ଯଦି ଆପଣଙ୍କ ମସ୍ତିଷ୍କ କିଏ ପଢିଦିଏ, ଆପଣ ଯାହା ଭାବନ୍ତି ଯଦି କିଏ ତାହା କହିଦିଏ ତେବେ କଣ ହେବ? ଆପଣଙ୍କୁ ନିହାତି ଆଶ୍ଚର୍ଯ୍ୟ ଲାଗିବ। ତେବେ ଏପରି କରିବା ଏବେ ସହଜ ହେବ। କାଲିଫର୍ଣ୍ଣିଆ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିର ଗବେଷକମାନେ ଏପରି ଏକ ମେସିନ୍ ପ୍ରସ୍ତୁତ କରୁଛନ୍ତି ଯାହା ଆପଣଙ୍କ ଭାବନାକୁ ପଢିବା ସହ ଏହାକୁ ଅନୁବାଦ ବି କରିପାରିବ।
ଗବେଷକମାନଙ୍କ କହିବା ଅନୁଯାୟୀ, ଏହି ନୂତନ ଉପକରଣ ଜଣେ ବ୍ୟକ୍ତିଙ୍କ ଚିନ୍ତାଧାରାକୁ ସିଧାସଳଖ ୭୯ ପ୍ରତିଶତ ସଠିକତା ସହିତ ଲିଖିତ ଭାବେ ଅନୁବାଦ କରିବାରେ ସକ୍ଷମ । ତେବେ ଏହି ନୂଆ ଟେକ୍ନୋଲୋଜି ମସ୍ତିଷ୍କ-କମ୍ପ୍ୟୁଟର ଇଣ୍ଟରଫେସ୍ (BMI) ପ୍ରଯୁକ୍ତିବିଦ୍ୟାରେ ଏକ ପ୍ରମୁଖ ସଫଳତା ଭାବରେ ଉଭା ହୋଇଛି। ଯାହା କି ମୁକ ବ୍ୟକ୍ତିଙ୍କ ପାଇଁ ବରଦାନ ସାଜିବ।
Also Read
କାଲଟେକ୍ ଗବେଷକମାନଙ୍କ ଅନୁଯାୟୀ, ଏହି ନୂଆ ଟେକ୍ନୋଲୋଜିର ମୂଳରେ ରହିଛି BMI । ବର୍ତ୍ତମାନ ଏପରି ଏକ ସିଷ୍ଟମ କଳ୍ପନା କରାଯାଇଛି ଯାହାକି ମସ୍ତିଷ୍କ ଏବଂ କମ୍ପ୍ୟୁଟର ମଧ୍ୟରେ ଦୂରତାକୁ ଦୂର କରିପାରିବ । ତେବେ ଏକ ନିର୍ଦ୍ଦିଷ୍ଟ BMI ବ୍ୟବହାର କରି ମସ୍ତିଷ୍କରେ ସୁପ୍ରମାର୍ଜିନାଲ୍ ଗାଇରସ୍ ନାମକ ଏକ ସ୍ଥାନକୁ ଟାର୍ଗେଟ୍ କରାଯାଇଛି। ଯାହାକି ଭାଷା ପ୍ରକ୍ରିୟାକରଣ ପାଇଁ ମସ୍ତିଷ୍କର ଏହି ଅଂଶ ଏକ ଗୁରୁତ୍ୱପୂର୍ଣ୍ଣ କ୍ଷେତ୍ର ।
ଅଧିକ ପଢ଼ନ୍ତୁ: ସାବଧାନ ! କାରରେ ଯାତ୍ରା କଲେ ହୋଇପାରେ କ୍ୟାନସର !
