କରୀନା କପୁରଙ୍କୁ ବୟକଟ୍ ଦାବି

ମୁମ୍ବାଇ : ବଲିଉଡ ଅଭିନେତ୍ରୀ କରୀନା କପୁର ଖାନ ଦ୍ୱିତୀୟ ଥର ପାଇଁ ମା ହେବା ପରେ ପୁଣି ଥରେ କାମ କରିବାକୁ ପ୍ରସ୍ତୁତ ଅଛନ୍ତି। ତେବେ ସୋସିଆଲ ମିଡିଆରେ ପୋଷ୍ଟ ହେତୁ ଅନେକ ସମୟରେ ହେଡଲାଇନରେ ଥିବା ‘ବେବୋ’ଙ୍କ ବିରୋଧରେ ଟ୍ୱିଟରରେ ବଏକଟ୍ କରିବାକୁ ଦାବି ଉଠିଛି। ଏହା ପଛର କାରଣ ହେଉଛି ଏକ ପୌରାଣିକ କାହାଣୀରେ ‘ସୀତା’ ଭୂମିକାରେ ଅଭିନୟ କରିବା ପାଇଁ ସେ ସିନେ ନିର୍ମାତାମାନଙ୍କଠାରୁ ବିପୁଳ ପରିମାଣର ଅର୍ଥ ଦାବି କରିଛନ୍ତି। ଲୋକମାନଙ୍କ କହିବା କଥା ଯେ କରୀନା ଏହି ଭୂମିକା ପାଇଁ ଯୋଗ୍ୟ ନୁହଁନ୍ତି।

ନିକଟରେ ଏକ ଖବର ସାମ୍ନାକୁ ଆସିଥିଲା ​​ଯେ ଯେତେବେଳେ ନିର୍ମାତା ‘ସୀତା’ର ଭୂମିକା ପାଇଁ କରୀନା କପୁର ଖାନଙ୍କ ସହ ସଂପର୍କ କରିଥିଲେ, ସେତେବେଳେ ସେ ଏହି ଭୂମିକା ନିଭାଇବା ପାଇଁ ୧୨ କୋଟି ଟଙ୍କା ଦାବି କରିଥିଲେ। ପୂର୍ବରୁ କରୀନା ତାଙ୍କ ଚଳଚ୍ଚିତ୍ର ପାଇଁ ୬ ରୁ ୮ କୋଟି ଟଙ୍କା ଚାର୍ଜ କରୁଥିଲେ।

ଏହି ଖବର ଭାଇରାଲ ହେବା ପରେ ଲୋକମାନେ ତାଙ୍କୁ ସୋସିଆଲ ମିଡିଆରେ ଟ୍ରୋଲ କରିବା ଆରମ୍ଭ କରିଥିଲେ। ଉପଭୋକ୍ତାମାନେ ଖବରର ସ୍କ୍ରିନସଟ ସେୟାର କରି କରିନାଙ୍କୁ ବଏକଟ୍ କରିବାକୁ ଦାବି କରୁଛନ୍ତି। ସୀତାଙ୍କ ଭୂମିକା ହେତୁ ଟ୍ୱିଟରରେ ହ୍ୟାସ୍‌ଟ୍ୟାଗ୍ ବଏକଟ୍ କରୀନା କପୁର ଖାନ୍ ଟ୍ରେଣ୍ଡ୍ ହେଉଛି।

ଲୋକମାନଙ୍କ କହିବା କଥା, କରୀନା ସୀତା ଭୂମିକାରେ ଅଭିନୟ ପାଇଁ ଫିଟ୍ ନୁହଁନ୍ତି। କେହି କହୁଛନ୍ତି ଯେ ସେ ତୈମୁରଙ୍କ ମା, ତେଣୁ ଏହି ଭୂମିକାରେ ଅଭିନୟ କରିପାରିବେ ନାହିଁ… ତ ଅନ୍ୟ କେହି କହୁଛନ୍ତି ଯେ ଏହି ଭୂମିକା ପାଇଁ କେବଳ ହିନ୍ଦୁ ଅଭିନେତ୍ରୀଙ୍କୁ ନିଆଯିବା ଉଚିତ।

ପ୍ରକାଶ ଥାଉକି, ଫିଲ୍ମର ଲେଖକ କେ. ଭି. ବିଜେନ୍ଦର ପ୍ରସାଦ ଏହି ରିପୋର୍ଟ ଉପରେ ପ୍ରତିକ୍ରିୟା ପ୍ରକାଶ କରି ସ୍ପଷ୍ଟ କରିଛନ୍ତି ଯେ କରୀନାଙ୍କୁ ଏହି ଫିଲ୍ମ ଅଫର୍ କରାଯାଇ ନାହିଁ। ତେବେ ଏହି ଖବର ପରେ ମଧ୍ୟ ଟ୍ରୋଲର କ୍ରୋଧ ଶାନ୍ତ ହେଉ ନାହିଁ।