ନକ୍ସଲବାଦର ଭୟରେ କଟିଲା ପିଲାଦିନ; ସାହସ ଓ ଆତ୍ମବିଶ୍ୱାସ ଦେଲା ସଫଳତା

ଇଛା ଓ ଧୈର୍ଯ୍ୟ ଆଗରେ ସବୁକିଛି ହାର ମାନିଥାଏ। ସାହସ ଓ ଆତ୍ମବିଶ୍ୱାସ ଲକ୍ଷ୍ୟ ଓ ସ୍ୱପ୍ନକୁ ସାକାର କରିବାରେ ସାହାଯ୍ୟ କରେ। ଝାଡଖଣ୍ଡର ଜଣେ ଝିଅ ଏହାକୁ କରି ଦେଖେଇଛି। ସମସ୍ତେ ଜାଣନ୍ତି ଝାଡ଼ଖଣ୍ଡ ନକ୍ସଲମାନଙ୍କ ଆଡ୍ଡାସ୍ଥଳୀ। ଏଠାରେ ବାସ କରୁଥିବା ଲୋକମାନେ ନକ୍ସଲବାଦର ସମ୍ମୁଖୀନ ହୁଅନ୍ତି ଓ ସବୁବେଳେ ଭୟର ବାତାବରଣ ଥାଏ।

ପୂର୍ବ ତୁଳନାରେ ବର୍ତ୍ତମାନ ନକ୍ସଲ ଆତଙ୍କବାଦ ହ୍ରାସ ପାଇଥିଲେ ବି ନକ୍ସଲମାନଙ୍କ କାରଣରୁ ଜଣେ ନିରୀହ ଝିଅ ପାଖରୁ ସବୁଦିନ ପାଇଁ ତା’ ବାପା ଚାଲିଯାଏ ତ ତା’ ପିଲାଦିନ ଭୟର ଛାୟା ତଳେ ରହିବା ସ୍ୱାଭାବିକ। କିନ୍ତୁ ଏହି ଝିଅ ହାର ମାନିନଥିଲା। ଉଚ୍ଚ ଆଶା ତାଙ୍କୁ ଖେଲୋ ଇଣ୍ଡିଆରେ ସ୍ୱର୍ଣ୍ଣ ପଦକ ଜିତି ଏକ ନୂତନ ରେକର୍ଡ ସୃଷ୍ଟି କରିବାର ସୁଯୋଗ ଦେଲା।

ଏହା ହେଉଛି ୧୯ ବର୍ଷୀୟ ସୁପ୍ରୀତି କଚ୍ଛପଙ୍କ ସଫଳତାର କାହାଣୀ। ତେବେ ଆସନ୍ତୁ ଜାଣିବା କିଏ ଏହି ସୁପ୍ରୀତି କଚ୍ଛପ, ତାଙ୍କ ପିଲାଦିନ କିପରି ଥିଲା ଏବଂ ସଂଗ୍ରାମକୁ ଅତିକ୍ରମ କରିବା ପରେ ସେ କିପରି ଖେଲୋ ଇଣ୍ଡିଆରେ ସ୍ୱର୍ଣ୍ଣ ଜିତି ହୋଇଗଲେ ଚାମ୍ପିଅନ୍।

କିଏ ଏହି ସୁପ୍ରୀତି କଚ୍ଛପ:

ଝାଡ଼ଖଣ୍ଡରେ ଜନ୍ମଗ୍ରହଣ କରିଥିବା ସୁପ୍ରୀତିଙ୍କ ବାପାଙ୍କ ନାମ ରାମସେବକ ଓରାଁଓ ଏବଂ ମା’ଙ୍କ ନାମ ବାଲମତୀ ଥା। ସୁପ୍ରୀତିଙ୍କ ସମେତ ପିଲାମାନଙ୍କୁ ଲାଳନପାଳନ କରିବା ପାଇଁ ରାମସେବକ ଜଣେ ବୈଦ୍ୟ ଭାବରେ କାମ କରୁଥିଲେ। ସେ ରୋଗୀମାନଙ୍କୁ ଦେଖିବା ପାଇଁ ନିକଟସ୍ଥ ଗ୍ରାମଗୁଡିକ ବୁଲୁଥିଲେ। ୨୦୦୩ ମସିହାରେ, ରାମସେବକ ଡିସେମ୍ବର ରାତିରେ ଆଉ ଘରକୁ ଫେରି ନଥିଲେ। ୫ ଜଣ ପିଲା ମାଆ ବାଲମତୀଙ୍କ ସହିତ ତାଙ୍କ ଫେରିବା ବାଟକୁ ଚାହିଁ ବସିଥିଲେ। କିନ୍ତୁ ପରଦିନ ସକାଳେ ରାମସେବକ ଓ କିଛି ଗ୍ରାମବାସୀଙ୍କ ମୃତଦେହ ମିଳିଥିଲା। ନକ୍ସଲମାନେ ତାଙ୍କୁ ଗୁଳି କରି ଏକ ଗଛରେ ଟାଙ୍ଗି ଦେଇଥିଲେ।

