Viral Video: ହଠାତ୍‌ କ୍ୟାମେରା ଆଗକୁ ଆସିଗଲେ ଏହି ଜନଜାତି; ପିନ୍ଧିଛନ୍ତି ଅଜବ ପ୍ରକାର ପୋଷାକ

ଆପଣ ନିଶ୍ଚିତ ଭାବରେ ଜାଣିଥିବେ ଯେ ମାନବ ବିକାଶର ଆରମ୍ଭରୁ, ମଣିଷମାନେ ଜଙ୍ଗଲରେ ବାସ କରି ଆଦିବାସୀମାନଙ୍କ ଜୀବନ ବିତାଇଥିଲେ। ସେମାନେ ଶିକାର କରି ଖାଉଥିଲେ। କିନ୍ତୁ ଧୀରେ ଧୀରେ ବିକାଶ ସହିତ ମଣିଷ ମଧ୍ୟ ଉନ୍ନତ ହେଲା। କିନ୍ତୁ ଆଜି ବି ପୃଥିବୀରେ ଏମିତି ଅନେକ କ୍ଷେତ୍ର ଅଛି ଯେଉଁଠାରେ ଆଦିବାସୀମାନେ ବାସ କରନ୍ତି। ଆଜି ବି ଏହି ଜନଜାତି ଜନସଂଖ୍ୟାଠାରୁ ଦୂରରେ ଏକାକୀ ରହିବାକୁ ପସନ୍ଦ କରନ୍ତି।

ଏପରି ଅନେକ ଜନଜାତି ଅଛନ୍ତି ଯେଉଁମାନଙ୍କ ସହ ଆଜିପର୍ଯ୍ୟନ୍ତ ବି ଯୋଗାଯୋଗ ହୋଇପାରିନି। ନିକଟରେ ଏପରି ଏକ ଜନଜାତିର କିଛି ଲୋକ ହଠାତ୍ ନଦୀ କୂଳରେ ଥିବା ଜଙ୍ଗଲ ବାହାରେ କ୍ୟାମେରାରେ କଏଦ ହୋଇଯାଇଛନ୍ତି। ସେମାନଙ୍କୁ ଦେଖି ସାରା ବିଶ୍ୱରେ ଚିନ୍ତାର ଲହରୀ ଖେଳିଯାଇଛି… କିନ୍ତୁ କାହିଁକି?

ହ୍ୟୁମାନ୍ ରାଇଟ୍ସ ଅର୍ଗାନାଇଜେସନ୍ ସର୍ଭାଇଭାଲ୍ ଇଣ୍ଟର୍‌ନ୍ୟାସନାଲ ନିକଟରେ ଏକ ଭିଡିଓ ଜାରି କରିଛି ଯାହା ପେରୁର ଆମାଜନ ଜଙ୍ଗଲ ନିକଟରୁ ଆସିଛି। ଏହି ଭିଡିଓରେ ପ୍ରାୟ ୫୦ ଆଦିବାସୀ ଦେଖାଯାଉଛନ୍ତି ଯେଉଁମାନେ ମାସ୍କୋ ପିରୋ ଜନଜାତିର ଲୋକ ବୋଲି ଜଣାଯାଇଛି। ଏହା ହେଉଛି ବିଶ୍ୱର ସବୁଠାରୁ ବଡ ଅଣସଂରକ୍ଷିତ ଆଦିବାସୀ ଯେଉଁମାନଙ୍କ ସହିତ ଆଜିଯାଏ ଯୋଗାଯୋଗ ହୋଇପାରି ନାହିଁ।

ସେମାନଙ୍କ ଚିତ୍ର ସାମ୍ନାକୁ ଆସିବା ପରେ ଚିନ୍ତା ବଢିଯାଇଛି କାରଣ ହ୍ୟୁମାନ୍ ରାଇଟ୍ସ ଅର୍ଗାନାଇଜେସନ୍ କହୁଛନ୍ତି ଯେ ଜଙ୍ଗଲକୁ ଶୀଘ୍ର ସଫା କରାଗଲେ ଏହି ଜନଜାତି ବିଲୋପ ହୋଇଯିବ। ସ୍ଥାନୀୟ ଆଦିବାସୀ ଅଧିକାର ଗୋଷ୍ଠୀ FENAMAD କହିଛି ଯେ ଗଛ କାଟିବା କାରଣରୁ ଏହି ଜନଜାତି ଖାଦ୍ୟ ଖୋଜିବା ପାଇଁ ଜଙ୍ଗଲରୁ ବାହାରକୁ ଆସିବାକୁ ବାଧ୍ୟ ହେଉଛନ୍ତି। ଧୀରେ ଧୀରେ ଏହି ଆଦିବାସୀ ବସ୍ତି ନିକଟକୁ ଆସି ନିଜ ପାଇଁ ଖାଦ୍ୟ ଖୋଜିବା ଆରମ୍ଭ କରିବେ।

ରିପୋର୍ଟରେ ଦର୍ଶାଯାଇଛି ଯେ ଏହି ଫଟୋଗୁଡ଼ିକ ଜୁନ୍ ମାସ ଶେଷସୁଦ୍ଧା ନିଆଯାଇଛି। ପେରୁର ଦକ୍ଷିଣ-ପୂର୍ବ ପ୍ରଦେଶ ମାଡ୍ରେ ଡି ଡିଆସରେ ପ୍ରବାହିତ ଏକ ନଦୀ ନିକଟରେ ଏହି ଜନଜାତି ଦେଖାଦେଇଛନ୍ତି। ଏହି କ୍ଷେତ୍ର ବ୍ରାଜିଲ୍‌ ସହିତ ଲାଗିଛି। ସର୍ଭାଇଭାଲ୍ ଇଣ୍ଟର୍‌ନ୍ୟାସନାଲ୍‌ର ନିର୍ଦ୍ଦେଶକ କହିଛନ୍ତି ଯେ ଏହି ଫଟୋଗୁଡ଼ିକରୁ ଜଣାପଡିଛି ଯେ ମାଶ୍‌କୋ ପିରୋ ଜନଜାତିର ବହୁ ଜନସଂଖ୍ୟା ସେହି ସ୍ଥାନରୁ କିଛି କିଲୋମିଟର ଦୂରରେ ରହୁଛନ୍ତି ଯେଉଁଠାରେ ଗଛ କାଟିବା ପାଇଁ ଅନୁମତି ଦିଆଯାଇଛି।

ନିକଟରେ ଏହି ଜନଜାତିର କିଛି ଲୋକ ମଧ୍ୟ ଏକ ଗାଁ ନିକଟରେ ଦେଖିବାକୁ ମିଳିଥିଲେ। ଏହାପୂର୍ବରୁ, ଏହି ଜନଜାତିର ଲୋକମାନେ କ୍ୱଚିତ୍ ଦେଖାଯାଉଥିଲେ ଏବଂ ବସତି ସହ ଯୋଗାଯୋଗ କରୁ ନ ଥିଲେ। ସୂଚନାଯୋଗ୍ୟଯେ, ବର୍ତ୍ତମାନ ଅନେକ ଟିମ୍ବର କମ୍ପାନୀ ଏହି ଅଞ୍ଚଳରେ ଗଛ କାଟୁଛନ୍ତି।