ଦେଶରେ କମୁଛି କୋଭିଡ-୧୯ର R ଭାଲ୍ୟୁ; ଏବେ ବି ବିପଦରେ ପ୍ରମୁଖ ସହର

ନୂଆଦିଲ୍ଲୀ : ଦେଶରେ କୋଭିଡ-୧୯ର R ଭାଲ୍ୟୁ ୧ରୁ ତଳକୁ ଖସି ଆସିଛି। ଅଗଷ୍ଟ ଶେଷରେ ଏହା ୧.୧୭ ଥିଲା, ଯାହା ସେପ୍ଟେମ୍ବର ୧୫ ସୁଦ୍ଧା ୦.୯୨ ହୋଇଛି। ବିଶେଷଜ୍ଞଙ୍କ ଅନୁଯାୟୀ ଏହା ଦର୍ଶାଉଛି ଯେ ଦେଶରେ କରୋନାଭାଇରସ୍ ଗତିରେ ମନ୍ଥରତା ଆସିଛି। ତେବେ ମୁମ୍ବାଇ, କୋଲକାତା, ଚେନ୍ନାଇ, ବାଙ୍ଗାଲୋର ଭଳି ବଡ ସହରରେ ଏହା ପ୍ରାୟ ୧ ରହିଛି। ଦିଲ୍ଲୀ ଏବଂ ପୁଣେରେ R ଭାଲ୍ୟୁ ୧ ରୁ କମ୍ ଅଛି। ମହାରାଷ୍ଟ୍ର ଏବଂ କେରଳର R ଭାଲ୍ୟୁ ୧ରୁ କମ୍ ରହିଛି।

ଚେନ୍ନାଇର ଗଣିତ ବିଜ୍ଞାନ ପ୍ରତିଷ୍ଠାନର ସୀତାଭ୍ରା ସିହ୍ନା କହିଛନ୍ତି ଯେ ଖୁସି ଖବର ହେଉଛି ଭାରତର ରିପ୍ରଡକ୍ସନ ସଂଖ୍ୟା କ୍ରମାଗତ ଭାବରେ ୧ ରୁ କମ୍ ରହିଛି। ଉଭୟ କେରଳ ଏବଂ ମହାରାଷ୍ଟ୍ରରେ ମଧ୍ୟ ଆକ୍ଟିଭ୍ ମାମଲା ସର୍ବାଧିକ ରହିଛି। ସିହ୍ନା ସେହି ଦଳର ମୁଖ୍ୟ ଯିଏ R ଭାଲ୍ୟୁ ଗଣନା କରୁଛି। ତଥ୍ୟ ଅନୁଯାୟୀ, ମୁମ୍ବାଇର ଆର୍‌- ଭାଲ୍ୟୁ ୧.୦୯ ହୋଇଥିବା ବେଳେ ଚେନ୍ନାଇର ୧.୧୧, କୋଲକାତାର ୧.୦୪ ଏବଂ ବେଙ୍ଗାଲୁରୁର ୧.୦୬ ରହିଛି।

ମାର୍ଚ୍ଚ ୯ରୁ ଏପ୍ରିଲ ୨୧ ପର୍ଯ୍ୟନ୍ତ ଭାରତରେ କରୋନାର ଦ୍ୱିତୀୟ ଲହର ଆସିଥିଲା, ସେତେବେଳେ ଦେଶର ମୋଟ R ଭାଲ୍ୟୁ ୧.୩୭ ଥିଲା। ହାରାହାରି କେତେ ଲୋକ ସଂକ୍ରମିତ ହୋଇଛନ୍ତି ତାହା R ଭାଲ୍ୟୁ ଦର୍ଶାଏ। ଦେଶରେ ପ୍ରଳୟକାରୀ ଦ୍ୱିତୀୟ ଲହର ସମୟରେ କରୋନା ଭାଇରସ୍ ସଂକ୍ରମିତଙ୍କ ସଂଖ୍ୟା ଡାକ୍ତରଖାନା ଏବଂ ସ୍ୱାସ୍ଥ୍ୟ ଭିତ୍ତିଭୂମିକୁ ପଙ୍ଗୁ କରିଦେଇଥିଲା। ସେବେଠାରୁ, R ଭାଲ୍ୟୁରେ ହ୍ରାସ ଘଟିଛି।

ମାର୍ଚ୍ଚରୁ ମେ ମାସ ମଧ୍ୟରେ ଦେଶରେ ସଂକ୍ରମଣ ଯୋଗୁଁ ହଜାର ହଜାର ଲୋକ ମୃତ୍ୟୁବରଣ କରିଥିବାବେଳେ ଲକ୍ଷ ଲକ୍ଷ ଲୋକ ଏହି ଭାଇରସ୍ ଦ୍ୱାରା ଆକ୍ରାନ୍ତ ହୋଇଥିଲେ। ଯେତେବେଳେ କରୋନାର ଦ୍ୱିତୀୟ ଲହର ଶିଖରରେ ଥିଲା, ମାର୍ଚ୍ଚ ୯ରୁ ଏପ୍ରିଲ୍ ୨୧ ମଧ୍ୟରେ, ସମଗ୍ର ଦେଶର R- ଭାଲ୍ୟୁ ୧.୩୭କୁ ବୃଦ୍ଧି ପାଇଥିଲା। ଏହା ପରେ, ଏପ୍ରିଲ୍ ୨୪ରୁ ମେ ୧ ମଧ୍ୟରେ ଏହା ୧.୧୮କୁ ହ୍ରାସ ପାଇଥିବାବେଳେ ଏପ୍ରିଲ୍ ୨୯ ରୁ ମେ ୭ ମଧ୍ୟରେ ଏହା ୧.୧୦କୁ ହ୍ରାସ ପାଇଥିଲା।

ମେ ୯-୧୧ ରେ, R ଭାଲ୍ୟୁ ୦.୯୮ ରେକର୍ଡ କରାଯାଇଥିଲା, ଏହା ପରେ ମେ ୧୪-୩୦ ସୁଦ୍ଧା ୦.୮୨କୁ ଖସିଥିଲା। ମେ ୧୫ରୁ ଜୁନ୍ ୨୬ ପର୍ଯ୍ୟନ୍ତ, R ଭାଲ୍ୟୁ ୦.୭୮କୁ ଖସିଥିଲା। ଅବଶ୍ୟ, ଜୁନ୍ ୨୦ରୁ ଜୁଲାଇ ୭ ମଧ୍ୟରେ ଏହା ୦.୮୮କୁ ବୃଦ୍ଧି ପାଇଥିଲା।

ସେହିପରି ସେପ୍ଟେମ୍ବର ୪-୭ରୁ R ଭାଲ୍ୟୁ ୦.୯୪ ଥିବାବେଳେ ୧୧-୧୫ ସେପ୍ଟେମ୍ବର ମଧ୍ୟରେ ଏହା ୦.୮୬ ହୋଇଗଲା। ସେପ୍ଟେମ୍ବର ୧୪-୧୯ ମଧ୍ୟରେ ଏହା ୦.୯୨ରେ ପହଞ୍ଚିଛି।