From Jail to Crime Again: ଜେଲ୍ ଫେରନ୍ତା ଅପରାଧୀର ରାକ୍ଷସ ମନୋବୃତ୍ତି: ଅଷ୍ଟ୍ରେଲୀୟ ଖେଳାଳିଙ୍କୁ ଅସଦାଚରଣ କରିଥିବା ନାଇଟ୍ରାର ଅପରାଧ ରେକର୍ଡ

ସେ ଧଳା ସାର୍ଟ, ଜିନ୍ସ ଏବଂ କଳା ଟୋପି ପିନ୍ଧି ଜଣେ ସାଧାରଣ ଯୁବକ ପରି ଦେଖାଯାଉଥିଲା, କିନ୍ତୁ ଏହି ମୁହଁ ପଛରେ ଜଣେ ଭୟଙ୍କର ଅପରାଧୀ ଲୁଚି ରହିଥିଲା । ତା’ର ନାମ ପୋଲିସ ଫାଇଲରେ ଜଣେ କୁଖ୍ୟାତ ଅପରାଧୀ ଭାବରେ ରହିଛି। ଇନ୍ଦୋରର ଖଜରାନା ଅଞ୍ଚଳର ବାସିନ୍ଦା ୨୯ ବର୍ଷୀୟ ଆକିଲ ଓରଫ 'ନାଇଟ୍ରା' ସ୍ପଷ୍ଟ ଦିବାଲୋକରେ ଅଷ୍ଟ୍ରେଲୀୟ ମହିଳା କ୍ରିକେଟ ଦଳର ଦୁଇ ଖେଳାଳିଙ୍କୁ ଅସଦାଚରଣ କରିଥିଲା, ଯାହା କେବଳ ଇନ୍ଦୋରର ନୁହେଁ ବରଂ ସମଗ୍ର ଦେଶର ଅନ୍ତର୍ଜାତୀୟ ପ୍ରତିଷ୍ଠାକୁ କଳଙ୍କିତ କରିଥିଲା।

ପୋଲିସ ତାକୁ କିପରି ଗିରଫ କଲା?

ଯେତେବେଳେ ଅକିଲ ଓରଫ ନାଇଟ୍ରା ୨୩ ଅକ୍ଟୋବର ସକାଳେ ବାଇକ୍ ଚଲାଇ ଯାଉଥିଲା, ତା ମୁହଁ ଚିନ୍ତାମୁକ୍ତ ଥିଲା। କିନ୍ତୁ କିଛି ଘଣ୍ଟା ପରେ ଯେତେବେଳେ ପୋଲିସ ତାକୁ ଧରିଲା, ସେ ଭୟରେ ଥରୁଥିଲା। ୬ ଘଣ୍ଟା ପରେ ତାଙ୍କ ଗିରଫଦାରୀ ପୋଲିସକୁ ଆଶ୍ୱସ୍ତି ଦେଇଥିଲା, କିନ୍ତୁ ଏହା ଇନ୍ଦୋରର ସୁରକ୍ଷା ବ୍ୟବସ୍ଥା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି କରିଥିଲା। ଏହି ଅଭିଯୁକ୍ତ ପେସାରେ ଜଣେ ପେଣ୍ଟର ଏବଂ ତାର ବାପାମାଆ ଶ୍ରମିକ ।

ତା ନାମରେ ଗଣଦୁଷ୍କର୍ମ, ଡକାୟତି ଏବଂ ହତ୍ୟା ଉଦ୍ୟମ ଭଳି ୧୦ଟି ଅପରାଧିକ ମାମଲା ଥିଲା। ଖଜରାନା ପୋଲିସ ଷ୍ଟେସନରେ ୪ଟି ମାମଲା ରୁଜୁ ହୋଇଥିଲା ଏବଂ ବାକି ମାମଲା ଆଜାଦ ନଗରରେ ରୁଜୁ ହୋଇଥିଲା । ସେ ଗତ କିଛି ମାସ ଧରି ସେଠାରେ ରହୁଥିଲା। ସେ ସ୍ଥାନୀୟ ଅଞ୍ଚଳରେ "ନାଇଟ୍ରା" ନାମରେ ଜଣାଶୁଣା ଥିଲା । 

ଘଟଣାଟି କେବେ ଘଟିଥିଲା?

