ବର୍ଷେ ନୁହେଁ କି ଦୁଇ ବର୍ଷ ନୁହେଁ ଦୀର୍ଘ ୧୦ ବର୍ଷ ହେଲା ବେଆଇନ ଭାବେ ନଦୀ ପଠା ଏବଂ ଗାଁ ଖେଳ ପଡିଆକୁ ଜବର ଦଖଲ କରିଛନ୍ତି ଜଣେ ଇଟା ଭାଟି ମାଲିକ । ଜବର ଦଖଲ ସ୍ଥାନରେ ଇଟା ଭାଟି ନିର୍ମାଣ କରି ପଡିଆ ସଂଲଗ୍ନ ପ୍ରାୟ ୧୮ ଏକର ଜମିକୁ ନିଜ କବଜାକୁ ନେଇ ହିଟଲରି ଶାସନ ଚଳାଇଛନ୍ତି । ଫଳରେ ଗାଁରେ ଅଶାନ୍ତ ବାତାବରଣ ବଢ଼ିବାରେ ଲାଗିଛି । ଏଭଳି ଘଟଣା ଦେଖା ଯାଇଛି ଭଦ୍ରକ ଜିଲ୍ଲା ବନ୍ତ ତହସିଲ ଅଧୀନ ଅଣିଜ ପଂଚାୟତର ନରିପୁର ଗାଁରେ । ଏଠାରେ ଜଣେ ଇଟା ଭାଟି ମାଲିକ ପ୍ରଥମେ ଆସି ଏକ ଛୋଟିଆ ସ୍ଥାନରେ ଇଟା ଭାଟି ଆରମ୍ଭ କରିଥିଲେ । ତେବେ ପରବର୍ତୀ ସମୟରେ ସେ ସାଳନ୍ଦୀ ନଦୀ ଭିତରୁ ବେଆଇନ ବାଲି ଉଠାଣ ଓ ନଦୀ ପଠାରୁ ମାଟି ନେଲେ । ତେବେ ଏପରି ବେଆଇନ ଜବର ଦଖଲ ଉଛେଦ ପାଇଁ ଗାଁ ଲୋକ ମାନେ ସ୍ଥାନୀୟ ତହସିଲଦାରଙ୍କ ଠାରୁ ଆରମ୍ଭ କରି ଜିଲ୍ଲାପାଳଙ୍କ ପର୍ଯ୍ୟନ୍ତ ସମସ୍ତଙ୍କ ଠାରେ ଅଭିଯୋଗ କରୁଥିଲେ ମଧ୍ୟ କେହି ଏଥିପ୍ରତି ଦୃଷ୍ଟି ଦେଉ ନ ଥିବା ଅଭିଯୋଗ କରିଛନ୍ତି ଗ୍ରାମବାସୀ ।
ଭଦ୍ରକ ଜିଲ୍ଲାର ବନ୍ତ ବ୍ଲକ ଅଧିନସ୍ଥ ଅଣିଜ ପଂଚାୟତର ନରିପୁର ଗାଁ ପାଖ ସାଳନ୍ଦୀ ନଦୀ ପଠାରେ ଗୋଟିଏ ବେଆଇନ ଇଟା ଭାଟି ଚାଲିବା ଯୋଗୁ ଗାଁରେ ଅଶାନ୍ତ ବାତାବରଣ ସୃଷ୍ଟି ହୋଇଛି । ଏହି ଗାଁ ପାଖ ରେ ଜଣେ ବାହାର ବ୍ୟକ୍ତି ଆସି ଆଜିକୁ ୧୦ ବର୍ଷ ହେଲା ଇଟା ଭାଟି ନିର୍ମାଣ କରିଛନ୍ତି । ପ୍ରଥମେ ଗାଁ ଲୋକ ମାନେ ଏଥିପାଇଁ କିଛି ବିରୋଧ କରିନଥିଲେ । କିନ୍ତୁ ସମ୍ପୃକ୍ତ ଇଟା ଭାଟି ମାଲିକ ବର୍ଷକୁ ବର୍ଷ ନିଜର ବିସ୍ତାରବାଦୀ କାର୍ଯ୍ୟ ଆରମ୍ଭ କରି ଏବେ ଗାଁ ପାଖରେ ଥିବା ନଦୀ ପଠା ଓ ଖେଳ ପଡିଆ ସଲଗ୍ନ ପ୍ରାୟ ୧୮ ଏକର ଗୋଚର ଏବଂ ଅନାବାଦୀ ଜମିକୁ ନିଜ ଦଖଲ ନେଇ ମାଟି ଖନନ କରିଛନ୍ତି । ନଦୀ ପଠାକୁ ଖନନ ସହିତ ବେଆଇନ ବାଲି ଉଠାଣ ଯୋଗୁ ନଦୀର ଗତି ପଥ ଏବେ ଗାଁ ମୁହାଁ ହେବାର ଆଶଙ୍କା ସୃଷ୍ଟି ହୋଇଛି ।
