- ଭି.କେ. ପଲ୍ କହିଲେ ଟିକାର ଦୁଇ ଡୋଜ୍ ମଧ୍ୟରେ ବ୍ୟବଧାନ ବୃଦ୍ଧି ବିଜ୍ଞାନ ସମ୍ମତ
- ଗ୍ଲୋବାଲ ଟେଣ୍ଡର ଦ୍ୱାରା ଟିକା ଅଭାବ ଦୂର ନେଇ ଆଶାବାଦୀ ରାଜ୍ୟ ସରକାର
ନୂଆଦିଲ୍ଲୀ : ଦେଶରେ ଟିକା ଅଭାବ ଯୋଗୁଁ ବ୍ୟବଧାନ ବଢ଼ିନି ବରଂ କୋଭିସିଲ୍ଡର ଦୁଇ ଡୋଜ୍ ମଧ୍ୟରେ ବ୍ୟବଧାନ ବୃଦ୍ଧି ବିଜ୍ଞାନ ସମ୍ମତ । ଏକଥାକୁ ଗତକାଲି ସ୍ପଷ୍ଟ କରିଛନ୍ତି କେନ୍ଦ୍ର ସରକାର । ଏପରିକି ବ୍ୟବଧାନକୁ ନେଇ କୌଣସି ପ୍ରକାର ଅପପ୍ରଚାର ବୈଜ୍ଞାନିକଙ୍କ ପ୍ରତି ଅପମାନ ବୋଲି କହିଛନ୍ତି ନୀତି ଆୟୋଗ ସଦସ୍ୟ ଭି.କେ.ପଲ୍ । ସେପଟେ ଓଡ଼ିଶା ସରକାରଙ୍କ ଗ୍ଲୋବାଲ୍ ଟେଣ୍ଡର, ରାଜ୍ୟରେ ଟିକା ଅଭାବ ଦୂର କରିବା ନେଇ ଆଶାବ୍ୟକ୍ତ କରିଛନ୍ତି ଚିଫ୍ ସେକ୍ରେଟାରୀ ।
କୋଭିସିଲ୍ଡର ଦୁଇ ଡୋଜ୍ ମଧ୍ୟରେ ବ୍ୟବଧାନ ବୃଦ୍ଧି ବିଜ୍ଞାନ ସମ୍ମତ । ନିକଟରେ କେନ୍ଦ୍ର ସରକାର କୋଭିସିଲ୍ଡର ଦୁଇଟି ଡୋଜ୍ ମଧ୍ୟରେ ବ୍ୟବଧାନକୁ ୬ରୁ ୮ ସପ୍ତାହ ପରିବର୍ତ୍ତେ ୧୨ରୁ ୧୬ ସପ୍ତାହକୁ ବଢ଼ାଇଥିବାରୁ ହେଉଥିବା ସମାଲୋଚନା ପରିପ୍ରେକ୍ଷୀରେ ଏନେଇ ସ୍ପଷ୍ଟ କରିଛନ୍ତି ନିତି ଆୟୋଗ ସଦସ୍ୟ । କହିଛନ୍ତି ବୈଜ୍ଞାନିକଙ୍କ ସୁପାରିସକୁ ନେଇ ବ୍ୟବଧାନ ଅବଧି ବୃଦ୍ଧି କରାଯାଇଛି । ଏହାକୁ ନେଇ ଅପପ୍ରଚାର ଏଇଠି ଶେଷ ହେଉ । ସେ ଆହୁରି ବି କହିଛନ୍ତି ଦେଶରେ କୋଭାକ୍ସିନ୍ ଟିକା ଉତ୍ପାଦନ ବୃଦ୍ଧି ନେଇ କେନ୍ଦ୍ର ସରକାର ଭାରତ ବାୟୋଟେକ୍ ସହ ମିଶି କାମ କରୁଛନ୍ତି । ଆରମ୍ଭରେ ମାସକୁ କୋଟିଏ ଟିକା ଉତ୍ପାଦନ ହେଉଥିଲା, ଏବେ ତାହା ଦେଢ଼ କୋଟି ହେଉଛି । ଆଗକୁ ମାସକୁ ୧୦ରୁ ୧୩ କୋଟି ପର୍ଯ୍ୟନ୍ତ କୋଭାକ୍ସିନ୍ ଉତ୍ପାଦନକୁ ବୃଦ୍ଧି କରାଯିବାକୁ ଲକ୍ଷ୍ୟ ଥିବା ନେଇ ସୂଚନା ଦେଇଛନ୍ତି ଭି.କେ.ପଲ୍ ।