ସୂଚନା ଅନୁଯାୟୀ, ଦୁଇ ବିଦେଶୀ କ୍ରିକେଟର ଖଜରାନା ରୋଡରେ ଥିବା ଏକ କାଫେ ଆଡକୁ ଚାଲିଯାଉଥିବା ସମୟରେ ନାଇଟ୍ରା ସେମାନଙ୍କ ପାଖକୁ ଆସିଲା। ସେ ସେଲଫି ନେବାର ଅଭିନୟ କଲା। ସେ ତୁରନ୍ତ ତାଙ୍କ ବାଇକ୍ ବୁଲାଇ ପଳାଇଗଲା, କିନ୍ତୁ କିଛି ମିନିଟ୍ ପରେ ଫେରି ଆସି ଅନ୍ୟ ଜଣେ ଅଷ୍ଟ୍ରେଲୀୟ ଖେଳାଳିଙ୍କୁ ଅସଦାଚରଣ କଲା ଏବଂ ତା’ପରେ ପଳାଇଗଲା।

ଉଭୟ ଖେଳାଳି ଭୟଭୀତ ହୋଇଗଲେ। ସେମାନେ ତୁରନ୍ତ ଦଳର ସୁରକ୍ଷା ପରିଚାଳକ ଡାନି ସିମନ୍ସଙ୍କୁ ଏକ SOS ଆଲର୍ଟ ପଠାଇ ଏକ "ଲାଇଭ୍ ଲୋକେସନ୍" ପଠାଇଲେ। ଅଭିଯୋଗ ପାଇବା ପରେ, ଇନ୍ଦୋର ପୋଲିସ ଅପରେସନ୍ ଆରମ୍ଭ କଲା। ପାଞ୍ଚଟି ପୋଲିସ ଷ୍ଟେସନ୍: ଖଜରାନା, MIG, ବିଜୟ ନଗର, ରାଜେନ୍ଦ୍ର ନଗର ଏବଂ ବାଣଗଙ୍ଗାରେ ଏକକାଳୀନ ସର୍ଚ୍ଚ ଅପରେସନ ଆରମ୍ଭ କରିଥିଲା ପୋଲିସ ।  ବିଭିନ୍ନ ସ୍ଥାନରେ CCTV ଫୁଟେଜ୍ ସ୍କାନ୍ କରାଯାଇଥିଲା । ତାର ବାଇକ୍ ଚିହ୍ନଟ କରାଯାଇଥିଲା ଏବଂ ଛଅ ଘଣ୍ଟା ଧରି ହାଇ-ଭୋଲଟେଜ୍ ପିଛା କରାଯାଇଥିଲା।

ନାଇଟ୍ରା ଜଣେ ଅଭ୍ୟାସଗତ ଅପରାଧୀ

ପୋଲିସ ରେକର୍ଡ ଅନୁଯାୟୀ, ଆକିଲର ଅପରାଧ ନୂଆ ନୁହେଁ। ସେ ଜଣେ କୁଖ୍ୟାତ ଏବଂ ଅଭ୍ୟାସଗତ ଅପରାଧୀ, ତା ବିରୁଦ୍ଧରେ ଦୁଷ୍କର୍ମ, ଡକାୟତି, ଆକ୍ରମଣ ଏବଂ ହତ୍ୟା ଉଦ୍ୟମ ଆଦି ୧୦ଟି ଗୁରୁତର ମାମଲା ରହିଛି। ଖଜରାନା ପୋଲିସ ଷ୍ଟେସନରେ ୪ଟି ମାମଲା ରୁଜୁ ହୋଇଛି। ପୋଲିସ ଚାପ ବଢ଼ିବା ପରେ ସେ ଆଜାଦ ନଗର ଅଞ୍ଚଳରେ ରହିବା ଆରମ୍ଭ କରିଥିଲା। ଗତ ବର୍ଷ ଜେଲରୁ ପାରୋଲରେ ଆସି ସେ ଦମ୍ପତିଙ୍କୁ ଛୁରୀରେ ଆକ୍ରମଣ କରିଥିଲା ଏବଂ ମହିଳାଙ୍କୁ ଦୁଷ୍କର୍ମ କରିବାକୁ ଉଦ୍ୟମ କରିଥିଲା।

