ଖରାଦିନରେ ପିଇବା ପାଣିର ସମସ୍ୟା ରହିବନି। ଅଚଳ ନଳକୂପକୁ ତୁରନ୍ତ ସଚଳ କରାଇବା ସହ ଆବଶ୍ୟକ ସ୍ଥାନରେ ନଳକୂପ ବସାଇବାର ବ୍ୟବସ୍ଥା କରିବାକୁ ସରକାରଙ୍କ ନିର୍ଦ୍ଦେଶ ରହିଛି । ଲୋକମାନେ ଯେପରି ଗ୍ରୀଷ୍ମ ସମୟରେ ଜଳ କଷ୍ଟ ନପାଇବେ । ଏଥିପାଇଁ କେଉଁଠି ନଳକୂପ ବସା ଯାଉଛି ଆଉ କେଉଁଠି ଓଭର ହେଡ଼ ଟାଙ୍କି କରାଯାଇ ଜଳ ଯୋଗାଯାଉଛି । ହେଲେ ବସୁଧା ଯୋଜନାରେ ବସିଥିବା ଟାଙ୍କି ମାସ ମାସ ଧରି ଅଚଳ ହୋଇ ପଡିଛି । ଏଥିପ୍ରତି ବିଭାଗ ନା ପ୍ରଶାସନ, କାହାରି ନଜର ପଡୁନାହିଁ । ଲୋକେ ଜଳ ଯନ୍ତ୍ରଣା ଭୋଗୁଛନ୍ତି ।
ବାସୁଦେବପୁର ବ୍ଲକ ବିନୋବାଭାବେନଗର ପଞ୍ଚାୟତର ବିନୋବାଭାବେ ଗାଁ । ଗାଁଟି ସମୁଦ୍ର ଉପକୂଳ ଲୁଣାବନ୍ଧର ପାଖରେ ଅବସ୍ଥିତ । ବର୍ଷା ଦିନରେ ପିଇବା ପାଣି ସମସ୍ୟା ଯାହାହେଉ ଖରାଦିନରେ ପାଣି ସମସ୍ୟା ଜଟିଳ ହେଉଛି ଜଳ ସ୍ତର କମୁଥିବାରୁ ନଳକୂଅରୁ ଆବଶ୍ୟକ ପାଣି ମିଳିପାରୁନାହିଁ । ଲୋକ ସଂଖ୍ୟା ଦୃଷ୍ଟିରୁ ନଳକୂଅ ବି ଶୋଷ ମେଣ୍ଟାଇ ପାରୁନି। ଖରା ଦିନରେ ପାଣି ସମସ୍ୟାକୁ ନଜରରେ ରଖି ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ଗ୍ରାମାଞ୍ଚଳ ଜନସ୍ୱାସ୍ଥ୍ୟ ବିଭାଗ ଜରିଆରେ 'ବସୁଧା' ଯୋଜନାରେ ପାଣି ପ୍ରକଳ୍ପ ବସାଯାଇଥିଲା ।
ସ୍ଥାନୀୟ ଉଚ୍ଚ ପ୍ରାଥମିକ ବିଦ୍ୟାଳୟ ପାଖ ପଡ଼ିଆରେ ୮୮ ଲକ୍ଷ ଟଙ୍କା ବ୍ୟୟରେ ଏହି ପ୍ରକଳ୍ପ ବସିଥିଲା। ୧ ଲକ୍ଷ ଲିଟର କ୍ଷମତା ବିଶିଷ୍ଟ ସୁଜଚ୍ଚ ପାଣିଟାଙ୍କି ସହ ଗାଁର ମୁଖ୍ୟ ରାସ୍ତା ପାଖରେ ଏକାଧିକ ସ୍ଥାନରେ ଛୋଟଛୋଟ ପାଣିଟାଙ୍କି କରାଯାଇ ଟ୍ୟାପ ବ୍ୟବସ୍ଥା କରାଯାଇଥିଲା। ପ୍ରକଳ୍ପ ନିର୍ମାଣ ହେବାର କିଛି ମାସ ଚାଲିବା ପରେ ଏବେ ଅଚଳ ହୋଇ ପଡିରହିଛି ।