ଏପଟେ ରାଜ୍ୟରେ ୧୮ରୁ ୪୪ ବର୍ଷ ବୟସ୍କ ସମସ୍ତଙ୍କୁ କେମିତି ଦିଆ ଯିବ ସୁରକ୍ଷା କବଚ ? ୪୫ ବର୍ଷରୁ ଅଧିକ ବୟସ୍କଙ୍କ ପାଇଁ କେନ୍ଦ୍ର ଟିକା ଉପଲବ୍ଧ କରାଉଥିଲା ବେଳେ ୧୮ରୁ ୪୪ ବର୍ଷ ବୟସ୍କଙ୍କ ପାଇଁ ମାଗଣାରେ ଟିକାକରଣ ଘୋଷଣା କରିସାରିଛନ୍ତି ରାଜ୍ୟ ସରକାର । ହେଲେ ଟିକାର ଘୋର ଅଭାବରୁ ଏହି ପ୍ରକ୍ରିୟା କେବଳ ୫ଟି ମହାନଗରରେ ସୀମିତ ରହିଛି । ତେଣୁ ଅଭାବ ଦୂର ପାଇଁ ପ୍ରାୟ ୨ କୋଟି ନାଗରିକକୁ ଟିକା ଦେବାକୁ ୩ କୋଟି ୮୦ ଲକ୍ଷ ଡୋଜ୍ କିଣିବାକୁ ଗ୍ଲୋବାଲ୍ ଟେଣ୍ଡରକୁ ଯାଇଛନ୍ତି । ରାଜ୍ୟ ସରକାର ଯେଉଁଥିରେ କି କେବଳ ଡିସିଜିଆଇ ଅନୁମୋଦିତ ଟିକା ଉତ୍ପାଦନକାରୀ କମ୍ପାନି ହିଁ ଭାଗ ନେଇପାରିବେ ୨୦ ତାରିଖ ଦିନ ୧୧ଟାରୁ ଟେଣ୍ଡର ଲାଗି ଆବେଦନ ପ୍ରକ୍ରିୟା ଆରମ୍ଭ ହୋଇ ୨୮ତାରିଖ ଯାଏଁ ଚାଲିବ । ମୁଖ୍ୟ ଶାସନ ସଚିବ କହିଛନ୍ତି ସଫଳ ବିଡିଂ ହେଲେ ମେ ୨୮ ପରେ ହିଁ ଆମେ ଟିକା କିଣିପାରିବା ।
ହେଲେ ବଡ଼ କଥା ହେଉଛି ଏବେ ମାତ୍ର ତିନିଟି ଟିକା କମ୍ପାନିଙ୍କୁ ଡିସିଜିଆଇର ଅନୁମତି ମିଳିଛି ଏବଂ ଓଡ଼ିଶା ଭଳି ବହୁ ରାଜ୍ୟ ମଧ୍ୟ ଗ୍ଲୋବାଲ୍ ଟେଣ୍ଡରକୁ ଯାଇଛନ୍ତି । ତେଣୁ ଏଭଳି ସ୍ଥିତିରେ କେଉଁ କମ୍ପାନି ଟେଣ୍ଡରରେ ଭାଗ ନେବେ ଏବଂ ଟିକା ଅଭାବ ପୂରଣ ହେବ ତାକୁ ନେଇ ବି ଚର୍ଚ୍ଚା ହେଉଛି? ତେବେ ଟେଣ୍ଡରରେ ଆ ବେଦନ ଲାଗି ୨୮ ତାରିଖ ଯାଏଁ ସମୟ ଥିବାରୁ ଏହା ଭିତରେ ଆଉ କିଛି କମ୍ପାନିକୁ ଡିସିଜିଆଇର ଅନୁମତି ମିଳିବା ଆଶା କରାଯାଉଛି । ଏଭଳି ହେଲେ ଅଧିକର ଅଧିକ କମ୍ପାନି ବିଡିଂକୁ ଆ ସିବେ, ଏବଂ ଟିକା ଅଭାବର ସମାଧାନ ହୋଇପାରିବ ବୋଲି ଆଶାବାଦୀ ଅଛନ୍ତି ।
ଏପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତକାଲି ଏକ ଉଚ୍ଚସ୍ତରୀୟ ବୈଠକରେ କରୋନା ସ୍ଥିତିର ସମୀକ୍ଷା କରିଛନ୍ତି । ଏହି ଅବସରରେ ଦେଶରେ ଟିକାକରଣକୁ ତ୍ୱରାନ୍ବିତ କରିବାକୁ ରାଜ୍ୟମାନଙ୍କ ସହ ମିଶି କାମ କରିବାକୁ କେନ୍ଦ୍ରୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ।