ଅଳିଆ ଆବର୍ଜନାରେ ଭର୍ତ୍ତି ଚାନ୍ଦିପୁର ବିଚ୍, ଅସ୍ୱାସ୍ଥ୍ୟକର ପରିବେଶ ଯୋଗୁଁ ଆସୁନାହାନ୍ତି ପର୍ଯ୍ୟଟକ

ବାଲେଶ୍ୱର(ରଶ୍ମିରଞ୍ଜନ ଦାସ) : ପର୍ଯ୍ୟଟନ ଋତୁ ଆସୁଥିବା ବେଳେ ଚାନ୍ଦିପୁର ଗୋଲଡେନ୍ ସି ବିଚ୍ ଏବେ ଅଳିଆରେ ଭରିଯାଇଛି । ଏହି ବିଚ ଅନ୍ୟ ସି ବିଚ୍ ତୁଳନାରେ ସଂପୂର୍ଣ୍ଣ ନିଆରା, ଯାହାକୁ ଦେଖିବାକୁ ପର୍ଯ୍ୟଟକଙ୍କ ଭିଡ ଜମେ । ହେଲେ ଦୁର୍ଭାଗ୍ୟର କଥା ହେଲା ବ୍ଲୁ ଫ୍ଲାଗ ମାନ୍ୟତା ଅପେକ୍ଷାରେ ଥିବା ଏହି ବିଚ୍ କୁଢ କୁଢ ଅଳିଆ ଆବର୍ଜନାରେ ଭର୍ତ୍ତି । ଟେଣ୍ଡର ନେଇଥିବା ସଂସ୍ଥା କରୋନା ମହାମାରୀ ପରଠାରୁ ଆଉ ସଫାସୁତୁରା କରୁନାହିଁ, ଯାହାକୁ ନେଇ ତେଜୁଛି ଜନ ଅସନ୍ତୋଷ ।

ବାଲେଶ୍ୱର ଜିଲ୍ଲାର ନିଆରା ସି ବିଚ୍ ଚାନ୍ଦିପୁରର ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ଖୁବ୍ ନିଆରା । ସେଥିପାଇଁ ଏହି ବିଚକୁ ଗୋଲଡେନ୍ ସି ବିଚ୍ ମଧ୍ୟ କୁହାଯାଏ । କରୋନା ପରେ ବନ୍ଦ ହୋଇପଡିଥିବା ଏହି ବିଚ୍ ଦୁଇ ମାସରୁ ଅଧିକ ସମୟ ହେଲେ ପର୍ଯ୍ୟଟକଙ୍କ ପାଇଁ ଖୋଲି ସାରିଲାଣି । ହେଲେ ବିଚରେ ଏଣେ ତେଣେ କୁଢ କୁଢ ଅଳିଆ ଆବର୍ଜନାରେ ଭର୍ତ୍ତି ହୋଇଛି ବିଚ୍ । ଯେଉଁଥିପାଇଁ ପର୍ଯ୍ୟଟକ ବିଚ୍‌ ଆଡ଼ୁ ମୁହଁ ବୁଲାଉଛନ୍ତି । ପର୍ଯ୍ୟଟନ ମନ୍ତ୍ରୀଙ୍କ ଜିଲ୍ଲାରେ ପର୍ଯ୍ୟଟନ କ୍ଷେତ୍ରର ଏହା ବିକଳ ଚିତ୍ର ଦେଖିଲେ ଲାଗୁଛି ଓଟିଡିସି ଯେମିତି ସ୍ଥାଣୁ ହୋଇଯାଇଛି ।

ପ୍ରତିଦିନ ଦୁଇଥର ସମୁଦ୍ର ଏଠାରେ ୫ କିଲୋମିଟର କୂଳକୁ ଏବଂ ୫ କିଲୋମିଟର ପଛକୁ ଚାଲିଯାଏ , ଯାହାକୁ ଦେଖିବାକୁ ଛୁଟି ଆସିଥାନ୍ତି ଦେଶୀ ଏବଂ ବିଦେଶୀ ପର୍ଯ୍ୟଟକ । ହେଲେ ପର୍ଯ୍ୟଟକ ଋତୁ ଆରମ୍ଭ ହୋଇସାରିଥିଲେ ବି ପର୍ଯ୍ୟଟକଙ୍କ ଦେଖା ମିଳୁନି । ଯେଉଁଥିପାଇଁ ବ୍ୟବସାୟ ଓ ହୋଟେଲ ଶିଳ୍ପ ଏକପ୍ରକାର ଠପ୍ ହୋଇପଡିଛି ।

ଭୁବନେଶ୍ୱରର ଏକ ଘରୋଇ ସଂସ୍ଥା ଏମଏସ ୟୁଟେକ୍ ବର୍ଷକ ପାଇଁ ଟେଣ୍ଡର ସୁତ୍ରରେ ବିଚକୁ ସଫାସୁତୁରା କରିବାର ଦାୟିତ୍ୱ ନେଇଥିଲା । ଚାନ୍ଦିପୁର ବିଚ୍ ଉନ୍ନୟନ ସଂସ୍ଥା ଏଥିପାଇଁ ସଂସ୍ଥାକୁ ୨୧ ଲକ୍ଷ ଟଙ୍କା ଏହି ଦେଇସାରିଛି । କିନ୍ତୁ କରୋନାର ଦ୍ୱିତୀୟ ଲହରୀ ପରଠାରୁ ବିଚ୍ ଆଉ ସଫା ହେଉନି ବୋଲି କହିଛନ୍ତି ସ୍ଥାନୀୟ ଲୋକେ ।

ମେ ମାସରେ ବାତ୍ୟା ୟାସ୍ ଯୋଗୁଁ ନିମ୍ନ ମାନର କାମ ହୋଇଥିବା ଫାଇବର ଲାଇଟ୍ ଖୁଣ୍ଟ ଓ ପକ୍କା ପାହାଚକୁ ଭାଙ୍ଗିରୁଜି ନଷ୍ଟ ଭ୍ରଷ୍ଟ କରିଦେଇଥିଲା । ମାତ୍ର ଏପର୍ଯ୍ୟନ୍ତ ଏହାର ପୁନରୁଦ୍ଧାର କରାଯାଇନି । ଚାନ୍ଦିପୁର ବିଚ୍ ଡେଭଲପମେଣ୍ଟ କମିଟିର ମୁଖ୍ୟ ଜିଲ୍ଲାପାଳଙ୍କୁ ପର୍ଯ୍ୟଟନ ବିଭାଗ ଏହାର ରକ୍ଷଣା ବେକ୍ଷଣା ସହ ସଫାସୁତୁରାପାଇଁ ଲିଖିତ ଭାବେ ଜଣାଇଛି । ହେଲେ କିଛିବି କାମ ଆରମ୍ଭ ହୋଇନି । ଅତିରିକ୍ତ ଜିଲ୍ଲାପାଳ କହିଛନ୍ତି ଦିନେ ଦୁଇଦିନ ଭିତରେ ଏନେଇ ପଦକ୍ଷେପ ନିଆଯିବ ।