ଏହି ସରକାରଙ୍କ ଘୋଷଣା; ବାପାମାଆଙ୍କ ସେବା କରୁଥିବା ପୁଅ ଝିଅ ପାଇବେ ୧୫ ଲକ୍ଷ

ସିକ୍କିମ ସରକାର ଏକ ଅଭିନବ ଯୋଜନା ଆରମ୍ଭ କରିଛନ୍ତି। ବୃଦ୍ଧ ପିତାମାତାଙ୍କ ସେବା କରୁଥିବା ପୁଅ ଓ ଝିଅମାନଙ୍କ ପାଇଁ 'ଶ୍ରବଣ କୁମାର ପୁରସ୍କାର' ଆରମ୍ଭ ହୋଇଛି। ସ୍ୱାଧୀନତା ଦିବସ ଅବସରରେ ଏହି ପୁରସ୍କାରକୁ ଘୋଷଣା କରାଯାଇଛି।

ମଙ୍ଗଳବାର ଦିନ ଗାଙ୍ଗଟକର ପଲଜୋର ଷ୍ଟାଡିୟମରେ ସିକିମ ଏହାର ୭୭ ତମ ସ୍ୱାଧୀନତା ଦିବସ ପାଳନ କରିଛି। ଏହି କାର୍ଯ୍ୟକ୍ରମରେ ଉତ୍ସାହୀ ଗ୍ୟାଙ୍ଗଟୋକ ଜନସାଧାରଣ ତଥା ମୁଖ୍ୟମନ୍ତ୍ରୀ ପ୍ରେମ ସିଂହ ଗୋଲେଙ୍କ ସକ୍ରିୟ ଅଂଶଗ୍ରହଣ ଦେଖିବାକୁ ମିଳିଥିଲା। ଏହି ଉତ୍ସବରେ ମୁଖ୍ୟମନ୍ତ୍ରୀ ସିକ୍କିମର ଅଗ୍ରଗତିକୁ ସମର୍ଥନ କରିବାରେ କେନ୍ଦ୍ର ସରକାରଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ ଏବଂ ବାପାମାଆଙ୍କ ସେବା କରୁଥିବା ପୁଅ ଓ ଝିଅମାନଙ୍କୁ 'ଶ୍ରବଣ କୁମାର' ପୁରସ୍କାର ପ୍ରଦାନ କରିବାକୁ ରାଜ୍ୟ ନିଷ୍ପତ୍ତିକୁ ଘୋଷଣା କରିଥିଲେ।

ସ୍ୱାଧୀନତା ଦିବସ ସମ୍ବୋଧନରେ ମୁଖ୍ୟମନ୍ତ୍ରୀ ଗୋଲେ କହିଛନ୍ତି, “ଆଜିର ଯୁଗରେ ବାପାମାଆମାନେ ସେମାନଙ୍କ ପିଲାମାନଙ୍କୁ ବୃଦ୍ଧାଶ୍ରମରେ ରହିବାକୁ ବାଧ୍ୟ କରନ୍ତି। ସିକ୍କିମ୍ ଏବଂ ଆମ ସଂସ୍କୃତିରେ ପୂର୍ବରୁ ଏହାକୁ କେବେ ବି କଳ୍ପନା କରାଯାଉ ନଥିଲା। ଏହିପରି ପରିବର୍ତ୍ତନକୁ ଏଡାଇବା ପାଇଁ, ଆମେ ପ୍ରତିବର୍ଷ ୧୫ ଅଗଷ୍ଟରେ ବାପାମାଆଙ୍କୁ ସେବା କରୁଥିବା ପୁଅ ଓ ଝିଅମାନଙ୍କୁ ‘ଶ୍ରବଣ କୁମାର ପୁରସ୍କାର’ ଦେବାକୁ ଘୋଷଣା କରୁଛୁ।

ଆମେ ରାଜ୍ୟରେ ଶ୍ରବଣ କୁମାରଙ୍କୁ ଜନ୍ମ ଦେବାକୁ ଚାହୁଁଛୁ।” ରାଜ୍ୟରେ ବୃଦ୍ଧମାନଙ୍କ ପ୍ରତି ତାଙ୍କର ଚିନ୍ତା ଜାରି ରଖି ଗୋଲେ ଗାଙ୍ଗଟୋକ ସହରର ପୁରୁଣା STNM ହସ୍ପିଟାଲ କମ୍ପ୍ଲେକ୍ସରେ ଏକ ମନୋରଞ୍ଜନ ପାର୍କ କରିବାକୁ ମଧ୍ୟ ଘୋଷଣା କରିଛନ୍ତି।

ପବିତ୍ର ପୁସ୍ତକ ରାମାୟଣର ଚରିତ୍ର ଶ୍ରବଣ କୁମାରଙ୍କ ନାମରେ ଏହି ପୁରସ୍କାରକୁ ନାମକରଣ କରାଯାଇଛି। ଶ୍ରବଣ କୁମାର ତାଙ୍କର ଅନ୍ଧ ଏବଂ ବୃଦ୍ଧ ପିତାମାତାଙ୍କର ଯତ୍ନ ନେଉଥିଲେ। କିମ୍ବଦନ୍ତୀ ଅନୁଯାୟୀ, ଥରେ ଶ୍ରବଣ କୁମାର ନିଜ ବାପାମାଆଙ୍କ ପାଇଁ ପୋଖରୀରୁ ପାଣି ଆଣିବାକୁ ଯାଇଥିଲେ, ସେହି ସମୟରେ ରାଜା ଦାଶରଥ ତାଙ୍କୁ ଭୁଲ୍‌ବଶତଃ ଏକ ହରିଣ ଭାବି ତୀର ମାରି ହତ୍ୟା କରିଥିଲେ। ବାପାମାଆଙ୍କ ସେବା କରୁଥିବା ବେଳେ ତାଙ୍କ ଜୀବନ ଯାଇଥିବାରୁ ଶ୍ରବଣ ସମସ୍ତଙ୍କ ପାଇଁ ଉଦାହରଣ ହୋଇ ରହିଗଲେ।

ରାଜ୍ୟ ସରକାର ଦେଇଥିବା ବିଜ୍ଞପ୍ତି ଅନୁଯାୟୀ ସମାଜ କଲ୍ୟାଣ ବିଭାଗକୁ ପୁରସ୍କାର ସମ୍ବନ୍ଧୀୟ ନିୟମାବଳୀ ଏବଂ ନିର୍ଦ୍ଦେଶାବଳୀ ପ୍ରାସ୍ତୁତ ପାଇଁ ନୋଡାଲ ବିଭାଗ କରାଯାଇଛି। ବିଜ୍ଞପ୍ତି ଅନୁଯାୟୀ ପ୍ରଥମ ପୁରସ୍କାର ବିଜେତାଙ୍କୁ ୧୫ ଲକ୍ଷ ଟଙ୍କା, ଦ୍ୱିତୀୟ ବିଜେତାଙ୍କୁ ୧୦ ଲକ୍ଷ ଟଙ୍କା ଏବଂ ତୃତୀୟ ବିଜେତାଙ୍କୁ ୫ ଲକ୍ଷ ଟଙ୍କା ପ୍ରଦାନ କରାଯିବ। ସ୍ୱାଧୀନତା ଦିବସରେ ଏହି ପୁରସ୍କାର ପ୍ରଦାନ କରାଯିବ।