ବାପାଙ୍କ ମୃତ୍ୟୁ ବେଳେ ସୁପ୍ରୀତି ବହୁତ ଛୋଟ ଥିଲେ। ସେ ତାଙ୍କ ବାପା ଓ ତାଙ୍କ ବିଷୟରେ କିଛି ଜାଣନ୍ତି ନାହିଁ। ମାଆ ସବୁ ପିଲାଙ୍କୁ ଲାଳନ ପାଳନ କରିଥିଲେ। ବାଲମତୀ ଦେବୀ ଘାଗରା ବ୍ଲକର ବିଡିଏ ଅଫିସରେ ଚାକିରି ପାଇଲେ। ପିଲାମାନଙ୍କ ସହିତ ରହିବା ପାଇଁ ସରକାରୀ କ୍ୱାର୍ଟରରେ ଏକ ଆଶ୍ରୟ ମଧ୍ୟ ମିଳିଗଲା। ଏଇଠୁ ହିଁ ଆରମ୍ଭ ହେଲା ସୁପ୍ରୀତିଙ୍କ ଦୌଡ ଯାତ୍ରା।

ସୁପ୍ରୀତିଙ୍କ କ୍ୟାରିଅର୍:

ଆନ୍ତଃ ସ୍କୁଲ୍ ପ୍ରତିଯୋଗିତାରେ ସୁପ୍ରୀତି ପ୍ରଶିକ୍ଷକ ପ୍ରଭାତ ରଂଜନ ତିୱାରୀଙ୍କୁ ଭେଟିଥିଲେ। ସେ ସୁପ୍ରୀତିଙ୍କୁ ତାଲିମ ଦେବା ଆରମ୍ଭ କରିଥିଲେ ଏବଂ ୨୦୧୫ ମସିହାରେ ସେ ଝାଡ଼ଖଣ୍ଡ କ୍ରୀଡ଼ା ତାଲିମ କେନ୍ଦ୍ରରେ ପ୍ରଶିକ୍ଷଣ ନେବା ଆରମ୍ଭ କରିଥିଲେ। ଏହି ସମୟ ମଧ୍ୟରେ ସେ ଅନେକ ପ୍ରତିଯୋଗିତାରେ ଭାଗ ନେଇଥିଲେ। ସେ ୪୦୦ ମିଟର, ୮୦୦ ମିଟର, ୧୫୦୦ ମିଟର ଏବଂ ତାପରେ ୩୦୦୦ ମିଟର ପ୍ରତିଯୋଗିତାରେ ସାମିଲ୍ ହୋଇଥିଲେ।

ସୁପ୍ରୀତିଙ୍କ ସଫଳତା:

ସୁପ୍ରୀତିଙ୍କ କଠିନ ପରିଶ୍ରମ ୨୦୧୯ ମସିହାରେ ତାଙ୍କୁ ପ୍ରଥମ ଜାତୀୟ ପଦକ ଦେଇଥିଲା। ସେ ଜାତୀୟ ଜୁନିଅର ଆଥଲେଟିକ୍ସ ଚମ୍ପିୟନସିପ୍‌ରେ ବ୍ରୋଞ୍ଜ ଜିତିଥିଲେ। ଜାତୀୟ ଜୁନିଅରରେ ସେ ଏକ ବ୍ରୋଞ୍ଜ୍‌ ପଦକ ଜିତିଥିଲେ। ୨୦୨୧ ମସିହାରେ ଗୁଆହାଟୀରେ ଅନୁଷ୍ଠିତ ଜାତୀୟ ଜୁନିଅର ଆଥଲେଟିକ୍ସ ଚମ୍ପିଅନ୍‌ସିପ୍‌ରେ ୩୦୦୦ ମିଟର ଦୌଡ଼କୁ ୧୦ ମିନିଟ୍‌ରେ ଶେଷ କରିଥିଲେ।