ରାଜଧାନୀର ସର୍ବାଧିକ ବ୍ୟସ୍ତବହୁଳ ଜୟଦେବ ବିହାର ଛକରୁ ନନ୍ଦନକାନନ ରାସ୍ତାରେ ନିର୍ମାଣ ହେବ ତିନି ଥାକିଆ ଏଲିଭେଟେଡ୍ ରୋଡ୍ । ଆସନ୍ତା ମାସରୁ ନାଗପୁର ସହର ଢାଞ୍ଚାରେ, ଏହି କରିଡର୍ କାମ ଆରମ୍ଭ ହେବ । ଏହି ସୂଚନା ଦେଇ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି- ତଳେ ୬ ଲେନ୍, ଉପରେ ୪ ଲେନ୍ ରୋଡ୍ ରହିବ ଓ ଉପରେ ମେଟ୍ରୋ ଟ୍ରେନ୍ ଚାଲିବ । ଏଥିପାଇଁ ଜମି ଅଧିଗ୍ରହଣ ସମସ୍ୟା ରହିବନି ।
ସେପଟେ ମେଟ୍ରୋ ରେଳ ପ୍ରକଳ୍ପ ପାଇଁ ମଧ୍ୟ ରାଜ୍ୟ ସରକାର ତତ୍ପର ହୋଇଥିବା କହିଛନ୍ତି ନଗର ଉନ୍ନୟନମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ମନ୍ତ୍ରୀ କହିଛନ୍ତି ମେଟ୍ରୋ ପ୍ରକଳ୍ପ ପାଇଁ ଉଚ୍ଚସ୍ତରୀୟ କମିଟି ଗଠନ ହୋଇଛି ଓ କମିଟି ମେଟ୍ରୋ ଟ୍ରେନ୍ ଚଳାଚଳ କରୁଥିବା ବିଭିନ୍ନ ସହରକୁ ଯାଇ ସେଠିକା ଡିଜାଇନ୍ ଅନୁଧ୍ୟାନ କରୁଛନ୍ତି ।
Also Read
ଜୟଦେବ ବିହାରରୁ ନନ୍ଦନକାନନ, କ୍ୟାପିଟାଲ ସିଟିର ସର୍ବାଧିକ ବ୍ୟସ୍ତବହୁଳ ରାସ୍ତାରେ ଗାଡ଼ି ଭିଡ଼ କମାଇବାକୁ ଏଲିଭେଟେଡ୍ ରୋଡ୍ ଯୋଜନା ଖୁବଶୀଘ୍ର ବାସ୍ତବ ରୂପ ନେବାକୁ ଯାଉଥିବା କହିଛନ୍ତି ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ମନ୍ତ୍ରୀ ବିସ୍ତୃତ ଭାବେ ବୁଝାଇ କହିଛନ୍ତି, ଜୟଦେବ ବିହାର-ନନ୍ଦନକାନନ ରାସ୍ତାରେ ଏବେ ସବୁଠୁ ଅଧିକ ଭିଡ଼ । ସକାଳ ୯ରୁ ରାତି ୧୧ ଯାଏଁ ଘଣ୍ଟା ଘଣ୍ଟା ଟ୍ରାଫିକ୍ ଜାମ୍ । ୧୫ କିଲୋମିଟର ବିଶିଷ୍ଟ ଏ ରାସ୍ତାକୁ ଅତିକ୍ରମ କରିବାକୁ ଲାଗିଯାଉଛି ଘଣ୍ଟାଏରୁ ଅଧିକ ସମୟ । ତେଣୁ ଏଲିଭେଟେଡ୍ ରୋଡ୍ ପ୍ଲାନ୍ ସାକାର କରିବାକୁ ମୁଖ୍ୟମନ୍ତ୍ରୀଙ୍କ ସ୍ବିକୃତୀ ମିଳିସାରିଛି । ଏହି ଡବଲ ଡେକର ବିଶିଷ୍ଟ ରୋଡ୍ରେ ତଳେ ୬ଲେନ୍ ବିଶିଷ୍ଟ ରାସ୍ତା ରହିବ । ତା’ଉପରେ ଫୋର ଲେନ୍ ରୋଡ୍ ନିର୍ମାଣ ହେବ ଓ ସବା ଉପରେ ଚାଲିବ ମେଟ୍ରୋ ଟ୍ରେନ୍ । ସବୁ ଛକରେ ରହିବ ସଂଯୋଗୀକରଣ ବାଇପାସ୍ ରାସ୍ତା ।
