ମେଲୋଡି କ୍ୱିନ୍‌ଙ୍କୁ ଦିଆଯାଇଥିଲା ବିଷ, ୩ ମାସ ବେଡରେ ପଡ଼ିରହିଥିଲେ . .

ନୂଆଦିଲ୍ଲୀ: ଭାରତର କୋକିଳକଣ୍ଠୀ ଲତା ମଙ୍ଗେସକର । ସଫଳତା ଯେମିତି ବ୍ୟକ୍ତିତ୍ୱ ବି ଥିଲା ସେମିତି । ମିଷ୍ଠଭାଷୀ, ଉଦାରବାଦୀୟ ଗାୟିକା । ଭାରତୀୟ ସିନେମା ପ୍ରତି ତାଙ୍କର ଅବଦାନ ଭୁଲି ହେବନି । ସାରା ଭାରତ ତାଙ୍କ ସଫଳତା ତାରେ ଖୁସୀ ଥିବା ବେଳେ ଦିନେ କେହି ଜଣେ ଈର୍ଷା କରିଥିଲେ ତାଙ୍କୁ । କେବଳ ଈର୍ଷା ନୁହେଁ, ତାଙ୍କୁ ଜୀବନରୁ ମାରିଦେବାକୁ ଷଡ଼ଯନ୍ତ୍ର ମଧ୍ୟ କରିଥିଲେ। ମହାନ ଗାୟିକା ଲତା ମଙ୍ଗେସ୍କରଙ୍କ ଜୀବନର ଏହି ଭୟଙ୍କର କାହାଣୀ ସମ୍ପର୍କରେ ଆସନ୍ତୁ ଜାଣିବା।

୧୯୨୯ ସେପ୍ଟେମ୍ବର ୨୮ରେ ଜନ୍ମ ଗ୍ରହଣ କରିଥିଲେ ଲତା ମଙ୍ଗେସକର । ବାପା ଦୀନାନାଥ ମଙ୍ଗେଶକରଙ୍କ ଠାରୁ ସଂଗୀତ ଶିକ୍ଷା କରିଥିଲେ । ଦିନାନାଥ ଜଣେ ଲୋକପ୍ରିୟ ସଂଗୀତଜ୍ଞ ହେବା ସହିତ ଜଣେ ଉଚ୍ଚକୋଟିର ମଞ୍ଚ ଅଭିନେତା ମଧ୍ୟ ଥିଲେ। ବାପାଙ୍କ ଠାରୁ କୁନି ବୟସରୁ ସଂଗୀତ ଶିକ୍ଷା ଆରମ୍ଭ କରି ଲତା ଯେ ଦିନେ ଭାରତର ରତ୍ନ ହେବେ ଏକଥା କିଏ ଜାଣିଥିଲା ?

ଧୀରେ ଧୀରେ ସଂଗୀତ ଦୁନିଆରେ ଗୋଟିଏ ପରେ ଗୋଟିଏ ସଫଳତା ପାଇଲେ ଲତା ମଙ୍ଗେସକର। ୧୯୬୨ ମସିହାର କଥା। ସେତେବେଳେ ଲତାଙ୍କ ବୟସ ମାତ୍ର ୩୩ ବର୍ଷ। ଏତେ କମ୍‌ ବୟସରେ ଲତା ସଫଳତାର ଶିଖର ଛୁଇଁଥିବା ଦେଖି କିଛି ଲୋକ ଗୌରବ ଅନୁଭବ କରୁଥିବା ବେଳେ କିଛି ଲୋଙ୍କର ଈର୍ଷା ବି ବଢ଼ିଯାଇଥିଲା । ଶେଷରେ ସ୍ଲୋ ପଏଜନ୍ ଦେଇ ତାଙ୍କୁ ଜୀବନରୁ ମାରିଦେବାକୁ ଷଡ଼ଯନ୍ତ୍ର କରାଯାଇଥିଲା ।

ଲେଖିକା ପଦ୍ମା ସଚଦେବଙ୍କ ଲିଖିତ ବହି ‘ଐସା କାହାଁ ସେ ଲାଉଁ’ ପ୍ରକାଶିତ ହେବା ପରେ ଏହି ଘଟଣା ସମ୍ପର୍କରେ ଜଣା ପଡ଼ିଥିଲା। ପଦ୍ମାଙ୍କ ବହିରେ ଲେଖାଥିବା ଘଟଣା ଅନୁସାରେ, ସେତେବେଳେ ଲତାଙ୍କୁ ମାତ୍ର ୩୩ ବର୍ଷ। ଦିନେ ଲତା ଶୋଇକି ଉଠିବା ପରେ ସକାଳୁ ସକାଳୁ ହଠାତ୍ ତାଙ୍କ ପେଟରେ ପ୍ରବଳ ଯନ୍ତ୍ରଣା ହୋଇଥିଲା। ସେ ଦୁଇ-ତିନି ଥର ଥର ବାନ୍ତି ମଧ୍ୟ କରିଥିଲେ। ବାନ୍ତିର ରଙ୍ଗ ସବୁଜ ଥିଲା। ସେ ଖୁବ୍‌ ଦୁର୍ବଳ ହୋଇଯାଇଥିଲେ ଓ ଯନ୍ତ୍ରଣା ଅନୁଭବ କରିଥିଲେ। ଚାଲିପାରିଲେ ନାହିଁ। ତିନି ଦିନ ଜୀବନ ମୃତ୍ୟୁ ସହିତ ଯୁଝିବା ପରେ ତାଙ୍କ ସ୍ୱାସ୍ଥ୍ୟାବସ୍ଥା ଧୀରେ ଧୀରେ ସୁଧୁରିଥିଲା।

ଏହି ଘଟଣାରେ ଲତା ୩ରୁ ୪ ମାସ ବେଡ୍ ରେଷ୍ଟ କରିବା ସହିତ ଗୀତ ଗାଇପାରି ନଥିଲେ। ଅନ୍ତଃନଳୀରେ ଯନ୍ତ୍ରଣା ହେବାରୁ ତାଙ୍କୁ ଡାକ୍ତରଙ୍କ ପରାମର୍ଶକ୍ରମେ ସତର୍କ ରହିବାକୁ ପଡ଼ିଥିଲା। ତାଙ୍କୁ ସ୍ଲୋ ପୋଏଜନ ଦିଆଯାଇଥିବାରୁ ଏପରି ହୋଇଥିଲା ବୋଲି ଡାକ୍ତରମାନେ କହିଥିଲେ। ତେବେଲ ତାଙ୍କୁ କିଏ ହତ୍ୟା କରିବା ପାଇଁ ଚେଷ୍ଟା କରିଥିଲା ତାହା ସେ ଜାଣିଥିଲେ, କିନ୍ତୁ ପ୍ରମାଣ ନଥିବାରୁ କାହାକୁ କିଛି କହିନଥିଲେ । ମୁଖ୍ୟ ଅଭିଯୁକ୍ତ ସବୁ ଦିନ ପାଇଁ ଦୃଷ୍ଟି ଆଢ଼ୁଆଳରେ ରହିଗଲା ।