ପ୍ରଥମେ, ଗବେଷକମାନେ ସୁପ୍ରମାର୍ଜିନାଲ୍ ଗାଇରସରେ ଛୋଟ ଇଲେକ୍ଟ୍ରୋଡ୍ ପ୍ରତିରୋପଣ କଲେ। ଯେତେବେଳେ ଆପଣ କୌଣସି ଶବ୍ଦ ବିଷୟରେ ଭାବନ୍ତି ସେତେବେଳେ ଏହା ଆପଣଙ୍କ କଥାକୁ ଶୁଣିପାରେ ଓ ମସ୍ତିଷ୍କ ଦ୍ୱାରା ଉତ୍ପନ୍ନ ବୈଦ୍ୟୁତିକ ସଂକେତକୁ ଧରିନିଏ। ଏହି ବୈଦ୍ୟୁତିକ ସଙ୍କେତଗୁଡ଼ିକର ଜଟିଳ ଢାଞ୍ଚାଗୁଡ଼ିକ ପରେ ଏକ କମ୍ପ୍ୟୁଟର ପ୍ରୋଗ୍ରାମରେ ଦିଆଯାଏ । ପ୍ରୋଗ୍ରାମଟି ଏକ କୋଡବ୍ରେକର ପରି, ବିଭିନ୍ନ ଧାରଣା ଏବଂ ଶବ୍ଦ ସହିତ ଜଡିତ ଏହାକୁ ଡିକୋଡ୍ କରିନିଏ ଓ ଅନୁବାଦ କରିଥାଏ।
ଏହି ପରୀକ୍ଷଣ ସମୟରେ, ଅଂଶଗ୍ରହଣକାରୀମାନଙ୍କୁ ଏକ ଭିଜୁଆଲ୍ ବିଷୟରେ ଚିନ୍ତା କରିବାକୁ ନିର୍ଦ୍ଦେଶ ଦିଆଯାଇଥିଲା । ତେବେ ଏହା ୭୯ ପ୍ରତିଶତ ସଠିକ ଅନୁବାଦ କରିଥିଲା। ଅଧ୍ୟୟନ ଅନୁଯାୟୀ, ଏହା କଥା କହିପାରୁନଥିବା ବ୍ୟକ୍ତିଙ୍କ ପାଇଁ ମଧ୍ୟ ଲାଭଦାୟକ ସାବ୍ୟସ୍ତ ହୋଇଛି। ଷ୍ଟ୍ରୋକ୍ ପୀଡିତ ଏବଂ ଅନ୍ୟମାନେ ଯେଉଁମାନେ କଥା କହିବାର କ୍ଷମତା ହରାଇଛନ୍ତି, ଏହି ଟେକ୍ନୋଲୋଜିରୁ ସେମାନେ ଉପକୃତ ହୋଇପାରିବେ, ସେମାନଙ୍କୁ ସେମାନଙ୍କ ଭାବନା ପ୍ରକାଶ କରିବା ସହ ଅନ୍ୟମାନଙ୍କ ସହିତ ଯୋଗାଯୋଗ କରିବାର ମାଧ୍ୟମ ଯୋଗାଇ ପାରିବ।
ତଥାପି, ଗବେଷକମାନେ କହିଛନ୍ତି ଯେ ଏହି ପ୍ରଯୁକ୍ତିବିଦ୍ୟା ପ୍ରାଥମିକ ପର୍ଯ୍ୟାୟରେ ଅଛି। ଇଲେକ୍ଟ୍ରୋଡ ପ୍ରତିରୋପଣ ପାଇଁ ଅସ୍ତ୍ରୋପଚାର ଆବଶ୍ୟକ। ଗବେଷକମାନେ ମସ୍ତିଷ୍କର କାର୍ଯ୍ୟକଳାପକୁ ବିଶ୍ଳେଷଣ କରିବା ପାଇଁ fMRI ସ୍କାନ୍ ବ୍ୟବହାର କରିବା ଭଳି ପଦ୍ଧତି ନେଇ ଗବେଷଣା ଚଳାଇଛନ୍ତି। ଯାହା ଦ୍ୱାରା ବିନା କଷ୍ଟରେ ଏହାକୁ ବ୍ୟବହାର କରିହେବ। ତେବେ ଏପରି ହେଲେ ଅନେକ ରୋଗୀ ଉପକୃତ ହେବେ।