ଆସ ଜିରୋ ନେଟଓ୍ୱାର୍କ ଏରିଆରେ ପିକନିକ୍ କରିବା.. ମୋବାଇଲ ନେଟଓ୍ୱାର୍କଠୁ ଦୂରରେ ଦିନ କାଟିବା

ଦିନ କେଇଟା ପରେ ୨୦୨୩ ବର୍ଷ ସରି ୨୪ ଆରମ୍ଭ ହେବ । ସାଙ୍ଗସାଥୀ, ପରିବାର ହୁଅନ୍ତୁ କି ସହକର୍ମୀ.. ପିକନିକ୍ ପାଇଁ ଏଇ ସମୟରେ ଆପଣମାନେ ଚିନ୍ତା କରୁଥିବେ ନିଶ୍ଚୟ । ତେବେ ଆଜି ଆମେ ଆପଣଙ୍କୁ ଏମିତି ଏକ ଜାଗା ଦେଖାଇବୁ ଯାହାର ପରିବେଶ ଆଉ ପ୍ରାକୃତିକ ସୌନ୍ଦର୍ଯ୍ୟ ଆପଣଙ୍କୁ ଥରେ ଏଇଠିକୁ ବୁଲିଆସିବାକୁ ବାଧ୍ୟ କରିଦେବ । ତାହେଲେ ଆପଣ ମନସ୍ଥିର କରିନିଅନ୍ତୁ ଏଇଥର ଶିତ ଦିନିଆ ବୁଲାବୁଲି ପାଇଁ ଆପଣ ଏଇ ଜାଗାକୁ ଆସିବେ ।

ଏଠି ସକାଳର ସୁନେଲି କିରଣ ଛାଇଯାଏ ପ୍ରାକୃତିକ ଶୋଭାରଣୀ ଗର୍ଭରୁ ବୋହିଯାଇଥିବା ଜଳ ରାଶି ଉପରେ । ପଥର ଉପରେ ବାରମ୍ବାର ବାଡେଇ ପିଟି ହୁଏ କାଚବିନ୍ଦୁ ଭଳି ନିର୍ମଳ ଜଳରାଶି । ଆଃ କି ସୁନ୍ଦର ଏଇ ପ୍ରକୃତି । ଆଉ ଜଙ୍ଗଲିଆ ଚଢେଇଙ୍କ କିଚିରି ମିଚିରି ଶବ୍ଦ ମନକୁ ଯେମିତି ବାନ୍ଧି ନେଉଛି । ଆମମାନଙ୍କର ବ୍ୟସ୍ତବହୁଳ ଜୀବନରୁ ଦୂରେଇ, ସ୍ମାର୍ଟଫୋନ୍ ଆଉ ସୋସିଆଲ ମିଡିଆକୁ ବାଏ କହିଦେଇ, ବିଲକୁଲ ନେଟୱର୍କ ନଥିବା ଏଇ ଜାଗାରେ କେଇ କ୍ଷଣ ପାଇଁ ହେଉ ପଛେ ଜୀବନ ଜୀଇଁଯିବା । ଆମେ କହୁଛୁ ମୟୁରଭଞ୍ଜ ଜିଲ୍ଲା ଶିମିଳିପାଳ ପାଦ ଦେଶରେ ଅବସ୍ଥିତ ପର୍ଯ୍ୟଟନସ୍ଥଳୀ ଲୁଲୁଙ୍ଗ କଥା ।

ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଲୁଲୁଙ୍ଗର ସମୟ ବିତାଇବାକୁ ଦୂରଦୂରାନ୍ତରୁ ଧାଇଁ ଆସୁଛନ୍ତି ପର୍ଯ୍ୟଟକ..ବାରିପଦା ସହର ଠାରୁ ୨୦ କିଲୋମିଟର ଦୂରରେ ଶିମିଳିପାଳ ପାଦ ଦେଶରେ ଅବସ୍ଥିତ ପିକନିକ୍ ସ୍ପଟ୍ ଲୁଲୁଙ୍ଗ ବେଶ ଲୋକପ୍ରିୟ..ଘଞ୍ଚ ଅରଣ୍ୟ ଓ ପାହାଡ଼ ଭିତରୁ ବୋହି ଆସିଛି ପଳାପଲ ନଦୀ ଯାହାକି ଲୋକଙ୍କୁ ବେଶ ଆକୃଷ୍ଟ କରେ । ଶୀତ ଋତୁ ଆସିଲେ ରାଜ୍ୟ ଓ ରାଜ୍ୟ ବାହାରୁ ଅନେକ ପର୍ଯ୍ୟଟକ ପରିବାର ସହ ଆସି ପହଞ୍ଚିନ୍ତି ଲୁଲୁଙ୍ଗଠାରେ ।

ପଳପଳା ନଦୀର କୂଳେ କୂଳେ ଛୋଟ ଚୋର ଚିକ୍କଣ ଗଲିଆ ପଥର ଗାଲିଚାରେ ବଣଭୋଜିର ଆସାରା ଜମେ.. ଯୁବଗୋଷ୍ଠୀ ଜଙ୍ଗଲର ଥଣ୍ଡା ପାଣିରେ ଗାଧୋଇବାର ମଜା ନିଅନ୍ତି । ପୁଣି କିଏ ପ୍ରାକୃତିକ ସୌନ୍ଦର୍ଯ୍ୟ ସହ ସେଲଫି ଟିଏ ନେଇ ନିଜ ସ୍ମୃତିକୁ ମୋବାଇଲ କ୍ୟାମେରାରେ କଏଦ କରେ ।

ଦୁଃଖର ବିଷୟ, କିଛି ଅସାମାଜିକଙ୍କ ପାଇଁ ଲୁଲୁଙ୍ଗର ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ହେବାସହ ପର୍ଯ୍ୟଟକଙ୍କ ମନକୁ ଆଘାତ ପହଞ୍ଚିଛି.. ଭଙ୍ଗା କାଚ ବୋତଲ ଓ ଆବର୍ଜନା ଏଣେ ତେଣେ ଫୋପାଡି ପରିବେଶକୁ ନଷ୍ଟ କରୁଛନ୍ତି । ଅନ୍ୟପଟେ ପର୍ଯ୍ୟଟନ କ୍ଷେତ୍ର ଲୁଲୁଙ୍ଗଠାରେ ନା ପିଇବା ପାଣିର ସୁବିଧା ଅଛି ଆଉ ନା ଆଶ୍ରୟ ପିଣ୍ଡିର ବ୍ୟବସ୍ଥା କରିଛି ପ୍ରଶାସନ ।