ଅନ୍ୟ ଏକ ଘଟଣାରେ, ସେ ଉଜ୍ଜୟିନୀରେ ପୋଲିସ କର୍ମଚାରୀଙ୍କ ଠାରୁ ଏକ ରାଇଫଲ୍ ଛଡ଼ାଇ ନେଇ ସେମାନଙ୍କ ଉପରେ ଗୁଳି ଚଳାଇବାକୁ ଚେଷ୍ଟା କରିଥିଲା। ସେ ଭୈରବଗଡ଼ ଜେଲରେ ୧୦ ବର୍ଷର ଜେଲ ଦଣ୍ଡ ଭୋଗିଥିଲା ଏବଂ ମାତ୍ର ଚାରି ମାସ ପୂର୍ବରୁ ମୁକ୍ତ ହୋଇଥିଲା। ତଥାପି ସେ ତାର ଅପରାଧ ପ୍ରବୃତ୍ତିକୁ ଛାଡିନଥିଲା ।  ଅନ୍ତର୍ଜାତୀୟ ଖେଳାଳିଙ୍କୁ ଦେଖି ଟାର୍ଗେଟ କରିଥିଲା।

ସୁରକ୍ଷା ଦାୟିତ୍ୱରେ ଥିବା ଡାନି ସିମନ୍ସ ମାମଲା ରୁଜୁ କରିଛନ୍ତି

ଅଷ୍ଟ୍ରେଲିଆ ଦଳର ସୁରକ୍ଷା ଦାୟିତ୍ୱରେ ଥିବା ଡାନି ସିମନ୍ସ MIG ପୋଲିସ ଷ୍ଟେସନରେ ଏକ ଅଭିଯୋଗ ଦାଖଲ କରିଛନ୍ତି। ଅଭିଯୋଗ ଆଧାରରେ, ଭାରତୀୟ ଦଣ୍ଡ ସଂହିତା (IPC)ର ଧାରା 74 ଏବଂ 78 ଅନୁଯାୟୀ ଏକ ମାମଲା ରୁଜୁ କରାଯାଇଛି। ଅତିରିକ୍ତ ଡେପୁଟି କମିଶନର ଅଫ୍ ପୋଲିସ (ଅପରାଧ) ରାଜେଶ ଦଣ୍ଡୋଟିଆ କହିଛନ୍ତି, "ଅଷ୍ଟ୍ରେଲୀୟ ଦଳର ସୁରକ୍ଷା ଦାୟିତ୍ୱରେ ଥିବା ବ୍ୟକ୍ତିଙ୍କ ଅଭିଯୋଗ ଆଧାରରେ ମାମଲା ରୁଜୁ କରାଯାଇଛି। ଅଭିଯୁକ୍ତ ନାଇଟ୍ରା ବିରୋଧରେ ପୂର୍ବରୁ ଅନେକ ମାମଲା ରହିଛି। ତାକୁ ଅପରାଧ ଘଟାଇବାର ଛଅ ଘଣ୍ଟା ମଧ୍ୟରେ ଗିରଫ କରାଯାଇଛି।"

ଏହି ଘଟଣା ସାରା ରାଜ୍ୟରେ ଉତ୍ତେଜନା ସୃଷ୍ଟି କରିଥିଲା। ମଧ୍ୟପ୍ରଦେଶ କ୍ରୀଡା ମନ୍ତ୍ରୀ ବିଶ୍ୱାସ ସାରଙ୍ଗ କହିଛନ୍ତି, "ଏହି ଘଟଣା ଅତ୍ୟନ୍ତ ଲଜ୍ଜାଜନକ। ଅଭିଯୁକ୍ତକୁ ଗିରଫ କରାଯାଇଛି, ଏବଂ ପ୍ରଶାସନ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ତାଙ୍କୁ ଏପରି ଦଣ୍ଡ ଦିଆଯିବ ଯାହା ଅନ୍ୟମାନଙ୍କ ପାଇଁ ଉଦାହରଣ ହେବ।" ବିଜେପି ବିଧାୟକ ରାମେଶ୍ୱର ଶର୍ମା କହିଛନ୍ତି, "ତା ବିରୋଧରେ ଜାତୀୟ ସୁରକ୍ଷା ଆଇନ (NSA) ଅନୁଯାୟୀ ମାମଲା ରୁଜୁ କରାଯିବ । ଝିଅ ଅଷ୍ଟ୍ରେଲିଆର ହେଉ କିମ୍ବା ଇଂଲଣ୍ଡର, ସେମାନଙ୍କ ସୁରକ୍ଷା ଆମର ଦାୟିତ୍ୱ।"