ବ୍ୟୟ ବହୁଳ ପ୍ରକଳ୍ପଟି କାର୍ଯ୍ୟକ୍ଷମ ପରେ ସ୍ଥାନୀୟ ଅଞ୍ଚଳବାସୀ ବେଶ ଖୁସି ହୋଇଥିଲେ। ବିଶେଷ କରି ଖରାଦିନରେ ଜଳକଷ୍ଟରୁ ମୁକ୍ତି ପାଇ ପାରିବେ ବୋଲି ଲୋକ ଆଶାବାଦୀ ହୋଇଥିଲେ । ହେଲେ ପ୍ରକଳ୍ପଟି ପ୍ରାୟ ପାଞ୍ଚ ମାସରୁ ଉର୍ଦ୍ଧ ହେବ କାମ କରୁନି କି ପାଣି ମିଳୁନି । ଆକାଶ ଚୁମ୍ବି ସୁଉଚ୍ଚ ପାଣି ଟାଙ୍କି ଖରା ଦିନରେ ଶୁଖିଲା ପଡ଼ିଛି। ଖରା ସମୟରେ ଯିଏ ବି ଶୋଷିଲା ରାସ୍ତା ପାଖ ପାଣିଟାଙ୍କି ପାଖକୁ ଆଶ୍ରା କରି ଯାଉଛି ନିରାଶରେ ଫେରୁଛି ପ୍ରକଳ୍ପରୁ ପାଣି ମିଳୁ ନ ଥିବାରୁ ଗାଁରେ ଥିବା ନଳକୂଳ ପାଖରେ ପାଣି ପାଇଁ ଭିଡ଼ ଲାଗୁଛି ।
ପାଣି ନେବାକୁ ଲୋକଙ୍କ ଭିତରେ ପ୍ରତିଯୋଗିତା ସହ ଉଚ୍ଚବାଚ ହେଉଛି । ପାଣି ସମସ୍ୟାକୁ ନେଇ ସ୍ଥାନୀୟ ବାସିନ୍ଧା ବିଭାଗୀୟ ଯନ୍ତ୍ରୀଙ୍କୁ ଅବଗତ କରାଇଥିବା କହିଛନ୍ତି । ହେଲେ ପ୍ରକଳ୍ପ କାର୍ଯ୍ୟକ୍ଷମ ହୋଇପାରୁନି । ତେବେ ଘଟଣା ସମ୍ପର୍କରେ ଆମେ ବିଭାଗୀୟ ଯନ୍ତ୍ରୀଙ୍କ ସହ ଯୋଗାଯୋଗ କରିଥିଲୁ, ହେଲେ ତାଙ୍କର ଦେହ ଅସୁସ୍ଥତା କାରଣରୁ ପ୍ରତିକ୍ରିୟା ମିଳିପାରିନି । ଅନ୍ୟପଟେ ଏହି ପ୍ରକଳ୍ପକୁ ତୁରନ୍ତ କାର୍ଯ୍ୟକ୍ଷମ କରିବାକୁ ଚେଷ୍ଟା କରିବେ ବୋଲି କହିଛନ୍ତି ।
ସରକାରଙ୍କ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ପ୍ରକଳ୍ପ ଯଦି ଖରାଦିନରେ ତୃଷା ମେଣ୍ଟାଇ ପାରୁନି, ତେବେ ପ୍ରକଳ୍ପ କାହିଁକି ବସା ଯାଇଛି ତାହା ଏବେ ପ୍ରଶବାଚୀ ସୃଷ୍ଟି କରିଛି ।
ବାସୁଦେବପୁରରୁ କିରୀଟି ଦାସ, ଓଟିଭି