ଯୋଜନା ପାଇଁ ଖର୍ଚ୍ଚ ହେବ ୨୭ଶହ କୋଟି ଟଙ୍କା । ଏଥିଲାଗି ଡିପିଆର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି ଓ ଏପ୍ରିଲ ଶେଷ ସୁଦ୍ଧା କାମ ଆରମ୍ଭ ଯୋଜନା ଥିବା ମନ୍ତ୍ରୀ ସୂଚନା ଦେଇଛନ୍ତି । ଏଥିପାଇଁ ଜମି ଅଧିଗ୍ରହଣ ଭଳି ସମସ୍ୟା ଆଦୌ ରହିବ ନାହିଁ ବୋଲି କହିଛନ୍ତି ମନ୍ତ୍ରୀ । ସର୍ବାଧିକ ବ୍ୟସ୍ତବହୁଳ ଜୟଦେବ ବିହାରରୁ ନନ୍ଦନକାନନ ରାସ୍ତାରେ ଏଲିଭେଟେଡ୍ ରୋଡ୍ ନିର୍ମାଣ କଥା ଶୁଣି ଖୁସି ହୋଇଛନ୍ତି ରାଜଧାନୀ ବାସିନ୍ଦା । କହିଛନ୍ତି ଏ ରାସ୍ତା କଟକକୁ ମଧ୍ୟ ସଂଯୋଗ କରୁଛି । ତେଣୁ ଏଲିଭେଟେଡ୍ ନିର୍ମାଣ କାର୍ଯ୍ୟ ଧାର୍ଯ୍ୟ ସମୟରେ ସରିବା ଉଚିତ ।
ଅପରପକ୍ଷେ ଭୁବନେଶ୍ବରରୁ ଗାଡ଼ି ଭିଡ଼ କମାଇବାକୁ ଏଲିଭେଟେଡ୍ ରାସ୍ତା ଭଳି ରିଂ ରୋଡ୍ ଓ ପାରାଲାଲ୍ ରୋଡ୍ କୁ ମଧ୍ୟ ସେତିକି ଗୁରୁତ୍ବ ଦିଆଯିବା ଦରକାର ବୋଲି ମତ ରଖିଛନ୍ତି ପୂର୍ବତନ ଯନ୍ତ୍ରୀ । ସେପଟେ ରାଜଧାନୀରେ ମେଟ୍ରୋ ରେଳ ପ୍ରକଳ୍ପ ପାଇଁ ମଧ୍ୟ ସରକାର ତତ୍ପର ହୋଇ ପଡ଼ିଥିବା କହିଛନ୍ତି ନଗର ଉନ୍ନୟନମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ମନ୍ତ୍ରୀ କହିଛନ୍ତି ମେଟ୍ରୋ କାମ ଆଗେଇ ଚାଲିଛି ଓ ଏଥିପାଇଁ ଉଚ୍ଚସ୍ତରୀୟ କମିଟି ଗଠନ ହୋଇଛି । କମିଟି ମେଟ୍ରୋ ଚଳାଚଳ କରୁଥିବା ବିଭିନ୍ନ ସହରକୁ ଯାଇ ସେଠିକାର ଡିଜାଇନ୍ ଅନୁଧ୍ୟାନ କରିଛନ୍ତି । ଅନ୍ୟପଟେ କ୍ୟାପିଟାଲ ରିଜନ ରିଂ ରୋଡ୍ ବା ସିଆରଆରରେ ରାଜଧାନୀର ଚତୁଃପାର୍ଶ୍ବରେ ରିଂ ରୋଡ୍ କାମ ପାଇଁ ଟେଣ୍ଡର ସରିଛି । ଖୁବଶୀଘ୍ର NHAI କାମ ଆରମ୍ଭ କରିବ ବୋଲି ସୂଚନା ଦେଇଛନ୍ତି ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ।