Sports: ବର୍ଡର-ଗାଭାସ୍କର ଟ୍ରଫିରେ ଫର୍ମକୁ ଫେରିବେ କି ରୋହିତ ଶର୍ମା

ଅଷ୍ଟ୍ରେଲିଆରେ ପିଙ୍କ୍ ବଲ୍‌ର ପ୍ରଥମ ପରୀକ୍ଷାରେ ଟିମ୍ ଇଣ୍ଡିଆ ପାସ୍ ହୋଇଛି । ଏହା କାନ୍‌ବେରା ଠାରେ ଖେଳାଯାଇଥିବା ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଏକାଦଶ ବିପକ୍ଷ ଏକ ଅଭ୍ୟାସ ମ୍ୟାଚ୍ ଥିଲା, ଯେଉଁଥିରେ ପିଙ୍କ୍ ବଲ୍‌ର ବ୍ୟବହାର କରାଯାଇଥିଲା ।

ଭାରତ ୬ ୱିକେଟ୍‌ରେ ଏହି ମ୍ୟାଚ୍ ଜିତିଥିଲା, କିନ୍ତୁ ଟିମ୍‌ର ଅଧିନାୟକ ରୋହିତ ଶର୍ମା ବ୍ୟାଟର୍ ଭାବେ ଫେଲ୍ ହୋଇଥିଲେ । ସେ ଘରେ ଖେଳାଯାଇଥିବା ପୂର୍ବ ଦୁଇ ଟେଷ୍ଟ ସିରିଜ୍‌ରେ ମଧ୍ୟ ବ୍ୟାଟିଂରେ ନିରାଶ କରିଥିଲେ । ଏହା ଏବେ ଟିମ୍ ପାଇଁ ଚିନ୍ତାର ବିଷୟ ହୋଇଛି ।

ଆଡିଲେଡ୍ ଓଭାଲ୍‌ରେ ଡିସେମ୍ବର ୬ରୁ ବର୍ଡର-ଗାଭାସ୍କର ଟ୍ରଫିର ଦ୍ୱିତୀୟ ଟେଷ୍ଟ ମ୍ୟାଚ୍ ଆରମ୍ଭ ହେବ, ଯାହା ଦିବା-ରାତ୍ର ମ୍ୟାଚ୍ ହେବ । ପୂର୍ବ ଗସ୍ତରେ ଭାରତୀୟ ଟିମ୍ ଏଠାରେ ପିଙ୍କ୍ ବଲ୍ ଟେଷ୍ଟ ହାରିଥିଲା । ଏପରି ସ୍ଥଳେ ପିଙ୍କ୍ ବଲ୍‌ରେ ପ୍ରସ୍ତୁତି ଦୃଷ୍ଟିରୁ ଏହି ଅଭ୍ୟାସ ମ୍ୟାଚ୍ ଖୁବ୍ ଗୁରୁତ୍ୱପୂର୍ଣ୍ଣ ଥିଲା ।

ଅଭ୍ୟାସ ମ୍ୟାଚ୍‌ରେ ଛୁଇଁପାରିଲେନି ଦୁଇ ଅଙ୍କ

ଦ୍ୱି-ଦିବସୀୟ ଅଭ୍ୟାସ ମ୍ୟାଚ୍‌ର ପ୍ରଥମ ଦିନର ଖେଳ ବର୍ଷା ଯୋଗୁଁ ଧୋଇ ହୋଇଯାଇଥିଲା । ଡିସେମ୍ବର ୧ରେ ଦ୍ୱିତୀୟ ଦିନର ଆରମ୍ଭରେ ମାତ୍ର ୫ ଓଭର୍ ପରେ ବର୍ଷା ହୋଇଥିଲା, ଯାହା ଫଳରେ ମ୍ୟାଚ୍ ୫୦ ପରିବର୍ତ୍ତେ ୪୬ ଓଭର୍ ବିଶିଷ୍ଟ ହୋଇଥିଲା ।

ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ପ୍ରଧାନମନ୍ତ୍ରୀ ଏକାଦଶ ୪୩.୨ ଓଭର୍‌ରେ ୨୪୦ ରନ୍ କରି ଅଲ୍‌ଆଉଟ୍ ହୋଇଯାଇଥିଲା । ଜବାବରେ ଭାରତୀୟ ଟିମ୍ ୪ ୱିକେଟ୍ ହରାଇ ୪୨.୫ ଓଭର୍‌ରେ ବିଜୟଲକ୍ଷ୍ୟ ହାସଲ କରିଥିଲା ।

ତେବେ ଏହା ଏକ ଅଭ୍ୟାସ ମ୍ୟାଚ୍ ହୋଇଥିବାରୁ ଭାରତ ପୂରା ୪୬ ଓଭର୍ ବ୍ୟାଟିଂ କରିଥିଲା ଏବଂ ୫ ୱିକେଟ୍ ହରାଇ ମୋଟ୍ ୨୫୭ ରନ୍ ସଂଗ୍ରହ କରିଥିଲା ।

ବର୍ଡର-ଗାଭାସ୍କର ଟ୍ରଫିରେ ଫର୍ମକୁ ଫେରିବେ କି ରୋହିତ ଶର୍ମା

ପର୍ଥରେ ଟେଷ୍ଟ ପଦାର୍ପଣ କରିଥିବା ଯୁବ ପେସର୍ ହର୍ଷିତ ରାଣା କାନ୍‌ବେରାରେ ମଧ୍ୟ ପ୍ରଭାବିତ କରିଥିଲେ । ସେ ଭାରତୀୟ ବୋଲର୍‌ଙ୍କ ମଧ୍ୟରେ ସର୍ବାଧିକ ୪ ୱିକେଟ୍ ନେଇଥିଲେ । ଅଙ୍ଗୁଳିରେ ଆଘାତ ଯୋଗୁଁ ପ୍ରଥମ ଟେଷ୍ଟରେ ଖେଳିପାରି ନ ଥିବା ଯୁବ ବ୍ୟାଟର୍ ଶୁଭମନ ଗିଲ୍ ଅର୍ଦ୍ଧଶତକୀୟ ଇନିଂସ୍ ଖେଳିଥିଲେ ।

ତେବେ ସମସ୍ତଙ୍କ ନଜର ରୋହିତଙ୍କ ଉପରେ ଥିଲା । ସେ ଓପନିଂ ପରିବର୍ତ୍ତେ ଚତୁର୍ଥ ସ୍ଥାନରେ ବ୍ୟାଟିଂ କରିବାକୁ ଆସିଥିଲେ । କିନ୍ତୁ ଅଧିକ ସମୟ କ୍ରିଜ୍‌ରେ ତିଷ୍ଠିପାରି ନ ଥିଲେ । ସେ ପେସର୍‌ଙ୍କ ବିପକ୍ଷରେ ନିଜ ପୁରୁଣା ଭୁଲ୍‌ର ପୁନରାବୃତ୍ତି କରିଥିଲେ ।

ରୋହିତ ମାତ୍ର ୩ ରନ୍ କରି ପାଭିଲିଅନ୍ ଫେରିଥିଲେ । ସେ ଚାର୍ଲି ଆଣ୍ଡରସନ୍‌ଙ୍କ ବଲ୍‌ରେ ପ୍ରଥମ ସ୍ଲିପ୍‌ରେ ଥିବା ଅଲିଭର ଡେଭିସ୍‌ଙ୍କୁ କ୍ୟାଚ୍ ଦେଇଥିଲେ ।

ଆଡିଲେଡ୍‌ରେ ନଂ.୫ରେ ଖେଳିପାରନ୍ତି

ଆଡିଲେଡ୍ ଟେଷ୍ଟ ପୂର୍ବରୁ ଟିମ୍‌ର ବ୍ୟାଟିଂ କ୍ରମ ସ୍ଥିର କରିବା ଟିମ୍ ମ୍ୟାନେଜ୍‌ମେଣ୍ଟ ପାଇଁ ସବୁଠାରୁ ବଡ଼ ଚାଲେଞ୍ଜ୍ ଥିଲା । ଏବେ ଏହା ଆପାତତଃ ସ୍ଥିର ହୋଇଯାଇଛି ।

ଅଧିନାୟକ ରୋହିତ ଓପନିଂ କରିବାକୁ ପସନ୍ଦ କରନ୍ତି; କିନ୍ତୁ ଲୋକେଶ ରାହୁଲ ପର୍ଥରେ ଭାରତର ଦ୍ୱିତୀୟ ଇନିଂସ୍‌ରେ ଯେଉଁଭଳି ବ୍ୟାଟିଂ ପ୍ରଦର୍ଶନ କରିଥିଲେ, ତାହା ପ୍ରଶଂସାଯୋଗ୍ୟ ଥିଲା । ଓପନିଂ ଯୋଡ଼ିରେ ସେ ଯଶସ୍ୱୀ ଜୟସ୍ୱାଲଙ୍କ ସହ ଦ୍ୱି-ଶତକୀୟ ଭାଗୀଦାରୀ କରିଥିଲେ ।

ଅଭ୍ୟାସ ମ୍ୟାଚ୍‌ରେ ମଧ୍ୟ ରାହୁଲ-ଯଶସ୍ୱୀ ଯୋଡ଼ି ଉପରେ ଭରସାବ୍ୟକ୍ତ କରାଯାଇଥିଲା । ଉଭୟ ଓପନିଂ ୱିକେଟ୍ ପାଇଁ ୭୫ ରନ୍ ଯୋଗ କରିଥିଲେ । ଯଶସ୍ୱୀ ୪୫ ରନ୍ କରି ଆଉଟ୍ ହୋଇଥିବା ବେଳେ ରାହୁଲ ୨୭ ରନ୍ କରି ରିଟାୟର୍ଡ ହୋଇଥିଲେ ।

ଆଡିଲେଡ୍‌ରେ ନଂ.୫ରେ ଖେଳିପାରନ୍ତି

ଏଥିରୁ ସ୍ପଷ୍ଟ ହୋଇଯାଇଛି ଯେ ପିଙ୍କ୍ ବଲ୍ ଟେଷ୍ଟରେ ରାହୁଲ ଓ ଯଶସ୍ୱୀଙ୍କ ଯୋଡ଼ି ହିଁ ଓପନିଂ କରିବେ ଏବଂ ରୋହିତ ମଧ୍ୟକ୍ରମରେ ଖେଳିବେ । ଭାରତୀୟ ଅଧିନାୟକ ପଞ୍ଚମ ସ୍ଥାନରେ ବ୍ୟାଟିଂ କରିପାରନ୍ତି ।

ଶୁଭମନ ଅଙ୍ଗୁଳି ଆଘାତରୁ ସୁସ୍ଥ ହୋଇ ଅଭ୍ୟାସ ମ୍ୟାଚ୍ ଜରିଆରେ ସଫଳ ପ୍ରତ୍ୟାବର୍ତ୍ତନ କରିଛନ୍ତି । ସେ ତିନି ନମ୍ବରରେ ବ୍ୟାଟିଂ କରିବା ନିଶ୍ଚିତ । ପର୍ଥରେ ଭାରତର ଦ୍ୱିତୀୟ ଇନିଂସ୍‌ରେ ଶତକ ଲଗାଇ ଫର୍ମକୁ ଫେରିଥିବା ବିରାଟ କୋହଲି ଚାରି ନମ୍ବରରେ ଆସିବେ । ଏହାପରେ ରୋହିତ ବ୍ୟାଟିଂ ପାଇଁ ଆସିପାରନ୍ତି ।

ରୋହିତ ଓପନର୍ ଭାବେ କ୍ରମାଗତ ବିଫଳ ହେଉଛନ୍ତି । ତେଣୁ ମଧ୍ୟକ୍ରମରେ ଖେଳିବା ତାଙ୍କ ପାଇଁ ଅଧିକ ନିରାପଦ ।

ଦକ୍ଷତା ଥିବା ସତ୍ତ୍ୱେ ସମାଲୋଚିତ

ଭାରତୀୟ ଅଧିନାୟକ ରୋହିତ ବିଳମ୍ବରେ ଟେଷ୍ଟ କ୍ରିକେଟ୍ ଖେଳିବା ଆରମ୍ଭ କରିଥିଲେ । କ୍ରିକେଟ୍‌ର ଦୀର୍ଘତମ ଫର୍ମାଟ୍‌ରେ ତାଙ୍କୁ ବିରାଟଙ୍କ ଭଳି ସଫଳତା ମିଳି ନାହିଁ, ହେଲେ ଟେଷ୍ଟରେ ବି ସେ ବଡ଼ ଖେଳାଳିଙ୍କ ମଧ୍ୟରେ ପରିଗଣିତ ହୁଅନ୍ତି ।

ରୋହିତ ନିଜ କ୍ୟାରିଅର୍‌ର ପ୍ରଥମ ଦୁଇ ଟେଷ୍ଟ ମ୍ୟାଚ୍‌ରେ ଶତକ ହାସଲ କରିଥିଲେ । କିନ୍ତୁ ଏହାପରେ ତାଙ୍କୁ ସଂଘର୍ଷ କରିବାକୁ ପଡ଼ିଥିଲା, ଏପରିକି ଗୋଟିଏ ସମୟରେ ତାଙ୍କୁ ଟିମ୍‌ରେ ସ୍ଥାନ ବି ମିଳି ନ ଥିଲା ।

୨୦୧୯ରେ ରୋହିତଙ୍କୁ ଟେଷ୍ଟରେ ଓପନିଂ କରିବାର ସୁଯୋଗ ମିଳିଥିଲା । ଏହାପରେ ପରବର୍ତ୍ତୀ ତିନି ବର୍ଷ ଯାଏଁ ସେ ଟିମ୍‌ର ଶ୍ରେଷ୍ଠ ବ୍ୟାଟର୍ ରହିଥିଲେ ।

ହିଟ୍‌ମ୍ୟାନ୍ ସୀମିତ ଓଭର୍‌ରେ ଜଣେ ଦମ୍‌ଦାର ବ୍ୟାଟର୍ ଭାବେ ଜଣାଶୁଣା । ସେ ଟେଷ୍ଟରେ ମଧ୍ୟ ଭଲ ବ୍ୟାଟର୍ ହୋଇଥିଲେହେଁ କ୍ରମାଗତ ବଡ଼ ସ୍କୋର୍ କରି ନ ପାରିବା ଯୋଗୁଁ ସମାଲୋଚନାର ଶରବ୍ୟ ହେଉଛନ୍ତି ।

ତେବେ ସମସ୍ତେ ଏ କଥାରେ ସହମତ ଯେ ସେ ଫର୍ମରେ ଥିବା ସ୍ଥଳେ ଟିମ୍‌ର ବିଜୟ ସମ୍ଭାବନା ବଢ଼ିଯାଏ । ତେଣୁ ପ୍ରଦର୍ଶନରେ ନିରନ୍ତରତା ରହୁ ନ ଥିଲେ ବି ତାଙ୍କ ଦକ୍ଷତା ପ୍ରତି ସେଭଳି ପ୍ରଶ୍ନ ଉଠେ ନାହିଁ ।

ଟେଷ୍ଟରେ ରୋହିତ ଏ ଯାବତ ୬୪ ମ୍ୟାଚ୍ ଖେଳି ୪୨୭୦ ରନ୍ ସଂଗ୍ରହ କରିଛନ୍ତି । ଏଥିରେ ୧୨ ଶତକ ଓ ୧୮ ଅର୍ଦ୍ଧଶତକ ରହିଛି ।

ଅଗ୍ନିପରୀକ୍ଷା ହେବ ଅଷ୍ଟ୍ରେଲିଆ ଗସ୍ତ

ରୋହିତଙ୍କ ପାଇଁ ଅଷ୍ଟ୍ରେଲିଆ ଗସ୍ତ କେବଳ ଅଧିନାୟକ ଭାବେ ନୁହେଁ, ଜଣେ ବ୍ୟାଟର୍ ଭାବେ ମଧ୍ୟ ଅଗ୍ନିପରୀକ୍ଷା । ଟିମ୍ ଇଣ୍ଡିଆ ବିଶ୍ୱ ଟେଷ୍ଟ ଚାମ୍ପିଅନ୍‌ସିପ୍‌ର ଫାଇନାଲ୍‌ରେ ସିଧାସଳଖ ପ୍ରବେଶ କରିପାରିବ କି ନାହିଁ, ତାହା ଏହି ଗସ୍ତରୁ ସ୍ପଷ୍ଟ ହୋଇଯିବ । ଅବଶ୍ୟ ଅନ୍ୟ ସମୀକରଣରୁ ପ୍ରବେଶ ମିଳିବାର ସମ୍ଭାବନା ବି ରହିଛି ।

ବର୍ଡର-ଗାଭାସ୍କର ଟ୍ରଫିରେ ଫର୍ମକୁ ଫେରିବେ କି ରୋହିତ ଶର୍ମା

ଭାରତ ପାଇଁ ଅଷ୍ଟ୍ରେଲିଆରେ ଅତି କମ୍‌ରେ ଚାରି ମ୍ୟାଚ୍ ଜିତିବା ଜରୁରୀ । ପର୍ଥ ବିଜୟ ଜରିଆରେ ଟିମ୍ ସକାରାତ୍ମକ ଢଙ୍ଗରେ ଅଭିଯାନ ଆରମ୍ଭ କରିଛି ସତ, ହେଲେ ଆହୁରି ଅନେକ ଚାଲେଞ୍ଜ୍ ବାକି ଅଛି । ଟିମ୍‌କୁ ଅବଶିଷ୍ଟ ଚାରି ଟେଷ୍ଟରୁ ତିନି ମ୍ୟାଚ୍ ଜିତିବାକୁ ହେବ ।

ପ୍ରଥମ ଟେଷ୍ଟରେ ରୋହିତ ଖେଳି ନ ଥିଲେ, ଅଥଚ ଟିମ୍ ବଡ଼ ବ୍ୟବଧାନରେ ବିଜୟ ହାସଲ କରିଥିଲା । ଏବେ ରୋହିତଙ୍କୁ ସିରିଜ୍‌ର ଅବଶିଷ୍ଟ ମ୍ୟାଚ୍‌ଗୁଡ଼ିକରେ ସଫଳ ନେତୃତ୍ୱ ନେବାକୁ ହେବ ।

ଘରେ ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ ସିରିଜ୍‌ରେ କ୍ଲିନ୍ ସୁଇପ୍ ହେବା ପରେ ଭାରତୀୟ ଟିମ୍ ବ୍ୟାକ୍‌ଫୁଟ୍‌କୁ ଚାଲିଆସିଥିଲା, କିନ୍ତୁ ପର୍ଥ ବିଜୟ ଖେଳାଳିଙ୍କ ମନୋବଳ ବଢ଼ାଇଛି । ଏବେ ପିଙ୍କ୍ ବଲ୍ ଅଭ୍ୟାସ ମ୍ୟାଚ୍‌ରେ ବି ଟିମ୍‌କୁ ସଫଳତା ମିଳିଛି । ଏହି ସକାରାତ୍ମକତାକୁ ବଜାୟ ରଖିବା ରୋହିତଙ୍କ ପାଇଁ ଚାଲେଞ୍ଜ୍ ହେବ ।

ବ୍ୟକ୍ତିଗତ ପ୍ରଦର୍ଶନକୁ ବିଚାରକୁ ନେଲେ, ରୋହିତ ଏବେ ଦୁର୍ବଳ ଫର୍ମରେ ଅଛନ୍ତି । ରୋହିତଙ୍କ ବ୍ୟାଟିଂ ପ୍ରଦର୍ଶନରେ ଆଉ ପୂର୍ବ ଚମକ ଦେଖିବାକୁ ମିଳୁ ନାହିଁ ।

ଭାରତରେ ଖେଳାଯାଇଥିବା ବାଂଲାଦେଶ ଓ ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜ୍‌ରେ ସେ ୧୦ ଇନିଂସ୍‌ରେ ମୋଟ୍ ୧୩୩ ରନ୍ ସଂଗ୍ରହ କରିଥିଲେ । ଏଥିରେ ମାତ୍ର ଗୋଟିଏ ଅର୍ଦ୍ଧଶତକ ରହିଛି ।

ଅନ୍ତିମ ସୋପାନ ଅଭିମୁଖେ ଟେଷ୍ଟ କ୍ୟାରିଅର୍

ବିଶେଷକରି ଟେଷ୍ଟ କ୍ରିକେଟ୍‌ରେ ବିରାଟ, ରବିଚନ୍ଦ୍ରନ ଅଶ୍ୱିନ ଓ ରବୀନ୍ଦ୍ର ଜାଡ଼େଜାଙ୍କ ଭଳି ୩୭ବର୍ଷୀୟ ରୋହିତଙ୍କ କ୍ୟାରିଅର୍ ମଧ୍ୟ ଅନ୍ତିମ ସୋପାନ ଆଡ଼କୁ ଗତି କରୁଛି ।

କ୍ୟାରିଅର୍‌କୁ ଆଉ ଟିକେ ଆଗକୁ ନେବାକୁ ହେଲେ, ତାଙ୍କୁ ଭଲ ବ୍ୟାଟିଂ ପ୍ରଦର୍ଶନ କରିବାକୁ ହେବ । ଫିଟ୍‌ନେସ୍ ସହ ପ୍ରଦର୍ଶନରେ ନିରନ୍ତରତା ରହିବା ବି ଜରୁରୀ । ଏହାଛଡ଼ା ଅଧିନାୟକତ୍ୱର ଅତିରିକ୍ତ ଦାୟିତ୍ୱ ମଧ୍ୟ ରହିଛି ।

ଚଳିତ ଟେଷ୍ଟ ଚକ୍ରରେ ବର୍ଡର-ଗାଭାସ୍କର ଟ୍ରଫି ଭାରତର ଶେଷ ସିରିଜ୍ । ଏହା ରୋହିତଙ୍କ ଟେଷ୍ଟ କ୍ୟାରିଅର୍‌ର ଭବିଷ୍ୟତ ନିର୍ଦ୍ଧାରଣ କରିପାରେ ।

ଏହି ଗୁରୁତ୍ୱପୂର୍ଣ୍ଣ ଟେଷ୍ଟ ସିରିଜ୍‌ରେ ଫର୍ମ ହାସଲ କରିପାରିବେ କି ରୋହିତ? ପୁଣି ଥରେ ଦେଖିବାକୁ ମିଳିବ କି ହିଟ୍‌ମ୍ୟାନ୍‌ଙ୍କ ଚମକ?

ଇମେଲ୍: biswasports@gmail.com

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)