ଲ୍ୟାଣ୍ଡିଂ ସମୟରେ ଦୁର୍ଘଟଣା । ରନୱେରୁ ବାହାରକୁ ବାହାରି ଗଲା ବିମାନ। ଲ୍ୟାଣ୍ଡ୍ କରିବା ସମୟରେ ଦୁର୍ଘଟଣାର ଶିକାର ହୋଇଛି ବିମାନ। ଏହି ଦୁର୍ଘଟଣା ଭିଡିଓଟି ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଯେଉଁଥିରେ ଦେଖିବାକୁ ମିଳିଛି ଏକ ଛୋଟ ବିମାନ ଲ୍ୟାଣ୍ଡିଂ ସମୟରେ ରନୱେରୁ କିପରି ବାହାରକୁ ଚାଲି ଆସୁଛି। ଏହି ଭାଇରାଲ ଭିଡିଓଟି କାନପୁର ବିମାନବନ୍ଦରର ବୋଲି କୁହାଯାଉଛି। କିନ୍ତୁ କାନପୁର ବିମାନବନ୍ଦର କର୍ତ୍ତୃପକ୍ଷ କିମ୍ବା ବାୟୁସେନା ଏହା ସ୍ପଷ୍ଟ କରି ନାହିଁ ।
ଭାଇରାଲ୍ ଭିଡିଓରେ ଦେଖିବାକୁ ମିଳୁଛି, ଏକ ନୀଳ ରଙ୍ଗର ଛୋଟ ବିମାନଟି ଲ୍ୟାଣ୍ଡିଂ କରୁଛି । ଅବତରଣ ସମୟରେ ରନୱେରେ ସଠିକ୍ ଟ୍ରାକରେ ନ ଆସି ହଠାତ୍ ଡାହାଣକୁ ଯାଇ ମାଟି ଆଡ଼କୁ ଚାଲିଯାଇଛି । ବିମାନଟିର ଗତି ଖୁବ୍ ତୀବ୍ର ଥିବାରୁ ଅବାଟକୁ ଚାଲିଯାଇ ଧକ୍କା ହୋଇ ଯାଇଥିଲା । ବିମାନଟି ଧକ୍କା ହେବା ମାତ୍ରେ କିଛି ଲୋକ ପଛପଟୁ ଡେଇଁ ପଡ଼ିଥିଲେ । ଆଉ ଦୌଡ଼ି ଆସି ପାଇଲଟଙ୍କ ଗେଟ୍ ଖୋଲିବାକୁ ଚେଷ୍ଟା କରିଥିଲେ ।
ପରେ ବିମାନରୁ ଓହ୍ଲାଇଥିବା କିଛି ଲୋକ ଭିତରେ ଫସି ରହିଥିବା ଲୋକମାନଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ। ଭାଇରାଲ ଭିଡିଓ ଅନୁଯାୟୀ ଏହା ଡର୍ନିୟର ବିମାନ ବୋଲି କୁହାଯାଉଛି । ଏହା କୋଷ୍ଟଗାର୍ଡର ବିମାନ ବୋଲି ମଧ୍ୟ ଦାବି କରାଯାଉଛି । କିନ୍ତୁ ଏ ପର୍ଯ୍ୟନ୍ତ ଏହା ସ୍ପଷ୍ଟ ହୋଇନି। ଦୁର୍ଘଟଣା କେବେ ଘଟିଛି ତାହା ମଧ୍ୟ ସ୍ପଷ୍ଟ ହୋଇନାହିଁ । ଭାଇରାଲ ଭିଡିଓଟି କାନପୁର ସିଭିଲ ବିମାନବନ୍ଦରର ନୁହେଁ । କେଉଁ ସ୍ଥାନର ଜଣା ପଡ଼ିନଥିବା କହିଛନ୍ତି କାନପୁର ବିମାନବନ୍ଦର ନିର୍ଦ୍ଦେଶକ ।