ଯେଉଁଠି ଠାକୁର, ସେଇଠି ସ୍କୁଲ। ପହଡ଼ ପକେଇ ଶୋଇଛନ୍ତି ପ୍ରଭୁ ବାଣେଶ୍ୱର । ପଦାରେ ପ୍ରଭୁଙ୍କୁ ଜଗିଛନ୍ତି ବାସୁଆ ବଳଦ, ଦଲାଣରେ ଝୁଲୁଛି ପ୍ରଭୁଙ୍କ ଘଣ୍ଟି । ଚାରିଆଡ଼େ ବେଲପତ୍ର, ଭକ୍ତଙ୍କ ଯିବା ଆସିବା, ପୂଜା ପାଠ। ଆଉ ମନ୍ଦିର ଭିତରେ ହିଁ ସ୍କୁଲ ଚାଲୁଛି, ପିଲାଙ୍କୁ ପାଠ ପଢ଼ାଉଛନ୍ତି ଶିକ୍ଷକ । କଟକ ଜିଲ୍ଲା ସାଲେପୁର ବ୍ଲକ ଅନ୍ତର୍ଗତ ମୂର୍କୁଣ୍ଡିର ବାଣେଶ୍ୱର ଶିବ ମନ୍ଦିରରେ ଚାଲିଛି ସ୍କୁଲ । ଠାକୁରଙ୍କ ପୂଜାର୍ଚ୍ଚନା ସହିତ ଏଇଠି ଗତ ୭ବର୍ଷ ହେଲା ଚାଲିଛି ଦାଶସାହି ପ୍ରକଳ୍ପ ପ୍ରାଥମିକ ବିଦ୍ୟାଳୟ।
ପ୍ରଥମରୁ ପଞ୍ଚମ ଯାଏଁ ଯେତିକି ପିଲା ଦାଶସାହି ପ୍ରକଳ୍ପ ପ୍ରାଥମିକ ବିଦ୍ୟାଳୟ ନାଁ ଲେଖାଇଛନ୍ତି, ସମସ୍ତଙ୍କ ପାଇଁ ସ୍କୁଲ କହିଲେ ଶିବମନ୍ଦିର ବାରଣ୍ଡା । ଦୈନିକ କାନ୍ଥରେ ଡେରା ହୁଏ ଦୁଇଟି କଳାପଟା, ଆଉ ଦୁଇଜଣ ସାର୍ ପିଲାଙ୍କୁ ପାଠ ପଢାନ୍ତି । ପିଲା ପଢୁଥିବା ବେଳେ ଠାକୁରଙ୍କ ଦର୍ଶନ ପାଇଁ ଭକ୍ତ ବି ଆସନ୍ତି, ଘଣ୍ଟି ବଜାନ୍ତି।ମୂଳ ସମସ୍ୟା ହେଲା, ବିଦ୍ୟାଳୟର ନିଜସ୍ୱ ଜାଗା ନାହିଁ । ଗାଁ ଲୋକ ଅନେକଥର ପ୍ରଶାସନକୁ ଜଣାଇଛନ୍ତି । ମଝିରେ ଥରେ ଟଙ୍କା ଆସି ଫେରି ମଧ୍ୟ ଯାଇଛି । ସରକାରୀ କାମ ତ, ଗଡ଼ି ଗଡ଼ି ଚାଲିଛି। ଏମିତି ଗଲାଣି ୭ବର୍ଷ । ହେଲେ ସମସ୍ୟାର ସମାଧାନ ହୋଇପାରୁନି ।
ଏଇଠି ପ୍ରଶ୍ନ ଉଠୁଛି 5T ଅଧୀନରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚରେ ସ୍କୁଲ ଗୁଡ଼ିକୁ ଚକାଚକ କରାଯାଉଛି । ହେଲେ ଏଠି ମନ୍ଦିର ଭିତରେ ୭ବର୍ଷ ହେଲା ସ୍କୁଲ ଚାଲିଛି, ଏଠାକାର ଶିକ୍ଷା ଅଧିକାରୀ କରୁଛନ୍ତି କଣ? ଅନାବାଦି ଜାଗା ଖଣ୍ଡିଏ ସ୍କୁଲକୁ ଦେବାକୁ କେତେ ବା ସମୟ ଲାଗନ୍ତା । ସେମାନଙ୍କ ପିଲା ଯଦି ଏମିତି ମନ୍ଦିରରେ ବସି ପାଠ ପଢୁଥାନ୍ତା, ତେବେ ସେମାନେ କଣ ଏମିତି ଅବହେଳା କରିଥାନ୍ତେ?
ମନୋଜ ଆଚାର୍ଯ୍ୟ, ସାଲେପୁର