Bribe Scandal Unfolds: ଜଣେ କିରାଣି ୧୫ ଲକ୍ଷ ଲାଞ୍ଚ ନେଉଥିବା ବେଳେ ଧରାପଡ଼ିଲେ, ଜଜଙ୍କ ବିରୋଧରେ ବି ଏତଲା ରୁଜୁ କଲା ACB

ମୁମ୍ବାଇ ଦୁର୍ନୀତି ନିବାରଣ ବ୍ୟୁରୋ (Anti-Corruption Bureau) ଜଣେ ସେସନ୍ସ କୋର୍ଟ ବିଚାରପତିଙ୍କୁ ଏକ ୱାଣ୍ଟେଡ୍ ଅଭିଯୁକ୍ତ ଘୋଷଣା କରିଛି। ACB ବିଚାରପତିଙ୍କ କ୍ଲର୍କଙ୍କୁ ୧୫ ଲକ୍ଷ ଟଙ୍କା ଲାଞ୍ଚ ଗ୍ରହଣ କରିବା ସମୟରେ ଗିରଫ କରିଛି।

କ୍ଲର୍କ ଜଣକ ଏକ ମାମଲା ସମ୍ପର୍କରେ ଜଣେ ବ୍ୟବସାୟୀଙ୍କଠାରୁ ୨୫ ଲକ୍ଷ ଟଙ୍କା ଦାବି କରିଥିବା ଅଭିଯୋଗ ହୋଇଛି। ACB ଅନୁଯାୟୀ, କ୍ଲର୍କ କହିଛନ୍ତି ଯେ ୧୦ ଲକ୍ଷ ଟଙ୍କା ତାଙ୍କ ପାଇଁ ଏବଂ ୧୫ ଲକ୍ଷ ଟଙ୍କା ବିଚାରପତିଙ୍କ ପାଇଁ। ଆଲୋଚନା ପରେ ଚୂଡ଼ାନ୍ତ ଲାଞ୍ଚ ପରିମାଣ ୧୫ ଲକ୍ଷ ଟଙ୍କାରେ ଛିଡିଥିବା ଜଣାପଡ଼ିଛି। ACB ଏବେ ସେସନ୍ସ କୋର୍ଟ ବିଚାରପତି ଏବଂ କ୍ଲର୍କ ଉଭୟଙ୍କ ବିରୁଦ୍ଧରେ ଏକ FIR ରୁଜୁ କରିଛି।

ଘଟଣାଟି କ’ଣ?

ଗଣମାଧ୍ୟମ ରିପୋର୍ଟ ଅନୁଯାୟୀ, ସମ୍ପୂର୍ଣ୍ଣ ମାମଲାଟି ଏକ ଜମି ହଡ଼ପ ସହିତ ଜଡିତ। ମୁମ୍ବାଇ ବାନ୍ଦ୍ରାର ଜଣେ ବ୍ୟବସାୟୀଙ୍କ ପତ୍ନୀ ଅଭିଯୋଗ କରିଥିଲେ ଯେ ତାଙ୍କ ଜମି ଉପରେ କେହି ଜଣେ ଜବରଦଖଲ କରିଛନ୍ତି। ସେ ୨୦୧୫ ମସିହାରେ ବମ୍ବେ ହାଇକୋର୍ଟରେ ଏକ ପିଟିସନ୍ ଦାୟର କରିଥିଲେ। କିନ୍ତୁ, ଜମିର ମୂଲ୍ୟ ୧୦ କୋଟି ଟଙ୍କାରୁ  କମ୍ ହୋଇଥିବାରୁ ହାଇକୋର୍ଟ ମାର୍ଚ୍ଚ ୨୦୨୪ରେ ମାମଲାଟିକୁ ମାଜଗାଓଁ ସେସନ୍ସ କୋର୍ଟକୁ ପଠାଇ ଦେଇଥିଲେ।

ରିପୋର୍ଟରେ ACBକୁ ଉଦ୍ଧୃତ କରି କୁହାଯାଇଛି ଯେ ଏହି ମାମଲାର ଶୁଣାଣି ୯ ସେପ୍ଟେମ୍ବର ୨୦୨୫ରେ ସେସନ୍ସ କୋର୍ଟରେ ହୋଇଥିଲା। ଏହା ପରେ ଅତିରିକ୍ତ ସେସନ୍ସ ଜଜ୍ ଏଜାଜୁଦ୍ଦିନ୍ ଏସ୍. କାଜିଙ୍କ କ୍ଲର୍କ ଚନ୍ଦ୍ରକାନ୍ତ ବାସୁଦେବ ବ୍ୟବସାୟୀଙ୍କୁ ଚେମ୍ବୁରର ଏକ କାଫେକୁ ଡକାଇଥିଲେ। ACB ଅନୁଯାୟୀ, କ୍ଲର୍କ ବ୍ୟବସାୟୀଙ୍କୁ କହିଥିଲେ, ଯଦି ସପକ୍ଷରେ ରାୟ ଚାହୁଁଛ  ତେବେ ତୁମକୁ ୨୫ ଲକ୍ଷ ଟଙ୍କା ଦେବାକୁ ପଡିବ । ବ୍ୟବସାୟୀ ଜଣକ ଉତ୍ତର ଦେଇଥିଲେ ଯେ ସେ ସେହି ପରିମାଣ ଅର୍ଥ ଦେବାକୁ ଅସମର୍ଥ। ଏହା ପରେ ବ୍ୟବସାୟୀ ଜଣକ ଚିନ୍ତାରେ ପଡିଯାଇଥିଲେ । 

ACB ଏକ ଜାଲ ବିଛାଇଥିଲା

ଏସିବି ଅନୁଯାୟୀ, କ୍ଲର୍କ ବାସୁଦେବ ବ୍ୟବସାୟୀଙ୍କଠାରୁ ବାରମ୍ବାର ଲାଞ୍ଚ ଦାବି କରୁଥିଲେ। ଏହା ପରେ ବ୍ୟବସାୟୀ ନଭେମ୍ବର ୧୦ ତାରିଖରେ ମୁମ୍ବାଇ ଏସିବିର ୱର୍ଲି କାର୍ଯ୍ୟାଳୟରେ ଏକ ଅଭିଯୋଗ ଦାଖଲ କରିଥିଲେ। ଏସିବି କହିଛି ଯେ ଅଭିଯୋଗ ଯାଞ୍ଚ କରିବା ପରେ, ବିଚାରପତିଙ୍କ କ୍ଲର୍କଙ୍କୁ ଧରିବା ପାଇଁ ଜାଲ ବିଛାଯାଇଥିଲା। ନଭେମ୍ବର ୧୧ ତାରିଖରେ ତାଙ୍କୁ ଟଙ୍କା ନେବାକୁ ଡକାଯାଇଥିଲା ଏବଂ ତାଙ୍କୁ ୧୫ ଲକ୍ଷ ଟଙ୍କା ଗ୍ରହଣ କରିବା ସମୟରେ ଧରାଯାଇଥିଲା । ଏସିବି ଅନୁଯାୟୀ, ଟଙ୍କା ପାଇବା ପରେ, କ୍ଲର୍କ ବିଚାରପତିଙ୍କୁ ମଧ୍ୟ ଫୋନ୍ କରି ଜଣାଇଥିଲେ ଯେ ସେ ଟଙ୍କା ପାଇଛନ୍ତି।