ନରସିଂହପୁର ଜଙ୍ଗଲରେ ଘୁରି ବୁଲୁଛି ଆଉ ଏକ ଘାଇଲା ହାତୀ । ଗୁଳିବିଦ୍ଧ ହୋଇ ହାତୀଟି ୪ ଦିନ ହେଲା ଇତସ୍ତତଃ ଅବସ୍ଥାରେ ବୁଲୁଥିବା କହିଛନ୍ତି ସ୍ଥାନୀୟ ଲୋକ । ଏପଟେ ଚିକିତ୍ସା ଲାଗି ହାତୀଟିକୁ ଠାବ କରିବାକୁ ଉଦ୍ୟମ କରୁଛନ୍ତି ବନ କର୍ମଚାରୀ । ପୂର୍ବରୁ ନରସିଂହପୁର ଜଙ୍ଗଲରେ ଆଉ ଏକ ହାତୀକୁ ଗୁଳିମାଡ଼ ହୋଇଥିଲା । ତେବେ ତାକୁ ବଞ୍ଚାଇବାରେ ସଫଳ ହୋଇନଥିଲା ବନ ବିଭାଗ । ଏପଟେ ପୁଣି ଏକ ହାତୀ ଶିକାରୀଙ୍କ ଗୁଳିର ଶିକାର ହେବା ପରେ ବନ କର୍ମଚାରୀଙ୍କ କାର୍ଯ୍ୟକଳାପକୁ ନେଇ ବଢିଛି ସନ୍ଦେହ । ସେପଟେ ଆଠଗଡ ବନଖଣ୍ଡରେ ମାଟିତଳୁ ହାତୀ କଙ୍କାଳ ଉଦ୍ଧାର ଘଟଣାର ତଦନ୍ତ ରିପୋର୍ଟ ଦେବାକୁ ଆଉ ମାସେ ସମୟ ମାଗିଛି । ଏସ୍ଆଇଟି ରାଜ୍ୟରେ ହାତୀ ମୃତ୍ୟୁକୁ ନେଇ ହାଇକୋର୍ଟ ଉଦବେଗ ପ୍ରକାଶ କରିଥିବା ବେଳେ ବିଧାନସଭାରେ ଉତ୍ତର ରଖିଛନ୍ତି ମନ୍ତ୍ରୀ ।
ତେଣେ ଆହତର ଚିକିତ୍ସା ଲାଗି ସାତକୋଶିଆ ବନଖଣ୍ଡର ଡାକ୍ତରୀ ଟିମ,ନରସିଂହପୁରର ପଶ୍ଚିମ ରେଞ୍ଜରେ ଥିବା ଜୟପୁର ଜଙ୍ଗଲରେ ପହଞ୍ଚିଛି । ତେବେ ଆହତ ହାତୀକୁ ଏଯାଏ ଠାବ କରାଯାଇପାରିନି । ଗତ ୨୨ ତାରିଖରେ ଆହତ ହାତୀକୁ ଜଙ୍ଗଲରେ ଦେଖାଯାଇଥିଲା । ମାତ୍ର ବନ କର୍ମଚାରୀ ତାକୁ ଟ୍ରାଙ୍କୁଲାଇଜ୍ କରିବାରେ ବିଫଳ ହୋଇଥିଲେ । ତେବେ ହାତୀକୁ ଗୁଳିମାଡ଼ ଅଭିଯୋଗକୁ ସଂପୂର୍ଣ୍ଣ ଖଣ୍ଡନ କରିଛନ୍ତି ପିସିସିଏଫ୍ ହାତୀ ପଲ ମଧ୍ୟରେ ଲଢ଼େଇ ଯୋଗୁ ଦନ୍ତାଟି ଆହତ ହୋଇଥିବା ସେ କହିଛନ୍ତି । ପୂର୍ବରୁ ନରସିଂହପୁର ଜଙ୍ଗଲରେ ଏକ ହାତୀକୁ ଛର୍ରା ମାଡ଼ ହୋଇଥିଲା ତେବେ ତାର ଉପଯୁକ୍ତ ଚିକିତ୍ସା କରାନଯିବାରୁ ମେ ୩୧ରେ ତାର ମୃତ୍ୟୁ ହୋଇଥିଲା ।
