସ୍ତଫା ଦେଲେ ଡେପୁଟି ଏସପି

• ‘ମୁଁ ବି ଜଣେ ବାପା, ଚାରି ବର୍ଷର କୁନି ଝିଅକୁ କାହା ଭରସାରେ ଛାଡ଼ିବି’
• କରୋନା ସହ ଲଢ଼େଇ କରୁଛି ସ୍ତ୍ରୀ
• ଘରେ ଏକୁଟିଆ କୁନି ଝିଅ
• ଛୁଟି ନମିଳିବାରୁ ଚାକିରିରୁ ଇସ୍ତଫା ଦେଇଦେଲେ ଡେପୁଟି ଏସପି

ଝାନ୍ସି : କୁନି ଝିଅ ଆଗରେ ଚାକିିରି ତୁଚ୍ଛ । ଟଙ୍କା ପଇସାର କିଛି ମୂଲ୍ୟ ନାହିଁ । ଛୁଟି ନମିଳିବାରୁ ଉଚ୍ଚପଦସ୍ଥ ଚାକିରିରୁ ଇସ୍ତଫା ଦେଲେ ଡେପୁଟି ଏସପି । ଝାନ୍ସିରେ ଦେଖିବାକୁ ମିଳିଛି ଏପରି ଅଭାବନୀୟ ଘଟଣା । କରୋନା ସଂକ୍ରମିତ ସ୍ତ୍ରୀ ଓ ୪ ବର୍ଷର କୁନି ଝିଅର ଦେଖାରଖା ପାଇଁ ଛୁଟି ନମିଳିବାରୁ ମନୀଷ ସୋନକର ଚାକିରିରୁ ଇସ୍ତଫା ଦେଇଛନ୍ତି । ଉପରିସ୍ଥ ଅଧିକାରୀଙ୍କ ଦ୍ୱାରା ଛୁଟି ନାମଞ୍ଜୁର ହେବା ପରେ ଏପରି ଚରମ ନିଷ୍ପତ୍ତି ନେଇଛନ୍ତି । ତେବେ ସେ ଇସ୍ତଫା ଦେବାପରେ ଚାରିଆଡ଼େ ହଇଚଇ ସୃଷ୍ଟି ହୋଇଛି ।

ଝାନ୍ସିର ସିଓ ସଦର ପଦରେ ନିଯୁକ୍ତ ମନୀଷ ସୋନକର । ସ୍ତ୍ରୀ କରୋନା ସଂକ୍ରମିତ ହୋଇ ଜୀବନମୃତ୍ୟୁ ସହ ଲଢ଼େଇ କରୁଛନ୍ତି । ଘରେ ମାତ୍ର ୪ ବର୍ଷର କୁନି ଝିଅ । ପରିବାରର ଦାୟିତ୍ୱ ବୁଝିବା ପାଇଁ ଉପରିସ୍ଥ ଛୁଟି  ଦିଆଗଲା ନାହିଁ । ଛୁଟି ମଞ୍ଜୁର ନକରିବାରୁ ସେ ବାଧ୍ୟ ହୋଇ ଇସ୍ତଫା ପତ୍ର ପଠାଇ ଦେଇଛନ୍ତି । ସୋସିଆଲ ମିଡ଼ିଆରେ ଏବେ ତାଙ୍କର ଇସ୍ତଫା ପତ୍ରର ନକଲ ଚାରିଆଡ଼େ ଘୁରିବୁଲୁଛି । ଅଭିଯୋଗ ଅନୁସାରେ ପତ୍ନୀ କରୋନା ସଂକ୍ରମିତ ହୋଇ ଚିକିତ୍ସିତ ହେଉଛନ୍ତି, ତାଙ୍କର ଅବସ୍ଥା ଭଲ ନାହିଁ ।  ୪ ବର୍ଷର କୁନି ଝିଅ ଅହରହ ମା’ ମା’ ହୋଇ କାନ୍ଦୁଛି । ବାପାର ପାଖ ଛାଡ଼ୁନି । ଘରେ ତା’ର ଦେଖାରଖା କରିବାକୁ କେହି ନାହିଁ । ମହାମାରୀର ମହାସଙ୍କଟ ମଧ୍ୟରେ କୁନି ଝିଅକୁ କାହା ଦାୟିତ୍ୱରେ ଛାଡ଼ିବେ, ସେ ଚିନ୍ତା କରିପାରୁ ନାହାନ୍ତି ।