ସେହିପରି ଦୀର୍ଘ ଦଶନ୍ଧି ହେବ ଗାଁ ପାଖ ପଡିଆରେ ପିଲାମାନେ ଖେଳିବା ସହିତ ଗୋରୁ ଗାଇ ମାନେ ଚରୁଥିଲେ । ତେବେ ଇଟା ନିର୍ମାଣ ପାଇଁ ପଡିଆରୁ ମାଟି ଉଠାଯାଇ ବଡ଼ ବଡ଼ ଗାତ ସୃଷ୍ଟି ଯୋଗୁ ନା ପିଲା ମାନେ ଖେଳି ପାରୁଛନ୍ତି ନା ଗାଇଗୋରୁ ପଡିଆକୁ ଯାଇ ପାରୁଛନ୍ତି । ଏପରିକି ଯଦି ଗୋରୁଟିଏ ଭୁଲରେ ପଡିଆକୁ ଗଲା, ତେବେ ସେହି ଗାତରେ ପଡି ପ୍ରାଣ ହରାଉଛି । ସେହିପରି ଇଟା ଭାଟି ଯୋଗୁ ଗାଁ ଭିତରେ ଟ୍ରକ ଟ୍ରାକ୍ଟର ଯାଇ ରାସ୍ତା ମଧ୍ୟ ଖରାପ ହୋଇ ଗଲାଣି । ଇଟା ଭାଟିର ନିଆଁ ଓ ଧୂଆଁ ଯୋଗୁ ଗାଁରେ ଥିବା ସବୁଜ ପରିବେଶ ଏବେ ସମ୍ପୃନ୍ନ ନଷ୍ଟ ହୋଇ ଗଲାଣି । କେବଳ ସେତିକି ନୁହେଁ ଇଟା ଭାଟି ମାଲିକ ଏବେ ଗାଁର କିଛି ଗରିବ ଲୋକଙ୍କୁ ପ୍ରଲୋଭିତ କରି ତାଙ୍କ ଜମିରୁ ଗଭୀର କରି ମାଟି ଉଠାଣ କରୁଛନ୍ତି ।
ଫଳରେ ପାଖରେ ଥିବା ଅନ୍ୟ ଜମିରେ ଅତଡ଼ା ଖସୁଛି ଏବଂ ଧାନ ଚାଷ ହୋଇ ପାରୁ ନାହିଁ. ତେଣୁ ଏଭଳି ଅନେକ ସମସ୍ୟା ସୃଷ୍ଟି ହେଉଛି । ଏପରି ମାଟି ଖୋଳା ସମ୍ପର୍କରେ ସ୍ଥାନୀୟ ରାଜସ୍ୱ ନିରୀକ୍ଷକ ସବୁ ଜାଣି ଚୁପ । ତେଣୁ ଲୋକ ମାନେ ଅତିଷ୍ଟ ହୋଇ ପ୍ରଶାସନକୁ ଜଣାଇ ଆସୁଥିଲେ ମଧ୍ୟ ସେମାନେ ଇଟା ଭାଟି ମାଲିକଙ୍କ ଠାରୁ ବେଶ ଭଲ ଭାବରେ ଅର୍ଥ ନେଇ ଚୁପ ବସୁଥିବା ଗ୍ରାମବାସୀ ମାନେ ଅଭିଯୋଗ କରି କ୍ଷୋଭ ପ୍ରକାଶ କରିଛନ୍ତି । ନରିପୁର ଅଂଚଳରେ ଚାଲିଥିବା ଏଭଳି ବେଆଇନ କାର୍ଯ୍ୟର ତଦନ୍ତ ଓ ଆବଶକୀୟ କାର୍ଯ୍ୟାନୁଷ୍ଠାନ କେବେ ହେବ ତାହାକୁ ଗ୍ରାମବାସୀ ଅନାଇ ରହିଛନ୍ତି ।
ଭଦ୍ରକରୁ ପାର୍ଥ ସାରଥୀ ନାୟକ