Zubeen Garg Bandmate Big Claims: ଜୁବୀନଙ୍କୁ ବିଷ ଦେଇ ମାରିଦେଇଛନ୍ତି ! ଖୋଲି କହିଦେଲେ ଗାୟକଙ୍କ ସହଯୋଗୀ

ଜୁବୀନ ଗର୍ଗଙ୍କ ମୃତ୍ୟୁ ମାମଲାର ତଦନ୍ତରେ ଏକ ନୂଆ ମୋଡ଼ ଆସିଛି । ଜୁବୀନଙ୍କ ବ୍ୟାଣ୍ଡରେ କାମ କରୁଥିବା ଶେଖର ଜ୍ୟୋତି ଗୋସ୍ୱାମୀ ଏକ ବଡ଼ ଦାବି କରିଛନ୍ତି । ମ୍ୟାନେଜର ଓ ଫେଷ୍ଟିଭାଲ ଆୟୋଜକଙ୍କ ଜୁବୀନଙ୍କୁ ବିଷ ଦେଇଥିବା ଅଭିଯୋଗ କରିଛନ୍ତି । ଶେଖର ଜ୍ୟୋତି ଗୋସ୍ୱାମୀ ପୋଲିସଙ୍କୁ କହିଛନ୍ତି ଯେ ତାଙ୍କୁ ଲାଗୁଛି ଯେ ମ୍ୟାନେଜର ସିଦ୍ଧାର୍ଥ ଶର୍ମା ଓ ଫେଷ୍ଟିଭାଲ ଆୟୋଜକ ଶ୍ୟାମକାନୁ ମହାନ୍ତ ଜୁବୀନଙ୍କୁ ବିଷ ଦେଇଥିଲେ ଏବଂ ତାଙ୍କ ମୃତ୍ୟୁକୁ ଆକସ୍ମିକ ବୋଲି ଦର୍ଶାଇ ଲୁଚାଇବାକୁ ଚେଷ୍ଟା କରିଥିଲେ। ପୋଲିସ ତାଙ୍କ ଏହି ଦାବିର ତଦନ୍ତ କରୁଛି। 

ଶେଖର ଜ୍ୟୋତି ଗୋସ୍ୱାମୀ ତଦନ୍ତକାରୀଙ୍କୁ କହିଛନ୍ତି ଯେ ସିଙ୍ଗାପୁରରେ ଜୁବୀନଙ୍କ ମୃତ୍ୟୁ ପୂର୍ବରୁ କିଛି ଘଣ୍ଟା ମଧ୍ୟରେ ଶର୍ମାଙ୍କ ଆଚରଣ ସନ୍ଦେହଜନକ ଥିଲା। ଏଫଆଇଆରରେ ଅଭିଯୁକ୍ତ ଶର୍ମାଙ୍କ ବିରୁଦ୍ଧରେ ଅପରାଧିକ ଷଡ଼ଯନ୍ତ୍ର, ହତ୍ୟା ଏବଂ ଅଣ-ଇଚ୍ଛାକୃତ ହତ୍ୟା ଭଳି ଗମ୍ଭୀର ଅଭିଯୋଗ ରହିଛି।

ସେପଟେ ଆସାମ ସରକାର ଜୁବୀନ ଗର୍ଗଙ୍କ ମୃତ୍ୟୁ ଘଟଣାର ତଦନ୍ତ ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି । ଗଠନ କରିଛନ୍ତି ଜୁଡିସିଆଲ କମିଶନ । ଏହି କମିଶନ ମୃତ୍ୟୁ ଘଟଣାର ସମ୍ପୂର୍ଣ୍ଣ ତଦନ୍ତ କରିବ ଏବଂ ଜୁବୀନ ଗର୍ଗଙ୍କ ମୃତ୍ୟୁର କାରଣ ଓ ପରିସ୍ଥିତି ବିଷୟରେ ଅନୁସନ୍ଧାନ କରିବ। 

ପୂର୍ବରୁ ଏହି ମାମଲାର ତଦନ୍ତ ଆସାମ ସିଆଇଡି ମଧ୍ୟ କରୁଛି। ଆସାମ ସିଆଇଡିର ଏସଆଇଟି ଏହି ମାମଲାର ତଦନ୍ତ କରୁଛି। ସିଆଇଡି ଏହି ମାମଲାରେ ଫେଷ୍ଟିଭାଲର ଆୟୋଜକ ଶ୍ୟାମକାନୁ ମହାନ୍ତଙ୍କୁ ମଧ୍ୟ ପଚରାଉଚୁରା କରିଛି। ଏହା ସହିତ ଜୁବୀନଙ୍କ ମ୍ୟାନେଜର ସିଦ୍ଧାର୍ଥ ଶର୍ମାଙ୍କୁ ସିଆଇଡି ଘଣ୍ଟା ଘଣ୍ଟା ଧରି ପଚରାଉଚୁରା କରିଛି। ଏହି ମାମଲାରେ ଜୁବୀନଙ୍କ ଅନେକ ନିକଟତମ ବ୍ୟକ୍ତିଙ୍କୁ ମଧ୍ୟ ସିଆଇଡି ପଚରାଉଚୁରା କରିଛି।