ଏଥିପାଇଁ ଛୁଟି ଦରଖାସ୍ତ ଦେଇଥିଲେ ମନୀଷ ସୋନକର । ଘର ପରିବାର ପାଇଁ ୧ ମେ ରୁ ୬ ମେ ପର୍ଯ୍ୟନ୍ତ ଛୁଟି ମାଗିଥିଲେ ଏସପି । ତାଙ୍କ ଛୁଟି ଦରଖାସ୍ତକୁ ଗୁରୁତର ସହ ନନେଇ ୨ ଓ ୩ ତାରିଖ ପାଇଁ ତାଙ୍କୁ ବଡ଼ଗାଁ ଭୋଟଗଣତି କେନ୍ଦ୍ରରେ ଡ୍ୟୁଟି ପକାଇଥିଲେ ।  ଶେଷରେ ଝିଅ ଓ ସ୍ତ୍ରୀର ଜୀବନ ବଞ୍ଚାଇବାକୁ ଚାକିରି ଛାଡ଼ିବାକୁ ଶ୍ରେୟସ୍କର ମଣିଲେ ଏସପି ।

ସେପଟେ ଏକଥାକୁ ଖଣ୍ଡନ କରିଛନ୍ତି ଛୁଟି ନାମଞ୍ଜୁର କରିଥିବା ଉପରିସ୍ଥ ଅଧିକାରୀ ।  କହିଛନ୍ତି, ମନୀଷ ସୋନକର ଘରେ ଜଣେ ସହାୟକ ରଖିପାରିବେ । ହେଲେ ମନୀଷ ଜଣେ ବଦଳରେ ୨ ଜଣ ସହାୟକ ନିଯୁକ୍ତ କରିଥିଲେ ହେଁ ଅଫିସ ଆସିବାକୁ ମନା କରୁଛନ୍ତି । ଅନ୍ୟପଟେ ସହାୟକଙ୍କ ସମସ୍ତ ବେତନ ସରକାର ଭରୁଛନ୍ତି ବୋଲି ସ୍ପଷ୍ଟ କରିଛନ୍ତି । ଏହାସହ ସେ କହିଛନ୍ତି, ଦୁଇ ଜଣ ସହାୟକଙ୍କୁ ବାହନା କରି ଘରୁ ତଡ଼ି ଦେଇଛନ୍ତି ମନୀଷ ସୋନକର । ସରକାରୀ ସହାୟକଙ୍କୁ ବାହାର କରିଦେବାରୁ ତାଙ୍କୁ ଦିଆଯାଉଥିବା ଟଙ୍କା ଆଉ ଦିଆଯାଉ ନାହିଁ । ଫଳରେ ଏପରି ନଖରା ଦେଖାଉଛନ୍ତି ଏସପି ବୋଲି କହିଛନ୍ତି ଉପରିସ୍ଥ ଅଧିକାରୀ ।

୨ମେ ରେ ଭୋଟ ଗଣତି କେନ୍ଦ୍ରରେ ଡିଏମ ପହଞ୍ଚିଥିଲେ । ହେଲେ ସେଠାରେ ନିଯୁକ୍ତ ହୋଇଥିବା ମନୀଷ ସୋନକର କେନ୍ଦ୍ର ନିକଟରେ ଉପସ୍ଥିତ ନଥିଲେ । ତାଙ୍କ ଦାୟିତ୍ୱରେ ଥିବା ପୋଲିସ ଫୋର୍ସ ଏପଟ ସେପଟ ହୋଇ ବୁଲୁଥିଲେ । ତେବେ ଏନେଇ ତାଙ୍କୁ ପ୍ରଶ୍ନ କରାଯିବା ପରେ ମନୀଷ ହାତରେ ଲେଖାଥିବା ଏକ ଇସ୍ତଫା ପତ୍ର ପଠାଇ ଦେଇଛନ୍ତି । ଯାହାକୁ ଉପରିସ୍ଥ ଅଧିକାରୀଙ୍କ ନିକଟକୁ ପଠାଇ ଦିଆଯାଇଛି ।