ତେଣେ ଆଠଗଡ ଜଙ୍ଗଲର ମାଟି ତଳୁ ମିଳିଚାଲିଛି । ଗୋଟିକ ପରେ ଗୋଟିଏ ହାତୀ କଙ୍କାଳ ଗତ କିଛି ମାସ ଭିତରେ ଆଠଗଡ଼ ବନଖଣ୍ଡରୁ ଉଦ୍ଧାର ହେଲାଣି ୪ ହାତୀଙ୍କ କଙ୍କାଳ । ସ୍ପେସାଲ ଇନଭେଷ୍ଟିଗେସନ୍ ଟିମ ବା ଏସଆଇଟି ଗଠନ କରାଯାଇ ଏସବୁ ଘଟଣାର ସରଜମିନ ତଦନ୍ତ କରାଉଛନ୍ତି । ସରକାର ମାସକ ଭିତରେ ରିପୋର୍ଟ ଦେବାକୁ କୁହାଯାଇଥିଲେ ମଧ୍ୟ ଏଥିରେ ବିଫଳ ହୋଇଛି । ଏସ୍ଆଇଟି ରିପୋର୍ଟ ପ୍ରଦାନ ଲାଗି ଏସଆଇଟି ସରକାରଙ୍କୁ ଆଉ ମାସେ ସମୟ ମାଗିଛି । କଙ୍କାଳ ନମୁନା ପରୀକ୍ଷା ଲାଗି ବାହାର ରାଜ୍ୟକୁ ପଠାଯାଇଛି, ରିପୋର୍ଟ ଅସିବା ପରେ ତଦନ୍ତ ଆଗକୁ ବଢିବ ବୋଲି କହିଛନ୍ତି ବନ୍ୟପ୍ରାଣୀ ପିସିସିଏଫ୍ ।
ଅନ୍ୟପଟେ ରାଜ୍ୟରେ ହାତୀ ମୃତ୍ୟୁ ବଢି ଚାଲିଥିବା ବେଳେ ଜନସ୍ୱାର୍ଥ ମାମଲାର ଶୁଣାଣୀ କରି ଉଦବେଗ ପ୍ରକାଶ କରିଛନ୍ତି ଓଡ଼ିଶା ହାଇକୋର୍ଟ ୫ ବର୍ଷ ମଧ୍ୟରେ କେଉଁ ଜଙ୍ଗଲରେ କେତେ ହାତୀ ଶିକାରୀ ଗୁଳିରେ ପ୍ରାଣ ହରାଇଛନ୍ତି ? ଏ ନେଇ କେତେ ମାଲାମା ରୁଜୁ ହୋଇଛି ? କେତେ ଶିକାରୀଙ୍କୁ ଗିରଫ କରାଯାଇଛି ? ହାତୀ ମୃତ୍ୟୁ ରୋକିବାକୁ ଏସଟିଏଫ କଣ କରୁଛି ? ଏ ସମସ୍ତ ବିବରଣୀ ସହ ସତ୍ୟପାଠ ଦାଖଲ ପାଇଁ ପିସିସିଏଫଙ୍କ କହିଛନ୍ତି କୋର୍ଟ ।
ହାତୀ ମୃତ୍ୟୁ ପ୍ରସଙ୍ଗକୁ ନେଇ ବିଧାନସଭାରେ ବି ଉତ୍ତର ରଖିଛନ୍ତି ଜଙ୍ଗଲ ମନ୍ତ୍ରୀ । ୨୦୧୭ ଗଣନା ଅନୁସାରେ ରାଜ୍ୟରେ ୧୯୭୬ ଟି ହାତୀ ଥିଲେ ୫ ବର୍ଷରେ ସେଥିରୁ ୨୩୩ ହାତୀଙ୍କ ଜୀବନ ଯାଇଛି । ୧୪ ହାତୀ ଶିକାରୀଙ୍କ ଗୁଳିରେ ପ୍ରାଣ ହରାଇଥିବା ବେଳେ ବିଦ୍ୟୁତ ଅଘାତରେ ୬୩, ଟ୍ରେନ ଚକାତଳେ ୨୦, ସଡକ ଦୁର୍ଘଟଣାରେ ୪ ଓ ପ୍ରାକୃତିକ ଦୁର୍ଘଟଣାରେ ୮୫ ହାତୀଙ୍କର ମୃତ୍ୟୁ ହୋଇଛି । ତେବେ ଏପଯର୍ୟନ୍ତ ୪୭ ହାତୀ ମୃତ୍ୟୁର କାରଣ ଖୋଜି ପାଉନି ବନ ବିଭାଗ ।