Fake Doctor Busted: ବିଏ ସ୍ନାତକ ନିଜକୁ ସର୍ଜନ ବୋଲି ପରିଚୟ ଦେଇ ଚଲାଉଥିଲେ ବେଆଇନ କ୍ଲିନିକ୍, ମହିଳାଙ୍କ ମୃତ୍ୟୁ ପରେ ଗିରଫ

ପୋଲିସ ଆମ୍ବେଦକର ନଗରର ବାସଖାରୀ ଅଞ୍ଚଳରେ ନିଜକୁ ସର୍ଜନ ଭାବରେ ପରିଚୟ ଦେଇ ଏକ ଅନଧିକୃତ କ୍ଲିନିକ୍ ଚଲାଇବା ଏବଂ ଜଣେ ମହିଳାଙ୍କ ମୃତ୍ୟୁ ଘଟାଇବା ଅଭିଯୋଗରେ ଜଣେ ୩୨ ବର୍ଷୀୟ କଳା ସ୍ନାତକ (ବିଏ) ଏବଂ ତାଙ୍କ ୧୯ ବର୍ଷୀୟ ସହଯୋଗୀଙ୍କୁ ଗିରଫ କରିଛି । 

ଟାଣ୍ଡା ସର୍କଲ ଅଫିସର ଶୁଭମ କୁମାରଙ୍କ ଅନୁଯାୟୀ, ଅଭିଯୁକ୍ତ ଯୋଗେଶ ବର୍ମା ଏବଂ ଶୁଭମ ବିଶ୍ୱକର୍ମା ଗତ କିଛି ବର୍ଷ ଧରି ଆଜମଗଡ଼ ରୋଡରେ ନବଜୀବନ କ୍ଲିନିକ୍ ପରିଚାଳନା କରୁଥିଲେ । କ୍ଲିନିକ ପାଇଁ ସ୍ୱାସ୍ଥ୍ୟ କର୍ତ୍ତୃପକ୍ଷଙ୍କ ଠାରୁ ପଞ୍ଜିକରଣ କିମ୍ବା ଅନୁମୋଦନ ନଥିଲା । କୌଣସି ସ୍ୱୀକୃତିପ୍ରାପ୍ତ ଡାକ୍ତରୀ ଯୋଗ୍ୟତା କିମ୍ବା ଶଲ୍ୟଚିକିତ୍ସା ତାଲିମ ନଥିବା ସତ୍ତ୍ୱେ ପୂର୍ଣ୍ଣାଙ୍ଗ ହସ୍ପିଟାଲ ଭାବରେ କାର୍ଯ୍ୟ କରୁଥିଲା ।  ଏହି କ୍ଲିନିକରେ ମହିଳାଙ୍କ ସିଜରିଆନ କରାଯାଉଥିଲା । 

ବେଆଇନ ଅସ୍ତ୍ରୋପଚାର ସାମ୍ନାକୁ ଆସିଥିଲା

କୁମାର କହିଛନ୍ତି ଯେ ଫେବୃଆରୀ ୫ ତାରିଖରେ କ୍ଲିନିକ୍ରେ ସିଜରିଆନ୍ ପରେ ଜଣେ ୨୮ ବର୍ଷୀୟା ଗର୍ଭବତୀ ମହିଳାଙ୍କ ମୃତ୍ୟୁ ହେବା ପରେ ଏହି ବେଆଇନ ଅସ୍ତ୍ରୋପଚାର ସାମ୍ନାକୁ ଆସିଥିଲା। ଯଦିଓ ମହିଳା ଜଣକ ପ୍ରକ୍ରିୟା ସମୟରେ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ, ଅତ୍ୟଧିକ ରକ୍ତସ୍ରାବ ଯୋଗୁଁ ତାଙ୍କ ଅବସ୍ଥା ଖରାପ ହୋଇଥିଲା ଏବଂ ପରେ ତାଙ୍କର ମୃତ୍ୟୁ ହୋଇଥିଲା।

ପ୍ରାଥମିକ ତଦନ୍ତରୁ ଜଣାପଡିଛି ଯେ ବର୍ମା, ଯାହାଙ୍କର ସର୍ବୋଚ୍ଚ ଯୋଗ୍ୟତା ବିଏ ଡିଗ୍ରୀ, ସେ ଅସ୍ତ୍ରୋପଚାର କରିଥିଲେ ।  ବିଶ୍ୱକର୍ମା ତାଙ୍କୁ ସହାୟତା କରିଥିଲେ। ଅଭିଯୁକ୍ତମାନଙ୍କ ମଧ୍ୟରୁ କାହାରି କୌଣସି ଆନୁଷ୍ଠାନିକ ଡାକ୍ତରୀ ତାଲିମ ନଥିଲା ବୋଲି ଜଣେ ଅଧିକାରୀ କହିଛନ୍ତି।

ସ୍ୱାସ୍ଥ୍ୟ ବିଭାଗ ଦ୍ୱାରା ପରବର୍ତ୍ତୀ ଯାଞ୍ଚରୁ ଜଣାପଡ଼ିଛି ଯେ କ୍ଲିନିକ୍ ଚିକିତ୍ସା ମାନଦଣ୍ଡର ଘୋର ଉଲ୍ଲଂଘନ କରାଯାଇଥିଲା । ବୈଧ ପଞ୍ଜୀକରଣ ବିନା କାର୍ଯ୍ୟ କରୁଥିଲା କ୍ଲିନିକ। ପରେ ପରିସରକୁ ସିଲ୍ କରାଯାଇଥିଲା ଏବଂ ଏକ ଅପରାଧିକ ମାମଲା ପଞ୍ଜିକୃତ କରାଯାଇଥିଲା ବୋଲି କୁମାର କହିଛନ୍ତି।

ପଚରାଉଚରା ସମୟରେ ଅଭିଯୁକ୍ତ ଜଣକ ଅନଧିକୃତ ପ୍ରତିଷ୍ଠାନରେ ଚିକିତ୍ସା ପ୍ରକ୍ରିୟା କରିଥିବା ସ୍ୱୀକାର କରିଥିବା ଜଣାପଡ଼ିଛି। ଉଭୟଙ୍କୁ କୋର୍ଟରେ ହାଜର କରାଯାଇ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅନ୍ୟ ଘରୋଇ କ୍ଲିନିକର ପଞ୍ଜୀକରଣ ଯାଞ୍ଚ କରାଯାଉଥିବା ସ୍ୱାସ୍ଥ୍ୟ ବିଭାଗର ଜଣେ ଅଧିକାରୀ କହିଛନ୍ତି । ଏହି ଘଟଣା ଉତ୍ତରପ୍ରଦେଶର ।