ଏହି ମାମଲାରେ ଜୁବୀନଙ୍କ ମାମୁଁ ସନ୍ଦୀପନ ଗର୍ଗଙ୍କୁ ମଧ୍ୟ ପଚରାଉଚୁରା କରାଯାଇଥିଲା। ଅନ୍ୟପଟେ ସିଙ୍ଗାପୁର ଅଧିକାରୀମାନେ ଭାରତୀୟ ହାଇ କମିଶନକୁ ଜୁବୀନଙ୍କ ପୋଷ୍ଟମର୍ଟମ ରିପୋର୍ଟ ହସ୍ତାନ୍ତର କରିଛନ୍ତି। ବର୍ତ୍ତମାନ ସିଙ୍ଗାପୁରରେ ଜୁବୀନଙ୍କ ମୃତ୍ୟୁ ପୂର୍ବରୁ ଶେଷ ୪୮ ଘଣ୍ଟାରେ କ’ଣ ହୋଇଥିଲା, ତାହାର ମଧ୍ୟ ଅନୁସନ୍ଧାନ କରାଯାଉଛି। 

ତଦନ୍ତ ସମୟରେ ମ୍ୟାନେଜର ସିଦ୍ଧାର୍ଥଙ୍କ ଠାରୁ ଜୁବୀନଙ୍କ ହ୍ୟାଣ୍ଡବ୍ୟାଗ ଜବତ କରାଯାଇଛି, ଯେଉଁଥିରେ କିଛି ଡକ୍ୟୁମେଣ୍ଟ ଓ ଔଷଧ ମିଳିଛି। ଆସାମ ପୋଲିସର ଏସଆଇଟି ଜୁବୀନଙ୍କ ବ୍ୟାଣ୍ଡମେଟ ଶେଖର ଜ୍ୟୋତି ଗୋସ୍ୱାମୀ ଏବଂ ସହ-ଗାୟିକା ଅମୃତପ୍ରଭା ମହାନ୍ତଙ୍କୁ ମଧ୍ୟ ଗିରଫ କରିଛି। ଅର୍ଥାତ୍ ଏହି ମାମଲାରେ ଏପର୍ଯ୍ୟନ୍ତ ମୋଟ ଚାରି ଜଣଙ୍କୁ ଗିରଫ କରାଯାଇଛି। ଏହି ସମସ୍ତଙ୍କୁ ଅଲଗା ଅଲଗା ରଖି ପଚରାଉଚୁରା କରାଯାଉଛି।

ଗୋସ୍ୱାମୀ ଓ ମହାନ୍ତ ଉଭୟେ ୧୯ ସେପ୍ଟେମ୍ବରରେ ନର୍ଥ ଇଷ୍ଟ ଇଣ୍ଡିଆ ଫେଷ୍ଟିଭାଲ ସମୟରେ କ୍ରୁଜ୍ ପାର୍ଟିରେ ଜୁବୀନଙ୍କ ସହ ଉପସ୍ଥିତ ଥିଲେ। ଏସଆଇଟି ସୂତ୍ର ଅନୁସାରେ, ଏକ ଭିଡିଓରେ ଗୋସ୍ୱାମୀଙ୍କୁ ଜୁବୀନଙ୍କ ଅତି ନିକଟରେ ପହଁରୁଥିବା ଦେଖାଯାଇଛି, ଯେତେବେଳେ ମହାନ୍ତ ସମଗ୍ର ଘଟଣାକୁ ନିଜ ମୋବାଇଲରେ ରେକର୍ଡ କରିଥିଲେ। ଏହି କାରଣରୁ ଉଭୟଙ୍କୁ ଗତ ଛଅ ଦିନ ଧରି ଲଗାତାର ପଚରାଉଚୁରା କରାଯାଉଛି।

ଗତ ଗୁରୁବାର ଶର୍ମା ଓ ଶ୍ୟାମକାନୁ ମହାନ୍ତଙ୍କ ବିରୁଦ୍ଧରେ ଜୁବୀନଙ୍କ ମୃତ୍ୟୁ ସହ ଜଡ଼ିତ ହତ୍ୟା, ଅଣ-ଇଚ୍ଛାକୃତ ହତ୍ୟା, ଅପରାଧିକ ଷଡ଼ଯନ୍ତ୍ର ଏବଂ ଅବହେଳା ଯୋଗୁଁ ମୃତ୍ୟୁର କାରଣ ହେବାର ଅଭିଯୋଗ ଲଗାଯାଇଥିଲା। ସିଆଇଡିର ସ୍ୱତନ୍ତ୍ର ପୋଲିସ ମହାନିର୍ଦ୍ଦେଶକ ମୁନ୍ନା ଗୁପ୍ତା କହିଛନ୍ତି, “ତଦନ୍ତ ଚାଲିଛି ଏବଂ ମୁଁ ଏବେ କୌଣସି ସୂଚନା ଦେଇପାରିବି ନାହିଁ, କିନ୍ତୁ ଆମେ ଆଇପିସି ୧୦୩ (ହତ୍ୟା) ଅଧୀନରେ ଅଭିଯୋଗ ଯୋଡ଼ିଛୁ।”