ଆପଣ ଜାଣନ୍ତି କି ହନୁମାନ ବି କରିଥିଲେ ବିବାହ

ମହାବୀର ହନୁମାନ ତାଙ୍କ ଭକ୍ତଙ୍କ ଉପରେ ଆସୁଥିବା ସମସ୍ତ ପ୍ରକାର ଦୁଃଖ ଓ ଅସୁବିଧାକୁ ଦୂର କରିଥାନ୍ତି। ପ୍ରଭୁ ହନୁମାନ ଜଣେ ଶୀଘ୍ର ପ୍ରସନ୍ନ ହୁଅନ୍ତି ବୋଲି ବିଶ୍ୱାସ କରାଯାଏ। ହନୁମାନଙ୍କ ପୂଜା ପାଠରେ ଅଧିକ କିଛି କରିବାର ଆବଶ୍ୟକତା ବି ନଥାଏ। ମଙ୍ଗଳବାର ଦିନ ପୂଜା ପରେ ଅମୃତବାଣୀ ଓ ହନୁମାନ ଚାଲିସା ପାଠ କରିବା ପରେ ବଜରଙ୍ଗବାଲି ଖୁସି ହୋଇ ଭକ୍ତଙ୍କ ଇଚ୍ଛା ପୂରଣ କରନ୍ତି। ସମସ୍ତେ ଜାଣନ୍ତି ଯେ ବଜରଙ୍ଗବାଲି ହନୁମାନ ହେଉଛନ୍ତି ଜଣେ ବ୍ରହ୍ମଚାରୀ ଏବଂ ସେ ବିବାହିତ ନ ଥିଲେ। କିନ୍ତୁ ଆପଣ ଜାଣନ୍ତି କି ପୁରାଣ ଗ୍ରନ୍ଥଗୁଡ଼ିକରେ ମିଳୁଥିବା କିମ୍ବଦନ୍ତୀ ଅନୁଯାୟୀ ହନୁମାନ ବିବାହିତ ଥିଲେ ମଧ୍ୟ ସେ ସର୍ବଦା ବ୍ରହ୍ମଚାରୀ ଥିଲେ। ପ୍ରକୃତରେ ହନୁମାନ ଏକ ଜରୁରୀ ପରିସ୍ଥିତି ଯୋଗୁଁ ଏହି ବିବାହ କରିଥିଲେ। ତେବେ ଆସନ୍ତୁ ଜାଣିବା କିଏ ହନୁମାନଙ୍କୁ ବିବାହ କରିଥିଲେ ଏବଂ କାହିଁକି?

କିମ୍ବଦନ୍ତୀ ଅନୁଯାୟୀ, ହନୁମାନ ସୂର୍ଯ୍ୟ ଦେବତାଙ୍କୁ ତାଙ୍କର ଗୁରୁ କରିଥିଲେ ଏବଂ ସେ ସୂର୍ଯ୍ୟ ଦେବତାଙ୍କଠାରୁ 9 ଟି ବିଦ୍ୟା ପାଇବାକୁ ନିଶ୍ଚୟ କରିଥିଲେ। ସୂର୍ଯ୍ୟ ଭଗବାନ ହନୁମାନଙ୍କୁ 9 ଟି ପ୍ରମୁଖ ଶାସ୍ତ୍ର ମଧ୍ୟରୁ 5 ଟି ଶିକ୍ଷା ଦେଇଥିଲେ, କିନ୍ତୁ ଅବଶିଷ୍ଟ 4 ଟି ଶିକ୍ଷା ଦେବାବେଳେ ସେଠାରେ ଏକ ବାଧା ଆସିଥିଲା। ସେତେବେଳେ ହନୁମାନ ବିବାହ କରି ନ ଥିଲେ କିନ୍ତୁ ସେହି ଶିକ୍ଷା ଶିଖିବା ପାଇଁ ବିବାହ କରିବା ଆବଶ୍ୟକ ଥିଲା। ତା’ପରେ ହନୁମାନଙ୍କ ଗୁରୁ ସୂର୍ଯ୍ୟଦେବ ତାଙ୍କୁ ବିବାହ କରିବାକୁ କହିଥିଲେ। ତାଙ୍କ ଗୁରୁଙ୍କ ନିର୍ଦ୍ଦେଶରେ ହନୁମାନ ବିବାହ କରିବାକୁ ନିଷ୍ପତ୍ତି ନେଇଥିଲେ। ତେବେ କିଏ ହନୁମାନଙ୍କୁ ବିବାହ କରିବା ଉଚିତ ସେନେଇ ସମସ୍ୟା ଉପୁଜିଥିଲା। ତା’ପରେ ସୂର୍ଯ୍ୟଦେବ ହନୁମାନଙ୍କୁ ତାଙ୍କର ଏକମାତ୍ର ତେଜସ୍ଵୀ ପୁତ୍ରୀ ସୁଭର୍ଚଲାଙ୍କୁ ବିବାହ କରିବାକୁ ପ୍ରସ୍ତାବ ଦେଇଥିଲେ।

ଏହା ପରେ ହନୁମାନ ଏବଂ ସୁଭର୍ଚଲାଙ୍କ ବିବାହ ହୋଇଥିଲା। ସୁଭର୍ଚଲା ପରମ ତପସ୍ଵୀ ଥିଲେ। ବିବାହ ପରେ, ସୁଭର୍ଚଲା ସବୁଦିନ ପାଇଁ ତପସ୍ୟାରେ ଲିନ ହୋଇଗଲେ। ହନୁମାନ ମଧ୍ୟ ତାଙ୍କର ବାକି ଚାରିଟି ବିଷୟରେ ଜ୍ଞାନ ଆହରଣ କରିବାକୁ ଲାଗିଲେ। ତେଣୁ ବିବାହ ପରେ ମଧ୍ୟ ହନୁମାନଙ୍କର ବ୍ରହ୍ମାଚର୍ଯ୍ୟ ବ୍ରତ ଭାଙ୍ଗିଲା ନାହିଁ। ଆଜି ବି ହନୁମାନଙ୍କର ମନ୍ଦିର ତେଲେଙ୍ଗାନାର କାମାମ ଜିଲ୍ଲାରେ ରହିଆସିଛି ଯେଉଁଠାରେ ହନୁମାନ ତାଙ୍କ ପତ୍ନୀ ସୁଭର୍ଚଲାଙ୍କ ସହ ବିରାଜମାନ ଅଛନ୍ତି। ବିଶ୍ୱାସ କରାଯାଏ ଯେ ଏଠାରେ ହନୁମାନ ଓ ତାଙ୍କ ପତ୍ନୀଙ୍କ ଦର୍ଶନ କଲେ ଦାମ୍ପତ୍ୟ ଜୀବନର ସମସ୍ତ ସମସ୍ୟାର ସମାଧାନ ହୁଏ ଏବଂ ଦାମ୍ପତ୍ୟ ଜୀବନ ସୁଖମୟ ହୁଏ। ଦର୍ଶନ କରିବା ଦ୍ୱାରା ଦାମ୍ପତ୍ୟ ଜୀବନର ସମସ୍ତ ସମସ୍ୟା ମଧ୍ୟ ଦୂର ହୋଇଥାଏ।