ପ୍ରେମରେ ଧୋକା ଖାଇଥିବା ଲୋକଙ୍କୁ କମ ଦାମରେ ମିଳୁଛି ଚା’ । ଏମ୍ବିଏ ଚା’ ବାଲା, ଗ୍ରାଜୁଏଟ ଚା’ ବାଲା ପରେ ଏବେ ଆସିଛି ବେୱାଫା ଚା’ ବାଲା । ଉତ୍ତରପ୍ରଦେଶର ବାନ୍ଦାରେ ଏଭଳି ଏକ ଚା’ ଦୋକାନକୁ ନେଇ ଏବେ ଚର୍ଚ୍ଚା ଜୋର ଧରିଛି । ବର୍ତ୍ତମାନ ଏହି ଚା’ ଦୋକାନୀ ଯୁବପିଢ଼ିଙ୍କ ପାଇଁ ଏକ ଖାସ୍ ପସନ୍ଦର ଜାଗା ପାଲଟିଛି ।
ୟୁପି ବାନ୍ଦାର ବେବରୁ ଅଞ୍ଚଳରେ ରହୁଥିବା ଲବନେଶ୍ ପାଟିଲ ଏହି ଦୋକାନର ମାଲିକ । ସେ ବିଏ ପାସ୍ କରିଛନ୍ତି । ପାଠପଢ଼ା ସମୟରେ ସେ ଜଣେ ଯୁବତୀଙ୍କ ପ୍ରେମରେ ପଡ଼ିଥିଲେ । ହୃଦୟ ଦେଇ ତାଙ୍କୁ ଭଲପାଉଥିଲେ , ଆଉ ଜୀବନସାଥୀ କରିବା ପାଇଁ ଚିନ୍ତା କରୁଥିଲେ । ହେଲେ ତାଙ୍କୁ ପ୍ରେମରେ ଧୋକା ମିଳିଥିଲା । ଏହାସହ ପାଠପଢ଼ା ଶେଷ ହେବା ପରେ ଅନେକ ଚେଷ୍ଟା ପରେ ମଧ୍ୟ ତାଙ୍କୁ ଚାକିରି ଖଣ୍ଡିଏ ମିଳିଲା ନାହିଁ, ତେଣୁ ସେ ଚା ’ଷ୍ଟଲ ଖୋଲିବାକୁ ନିଷ୍ପତ୍ତି ନେଇଥିଲେ । ଆଉ ଦୋକାନକୁ ଏକ ଭିନ୍ନ ପରିଚୟ ଦେବା ପାଇଁ ତଥା ପ୍ରତାରଣା କରିଥିବା ଗର୍ଲଫ୍ରେଣ୍ଡ ପାଇଁ ବେୱଫା ଚାୱାଲା ନାଁ ରଖିଛନ୍ତି ।
Also Read
ପ୍ରେମରେ ଧୋକା ଖାଇଥିବା ଲୋକଙ୍କ ପାଇଁ ଅଫର୍
ଏହି ଚା’ ଦୋକାନର ସ୍ୱତନ୍ତ୍ରତା ହେଲା ଚା’ କପର ଦୁଇ ପ୍ରକାର ମୂଲ୍ୟ ରହିଛି । ଗୋଟିଏ ଚା’ କପର ମୂଲ୍ୟ ୧୫ଟଙ୍କା ରହିଥିବା ବେଳେ ଅନ୍ୟ ଚା’ କପର ମୂଲ୍ୟ ୧୦ଟଙ୍କା ରହିଛି । ପ୍ରେମୀଯୁଗଳଙ୍କ ପାଇଁ ୧୫ଟଙ୍କିଆ ଚା’ ବିକ୍ରି ହେଉଥିବା ବେଳେ ପ୍ରେମରେ ଧୋକା ଖାଇଥିବା ଯୁବକଯୁବତୀଙ୍କ ପାଇଁ ୧୦ଟଙ୍କିଆ ଚା’ । ଏଠାରେ ଚା’ ପିଉଥିବା ଲୋକେ କୁହନ୍ତି, ନାଁ ଶୁଣି ହିଁ ଆମେ ଦୋକାନ ଆସୁଛୁ ।
ଲବନେଶ ଚା’ ବିକ୍ରି କରିବା ସହ ଏକ ବାର୍ତ୍ତା ମଧ୍ୟ ଦେଉଛନ୍ତି । ବୁଝାମଣା ଭଲ ରହିଲେ ତଥା ବୁଝି ବିଚାରି ଭଲ ପାଇଲେ ପ୍ରତାରିତ ହେବେ ନାହିଁ ବୋଲି ସେ କହନ୍ତି । କାରଣ ପ୍ରେମରେ ଧୋକା ଖାଇଥିବା ମଣିଷ ହଁ ପ୍ରକୃତ କଷ୍ଟକୁ ହୃଦୟଙ୍ଗମ କରିପାରେ । ହୃଦୟ ଦେଇ ଭଲ ପାଉଥିବା ମଣିଷଟି ଯେତେବେଳେ କ୍ଷଣିକେ ଆପଣଙ୍କୁ ପର କରିଦିଏ, ତା’ ପରର ଅବସ୍ଥା କେହି ବୋଧହୁଏ ବୁଝିପାରିବେ ନାହିଁ ।
ଆହୁରି ସେ କହିଛନ୍ତି, ବେକାର ଥିବାରୁ ଏକ ଚା’ ଦୋକାନ କରି ପ୍ରଥମେ କିଛି ଟଙ୍କା ରୋଜଗାର କରିବାକୁ ସ୍ଥିର କରିଥିଲେ । ଏଥିପାଇଁ ଏହି ଚା’ ଷ୍ଟଲ ଖୋଲିଥିଲି । ଆଉ ପ୍ରେମରୁ ଧୋକା ଖାଇ ନାଁ ରଖିଲି ‘ବେୱଫା ଚା’ ବାଲା’ । ଆଉ ଦୋକାନ ଖୋଲିବାର କିଛିଦିନ ମଧ୍ୟରେ ଚାରିଆଡେ ପ୍ରଚାର ହୋଇଗଲା । ଦୋକାନାର ନାଁ ଶୁଣି ହିଁ ଲୋକଙ୍କ ଭିଡ଼ ଜମୁଛି ।