• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Prangyan Parimita

News Highlights

  • ନିଆଳି, କଣ୍ଟାପଡା ଏବଂ ବାଲିପାଟଣା ଅଞ୍ଚଳର ପାନ ଚାଷୀ

  • ପରିବାର ପୋଷଣ ଚିନ୍ତାରେ ପାନ ଚାଷୀ

  • ଏପଟେ ପାନ ଦର ମାନ୍ଦା, ସେପଟେ ଚାଷ ପାଇଁ ବଢିଛି ଆନୁସଙ୍ଗିକ ଖର୍ଚ୍ଚ

ଭୁବନେଶ୍ୱର : ଚିନ୍ତାରେ କଟକ ନିଆଳି, କଣ୍ଟାପଡା ଏବଂ ଖୋର୍ଦ୍ଧା ବାଲିପାଟଣା ଅଞ୍ଚଳର ପାନ ଚାଷୀ । ପାନ ଦର ମାନ୍ଦା ଥିବାରୁ ଏବେ ଚାଷୀ କିଭଳି ସେମାନଙ୍କ ପରିବାର ପ୍ରତିପୋଷଣ କରିବେ ସେହି ଚିନ୍ତା ଘାରିଛି । ପାନ ଚାଷ ପାଇଁ ଆନୁସଙ୍ଗିକ ଉପକରଣର ଦର ହୁ ହୁ ହୋଇ ବଢିଚାଲିଛି । ହେଲେ ପାନ ଦର ବଢୁନି । ତେଣୁ କିଛି ଚାଷୀଙ୍କ ବେଉସା ବୁଡିବାକୁ ବସିଲାଣି । ଏପଟେ କିଛି ଦିନ ତଳେ ଲଗାଣ ବର୍ଷା ଚାଷୀଙ୍କ ଦୁଃଖକୁ ଆହୁରି ବଢାଇ ଦେଇଛି ।

କଟକ ଜିଲ୍ଲା ନିଆଳି, କଣ୍ଟାପଡା ଏବଂ ଖୋର୍ଦ୍ଧା ବାଲିପାଟଣା ଅଞ୍ଚଳର ପାନ ଚାଷୀ ପୁରୁଷ ପୁରୁଷ ଧରି ପାନ ଚାଷ କରି ଚଳିଆସୁଥିଲେ । ଦିନକୁ ଦିନ ପାନ ଚାଷ ପାଇଁ ଆନୁସଙ୍ଗିକ ଉପକରଣ ସହ ମଜୁରୀର ଅହେତୁକ ବୃଦ୍ଧି ପାଇଛି । ଏପଟେ କରୋନା ପାଇଁ ଦୁଇ ବର୍ଷ ହେଲା ପାନର ଚାହିଦା ନାହିଁ । ଫଳରେ ଦର ମାନ୍ଦା ରହିଛି । ତେଣୁ ପାନ ଚାଷ ଉପରେ ନିର୍ଭର କରି ଚଳୁଥିବା ଚାଷୀ ପରିବାର ଏବେ ଚିନ୍ତାରେ । କ’ଣ କରିବେ, ପରିବାର କିପରି ଚଳିବ ଭାଳେଣି ପଡ଼ିଛି ।

ଅନ୍ତର୍ଯ୍ୟାମୀ ନାମକ ଜଣେ ପାନଚାଷୀ କହିଛନ୍ତି, ଦୁଇ ବର୍ଷ ହେଲା ଲକଡାଉନ୍ ହେତୁ ଚଳିବାକୁ ଭାରି କଷ୍ଟ ହେଉଛି । ପୂର୍ବ ପରି ପାନ ବିକ୍ରି ହେଉନି । ସରକାର ଏଥିପ୍ରତି କିଛି ଦୃଷ୍ଟି ଦେଉନାହାନ୍ତି । କଷ୍ଟେମଷ୍ଟେ ପିଲାଙ୍କୁ ଧରି ଚଳିବାକୁ ପଡ଼ୁଛି । ଆଗକୁ ବରଜ କାମ ହେବ । ବାଉଁଶ, ପାଖୁଡ଼ି କିଣିବା ପାଇଁ ପାଖରେ ଟଙ୍କା ଟିଏ ବି ନାହିଁ ।

ବିଶେଷ କରି ନିଆଳି ପାନର ଚାହିଦା ଦେଶ ବିଦେଶରେ ମଧ୍ୟ ରହିଛି । ନିଆଳି, କାଳିଆଘାଇ, ବନମାଳୀପୁର ଆଦି ସାପ୍ତାହିକ ହାଟରୁ ପାନ ଖରିଦ କରି ରାଜ୍ୟ ବାହାର ସହ ବିଦେଶକୁ ରପ୍ତାନୀ କରିଥାନ୍ତି । ହେଲେ କରୋନା ଲକ୍ଡାଉନ ପରଠାରୁ ପାନ ବିକ୍ରି ପ୍ରଭାବିତ ହୋଇଛି । କିଛି ସରକାରୀ ସହାୟତା ମିଳିଲେ ଉପକୃତ ହୁଅନ୍ତେ ବୋଲି କହିଛନ୍ତି ଚାଷୀ ।

Other Stories