Shocking News: ଝିଅ ଜନ୍ମନେଇ କୁଆଁ କୁଆଁ କାନ୍ଦିଲା, ବାପା ପୋଖରୀରେ ଫିଙ୍ଗିଦେଲା

ମା’ ଗର୍ଭରୁ ଜନ୍ମନେଲା । ଝିଅଟି କୁଆଁ କୁଆଁ କାନ୍ଦିଲା । ବାପା ବି କୋଳକୁ ନେଲେ । ହେଲେ ଛଟପଟ କରି ମାରିଦେଲା । କେଇ ଘଣ୍ଟା ଜୀବନ ପାଇ ଆଖିବୁଜିଲା ନବଜାତ ଶିଶୁକନ୍ୟା । ସବୁ ପାପର ଅଖିଦେଖା ସାକ୍ଷୀ ହେଲା ପୋଖରୀ ତୁଠ ।

ଏମିତି ଅଭିଯୋଗ ଆସିଛି ଜଣେ ବାପାଙ୍କ ନାଁରେ । ପୂର୍ବରୁ ଦୁଇଟି ଝିଅ ଜନ୍ମ ହୋଇଥିଲେ ବୋଲି ଶେଷରେ ତୃତୀୟ ଝିଅ ପାଇଁ ଜୀଅନ୍ତା ରାକ୍ଷସ ପାଲଟିଗଲା ବାପା ଜଣକ । ଗଣମାଧ୍ୟମ ଆଗରେ ପାଟି ଫୁଟୁନି । କ୍ୟାମେରାକୁ ଦେଖିଲେ ମୁଁ ଲୁଚାଉଛନ୍ତି । ଜଘନ୍ୟ ପାପ ଅଭିଯୋଗ ଯଦି ସତ ହୁଏ ତେବେ କି ଦଣ୍ଡ ପାଇବ କନ୍ୟାହନ୍ତା ବାପ ?

ଏ ଘଟଣା ଯାଜପୁର ଜିଲ୍ଲା କଳିଙ୍ଗନଗର ଥାନା ଅଞ୍ଚଳର ।  ଗୋଲା ଗାଁ ନିକଟସ୍ଥ ଏକ ପୋଖରୀରୁ ନବଜାତ ଶିଶୁକନ୍ୟାର ମୃତଦେହ ଉଦ୍ଧାର ହୋଇଛି । ସୁକିନ୍ଦା ଥାନା ଅଧିନସ୍ଥ ବଞ୍ଜା ଗାଁର ମାନସ ବଳ, ଗୁରୁବାର ସନ୍ଧ୍ୟାରେ କୁନି ଝିଅଟିକୁ ନେଇ ପୋଖରୀରେ ଫିଙ୍ଗିଦେଇଥିଲେ । ଯାହାକୁ ଦେଖି ସ୍ଥାନୀୟ ଲୋକେ ସନ୍ଦେହ କରିବା ସହ ମାନସଙ୍କୁ ଅଟକ ରଖି ପିଲାଟିକୁ ଉଦ୍ଧାର କରିଥିଲେ ।

ପରେ ଏନେଇ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଶିଶୁକନ୍ୟାର ମୃତଦେହ ଶବବ୍ୟବଚ୍ଛେଦ ହୋଇଛି । ଅନ୍ୟପଟେ ସ୍ବାସ୍ଥ୍ୟ ଅଧିକାରୀ କହିଛନ୍ତି ପିଲାଟି ଡିସଚାର୍ଜ ବେଳେ ସୁସ୍ଥ ଥିଲା ।

ପୋଲିସ ଅଭିଯୁକ୍ତ ବାପାକୁ ଅଟକ ରଖିଛି । ସ୍ଥାନୀୟ ଲୋକଙ୍କ ଅଭିଯୋଗ ଆଧାରରେ କଳିଙ୍ଗନଗର ପୋଲିସ ତଦନ୍ତ କରୁଛି । ତେବେ ଆଗକୁ ପ୍ରକୃତ ଘଟଣାର ସତ୍ୟାସତ୍ୟ ସାମ୍ନାକୁ ଆସିବ ବୋଲି ପୋଲିସ କହିଛି ।