ଆଫଗାନିସ୍ତାନକୁ ତାଲିବାନ କବଜା କରିବା ପରେ ପ୍ରଥମ ଥର ପାଇଁ ମୁହଁ ଖୋଲିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ୍ । ଆଫଗାନିସ୍ତାନରୁ ଆମେରିକାର ସୈନ୍ୟ ପ୍ରତ୍ୟାହାର ପ୍ରସଙ୍ଗରେ ଜୋ ବାଇଡେନ୍ ଦ୍ୱାଇଟ୍ ହାଉସରୁ ଦେଶକୁ ସମ୍ବୋଧିତ କରିଛନ୍ତି । ସୈନ୍ୟ ପ୍ରତ୍ୟାହାର ନିଷ୍ପତ୍ତିରେ ମୁଁ ଅଟଳ, ଆମର ସେନା ବହୁତ ବଳିଦାନ ଦେଇଛନ୍ତି । ବର୍ତ୍ତମାନ ଆଫଗାନିସ୍ତାନର ଲୋକମାନଙ୍କ ଉପରେ ସେମାନଙ୍କର ଭବିଷ୍ୟତ । ତେଣୁ ସେମାନଙ୍କୁ ଆଗକୁ ଆସି ଯୁଦ୍ଧ ଲଢ଼ିବାକୁ ପଡ଼ିବ । ତେବେ ଆଫଗାନିସ୍ତାନରେ ଯଦି ଆମେରିକୀୟଙ୍କୁ ଆକ୍ରମଣ ହୁଏ ତେବେ ସ୍ଥିତି ଭୟଙ୍କର ହେବ ବୋଲି ଚେତାଇ ଦେଇଛନ୍ତି ବାଇଡେନ୍ । ଆଫଗାନ୍ ସୈନ୍ୟ ଯୁଦ୍ଧ ଲଢିବାକୁ ଚାହୁଁନଥିବା ବେଳେ ଆମେରିକା ସୈନ୍ୟଙ୍କୁ ସେଠାରେ ମରିବାକୁ ଛାଡ଼ି ଦିଆଯିବନି ।
ଆଫଗାନିସ୍ତାନକୁ ଗଢିବା କିମ୍ବା ସେଠାରେ ଗଣତନ୍ତ୍ର ପ୍ରତିଷ୍ଠା କରିବା ନୁହେଁ ବରଂ ଆମେରିକାରେ ଯେଭଳି ପୁଣି ଆତଙ୍କବାଦୀ ଆକ୍ରମଣ ନହେବ, ତାହା ଆମର ଫୋକସ୍ ବୋଲି ସେ କହିଥିଲେ । ଏହାଛଡ଼ା ଆଫଗାନ ରାଜନୈତିକ ନେତା ମାନେ ଦେଶର ଭବିଷ୍ୟତ ନେଇ ଏକାଠି ହୋଇପାରୁନାହାନ୍ତି । ଅତୀତରେ ଆଫଗାନିସ୍ତାନରେ ହୋଇଥିବା ଭୁଲକୁ ମୁଁ ଆ ଦୋହରାଇବାକୁ ଚାହୁଁନାହୁଁ ବୋଲି ଦେଶକୁ ସମ୍ବୋଧନ କରି କହିଛନ୍ତି ବାଇଡେନ୍ ।
ସେପ୍ଟେମ୍ବର ୧୧, ୨୦୦୧ରେ ଆମେରିକାରେ ହୋଇଥିବା ଆତଙ୍କବାଦୀ ଆକ୍ରମଣ ବିରୋଧରେ ଆମେ ଆଫଗାନିସ୍ତାନ ଯାଇଥିଲୁ । ଅଲକାଏଦା ଆତଙ୍କବାଦୀ ସଂଗଠନ ଯେମିତି ଆଫଗାନ ମାଟିକୁ ଆମେରିକା ବିରୋଧରେ ବ୍ୟବହାର କରିପାରିବ ନାହିଁ, ତାହାକୁ ନିଶ୍ଚିତ କରିବାକୁ ଆଫଗାନିସ୍ତାନରେ ପଶିଥିଲା ଆମେରିକା । ୧୦ ବର୍ଷ ତଳୁ ଆମେ ଆମର ଲକ୍ଷ୍ୟ ପୂରଣ କରିସାରିଛୁ ବୋଲି ବାଇଡେନ କହିଛନ୍ତି । ତେବେ ଆଫଗାନିସ୍ତାନ ଉପରେ ତୀକ୍ଷ୍ଣ ନଜର ରଖାଯାଇଥିବା ସେ ସୂଚନା ଦେଇଛନ୍ତି ।
ସେପଟେ ତାଲିବାନ୍ ରାଜରେ ଆଫଗାନିସ୍ତାନର ନୂଆ ନାଁ ହେବାକୁ ଯାଉଛି- ଇସଲାମିକ୍ ଏମିରେଟ୍ସ ଅଫ୍ ଆଫଗାନିସ୍ତାନ୍ । ନୂଆ ରାଷ୍ଟ୍ରପତି ହୋଇପାରନ୍ତି ତାଲିବାନ୍ ଟପ୍ ନେତା ତଥା ସଂଗଠନର ସହ ପ୍ରତିଷ୍ଠାତା ମୁଲ୍ଲା ଅବଦୁଲ୍ ଘନି ବରାଦର୍ । ତାଲିବାନ ଶାସନଭାର ହାତେଇବା ପରେ ବଦଳିବାକୁ ଯାଉଛି ଦେଶର କାୟାକଳ୍ପ । ଆଶଙ୍କା କରାଯାଉଛି, ୨୦୦୧ ମସିହା ପରଠାରୁ ୨ ଦଶନ୍ଧି ଭିତରେ ଆଫଗାନବାସୀଙ୍କ ଜୀବନରେ ଯେଉଁ ସୁଖ ଶାନ୍ତି, ସ୍ୱାଧୀନତା ଓ ଉନ୍ନତି ଆସିଥିଲା, ତାହା ପୁଣି ଅନ୍ଧାର ଭିତରକୁ ଠେଲି ହୋଇଯିବ । ଇତିହାସର କଳା ଅଧ୍ୟାୟ ପୁଣି ଦେଖିବାକୁ ପଡ଼ିପାରେ ଆଫଗାନବାସୀ ସେଥିପାଇଁ ଭୟରେ ହଜାର ହଜାର ସଂଖ୍ୟାରେ ଲୋକ ଦେଶ ଛାଡ଼ି ଚାଲିଯିବାକୁ ଚେଷ୍ଟା କରୁଛନ୍ତି । ବିଶେଷ କରି ତାଲିବାନ କ୍ଷମତାକୁ ଆସିବା ପରେ ପୁଣି ପୂର୍ବଭଳି କଠୋର ସରିୟା ଲ ଲାଗୁ କରିବା ଆଶଙ୍କା କରାଯାଉଛି, ଯେଉଁଥିରେ ମହିଳାମାନଙ୍କୁ ଅକଥନୀୟ ନିର୍ଯାତନା ସହିବାକୁ ପଡ଼ିପାରେ ।