କାହିଁକି ଆତ୍ମହତ୍ୟା କରୁଛନ୍ତି ସେଲିବ୍ରେଟି ?

ଅନ୍ୟକୁ ହସାଉଥିବା, ଖୁସିରେ ରହିବାର କଳା ଶିଖାଉଥିବା ବ୍ୟକ୍ତି କାହିଁକି କରୁଛି ଆତ୍ମହତ୍ୟା? ସବୁ ବାଟ ବନ୍ଦ ହେଉଯାଉଛି ନା ବାଟ ଦେଖାଇବାକୁ କେହି ମିଳୁନାହାନ୍ତି? କାରଣ ବିଗତ କିଛି ବର୍ଷ ଭିତରେ ସେଲିବ୍ରିଟିଙ୍କ ଆତ୍ମହତ୍ୟା ଘଟଣା ବଢ଼ିବାରେ ଲାଗିଛି । ସିଲକ୍ ସ୍ମିତାଠୁ ସୁଶାନ୍ତ ସିଂ ରାଜପୁତ ଆଉ ଏବେ ରାଇମୋହନ...ନିଜ କ୍ୟାରିୟରରେ ସଫଳତାର ଶୀର୍ଷରେ ଥାଇ ବି ଏମାନେ ଆତ୍ମହତ୍ୟା କରିଛନ୍ତି । ତେବେ ଆସନ୍ତୁ ଜାଣିବା ଏହା ପଛର କାରଣ କଣ ?

ଚକାଚକ୍ ମନୋରଞ୍ଜନ ଦୁନିଆ ଭିତରେ ଲୁଚି ରହିଛି ଅନେକ କଷ୍ଟ । ଲାଇଟ୍...କ୍ୟାମେରା...ଆକ୍ସନ୍ ଭିତରେ ଚାପି ହେଉଯାଉଛି ମନର କୋହ, ଆଉ ଆଖିର ଲୁହ । ଅନ୍ୟକୁ ହସାଉଥିବା, ବଞ୍ଚିବାକୁ ରାସ୍ତା ଦେଖାଉଥିବା ମଣିଷ ଖୋଦ୍ ବାଟବଣା ହୋଇଯାଉଛି । ୧୪ ଜୁନ୍ ୨୦୨୦, ବଲିଉଡ୍ ଷ୍ଟାର ସୁଶାନ୍ତ ସିଂ ରାଜପୁତଙ୍କ ଅକାଳ ମୃତ୍ୟୁ ସାରା ଦେଶକୁ ସ୍ତବ୍ଧ କରି ଦେଲା । ସୁଶାନ୍ତ ଆତ୍ମହତ୍ୟା କରିଛନ୍ତି ବୋଲି ଲକ୍ଷ ଲକ୍ଷ ଫ୍ୟାନ୍, ଶୁଭେଚ୍ଛୁ ଓ ନିଜର ଲୋକେ ବିଶ୍ୱାସ କରିପାରୁନଥିଲେ । ମୃତ୍ୟୁ ପୂର୍ବରୁ ନିଜ ବ୍ୟକ୍ତିଗତ ଜୀବନ ଓ କ୍ୟାରିୟର୍‌କୁ ନେଇ ସୁଶାନ୍ତ ମାନସିକ ଚାପରେ ଥିବା କଥା ତଦନ୍ତରୁ ଜଣାପଡ଼ିଥିଲା ।

ସେହିପରି ୧୨ ନଭେମ୍ବର ୨୦୨୦, ବଲିଉଡ୍‌ର ଆଉ ଜଣେ ଚର୍ଚ୍ଚିତ ଅଭିନେତା ଆସିଫ୍ ବସ୍ରା ହିମାଚଳ ପ୍ରଦେଶର ଧର୍ମଶାଳାରେ ଆତ୍ମହତ୍ୟା କରିଥିଲେ । ଆର୍ଥିକ ସମସ୍ୟାକୁ ନେଇ ସେ ଚରମ ପଦକ୍ଷେପ ନେଇଥିବା ପୋଲିସ୍ କହିଥିଲା । ଏହାପୂର୍ବରୁ ୨୦୧୩ରେ ଜିଆ ଖାନ୍‌ଙ୍କ ମୃତ୍ୟୁ ସାରା ବଲିଉଡ୍ ଇଣ୍ଡଷ୍ଟ୍ରିକୁ ଦୋହଲାଇ ଦେଇଥିଲା । ବାଲିକା ବଧୂ ଫେମ୍ ପ୍ରତ୍ୟୁଷା ବାନାର୍ଜୀଙ୍କ ସୁଇସାଇଡ୍ ଅନେକଙ୍କୁ ଚକିତ କରିଥିଲା ।

କେବଳ ବଲିଉଡ୍ କିମ୍ବା ଦକ୍ଷିଣ ଭାରତରେ ନୁହେଁ ଓଡ଼ିଆ ମନୋରଂଜନ ଦୁନିଆରେ ବି ଅନେକ ସେଲିବ୍ରିଟି ଆତ୍ମହତ୍ୟା କରିଛନ୍ତି । ୨୦୦୮ରେ ଆଲବମ୍ ଅଭିନେତା ପପୁ ଓ ୨୦୧୬ରେ ଟେଲି ଅଭିନେତା ରାଜା ପଟ୍ଟନାୟକଙ୍କ ଆତ୍ମହତ୍ୟା ଘଟଣା ଚର୍ଚ୍ଚାରେ ରହିଥିଲା । ରାଜାଙ୍କ ମୃତ୍ୟୁ ମାମଲାରେ ଅଭିନେତ୍ରୀ ଜେସିଙ୍କୁ ଗିରଫ ବି କରାଯାଇଥିଲା ।

୨୦୧୯ରେ କଟକରେ ଅଭିନେତ୍ରୀ ନିକିତାଙ୍କ ମୃତ୍ୟୁ ପାରିବାରିକ କଳହ ଘଟଣାକୁ ସାମ୍ନାକୁ ଆଣିଥିଲା । ଗତ ସପ୍ତାହରେ ରାଜଧାନୀରେ ଟେଲି ଅଭିନେତ୍ରୀ ରଶ୍ମୀରେଖାଙ୍କ ଆତ୍ମହତ୍ୟା ମାମଲା ଏବେ ବି ରହସ୍ୟ ଘେରରେ ରହିଛି ।

ତେବେ ଏଠାରେ ପ୍ରଶ୍ନ ଉଠୁଛି, ଖାଲି ଆର୍ଥିକ ଦୁଃସ୍ଥିତି, ନା ନିଜ ଲୋକଙ୍କ ସହ ଖରାପ ସମ୍ପର୍କ...କେଉଁ କାରଣ ପାଇଁ ସେଲିବ୍ରିଟି ନିଜ ଜୀବନ ହାରୁଛନ୍ତି । ବରିଷ୍ଠ ଅଭିନେତାଙ୍କ ମତରେ, କରୋନା ଯୋଗୁ ସିନେମା ଓ ଷ୍ଟେଜ୍ ଶୋକମିଯିବା କଳାକାରଙ୍କ ଆର୍ଥିକ ବୋଝ ବଢ଼ାଇଛି । ସେହିପରି ବ୍ୟକ୍ତିଗତ ଜୀବନରେ ଥିବା ଚାପ ଓ ଦୁଃଖକୁ କାହା ସହ ନବାଣ୍ଟିବା ବି ଆତ୍ମହତ୍ୟା ଘଟଣାକୁ ବଢ଼ାଉଥିବା ମାନସିକ ରୋଗ ବିଶେଷଜ୍ଞ କହିଛନ୍ତି ।