ବର୍ଷା ଅଭାବ, ଚାଷରେ କ୍ଷତି ! ବିଷ ପିଇ ଆତ୍ମହତ୍ୟା କଲେ ଚାଷୀ

ବଲାଙ୍ଗିର: ପୁଣି ଜଣେ ଚାଷୀଙ୍କ ଆତ୍ମହତ୍ୟା । ଚାଷରେ କ୍ଷତି ପାଇଁ ଜୀବନ ହାରିଲେ ଚାଷୀ । ବଲାଙ୍ଗିର ତୁରେଇକେଲା ବ୍ଲକ କାଦୋବେରା ଗାଁରୁ ଆସିଛି ଏଭଳି ଖବର । ଏହି ଗାଁର ଚାଷୀ ରେଚକା ବନ୍‌ଛୋର ଗତକାଲି ବିଷ ପିଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ପରିବାର ଲୋକ ଏନେଇ ଜାଣିବା ପରେ ତାଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରିଥିଲେ ।

ହେଲେ ଡାକ୍ତରଙ୍କ ଚେଷ୍ଟା ସତ୍ତ୍ୱେ ଆଜି ସେଠାରେ ତାଙ୍କର ଚିକିତ୍ସିତ ଅବସ୍ଥାରେ ମୃତ୍ୟୁ ହୋଇଛି । ତେବେ ମୃତ୍ୟୁ ପଛର କାରଣ ଚାଷରେ କ୍ଷତି ବୋଲି ତାଙ୍କ ପୁଅ ପବିତ୍ର ବନଛୋର କହିଛନ୍ତି । ରାଜ୍ୟରେ ସ୍ୱାଭାବିକ୍‌ଠାରୁ କମ୍‌ ବର୍ଷା ହୋଇଛି । ଫଳରେ ଚାଷ ଜମି ଫାଟି ଆଁ କଲାଣି । ତେଣୁ ରେଚକାଙ୍କ ଚାଷରେ ବଡ଼ କ୍ଷତି ହୋଇଛି । ଯାହାଫଳରେ ସେ ବିଷ ପିଇ ଆତ୍ମହତ୍ୟା କରିବାକୁ ବାଧ୍ୟ ହୋଇଛନ୍ତି ବୋଲି ତାଙ୍କ ପୁଅ ଅଭିଯୋଗ କରିଛନ୍ତି ।

ସେପଟେ ରାଜ୍ୟରେ ବର୍ଷା ଅଭାବ ଯୋଗୁଁ ମରୁଡ଼ି ପରିସ୍ଥିତି ସୃଷ୍ଟି ହୋଇଛି । କଳାହାଣ୍ଡି ଜିଲ୍ଲାରେ ଏବେଠୁ ମରୁଡି ସ୍ଥିତି ଦେଖାଦେଲାଣି । ଗୋଲାମୁଣ୍ଡା, ଧର୍ମଗଡ, ଜୁନାଗଡ, କୋକସରା ସମେତ ବିଭିନ୍ନ  ବ୍ଲକରେ ଅଣଜଳସେଚିତ ଅଂଚଳରେ ଉତ୍‌କଟ ହେବାରେ ଲାଗିଛି ମରୁଡି ସମସ୍ୟା । ଜିଲ୍ଲାକୁ ତୁରନ୍ତ ମରୁଡି ଘୋଷଣା ଦାବିରେ କଂଗ୍ରେସ ନେତୃତ୍ୱରେ ଚାଲିିଛି କିଷାନ ପଦଯାତ୍ରା । ଏଥିରେ ଶହଶହ ସଂଖ୍ୟାରେ କଂଗ୍ରେସ କର୍ମୀ ଏବଂ ଚାଷୀ ସାମିଲ ହୋଇଛନ୍ତି । 

Also Read

କାଳ ହେଉଛି ବଜ୍ରପାତ: ୪ ବର୍ଷରେ ୧୬୨୧ ନେଲାଣି ପ୍ରାଣ

ମୋବାଇଲ ଦେଖିବାକୁ ମନା କଲେ ବାପା, ବେକ କାଟି ଦେଲା ପୁଅ

ସ୍ପେସ୍‌ରେ କିପରି ଧୁଆଯାଏ ଚୁଟି, ଦେଖନ୍ତୁ ଏହି ଭିଡିଓରେ

ସେହିଭଳି ବର୍ଷା ଅଭାବ ଯୋଗୁଁ ଯାଜପୁର ଜିଲ୍ଲାର ଅଧିକାଂଶ ବ୍ଲକରେ ମଧ୍ୟ ଦେଖାଦେଲାଣି ମରୁଡ଼ି ସ୍ଥିତି । ତୁରନ୍ତ ଏହି ଅଂଚଳକୁ ମରୁଡି ଅଂଚଳ ଘୋଷଣା କରିବାକୁ ଜିଲ୍ଲା କଂଗ୍ରେସ ଦାବି କରିଛି । ବର୍ଷା ଅଭାବରୁ ଚାଷ ନହୋଇଥିବା ଅଂଚଳକୁ ମଧ୍ୟ ମରୁଡି ଘୋଷଣା କରିବାକୁ ଚାଷୀ ଦାବିପତ୍ର ଦେଇଛନ୍ତି । ଯାଜପୁର ଦଶରଥପୁର କୋରେଇ ଓ ସୁକିନ୍ଦା ଭଳି ବ୍ଲକରେ ବର୍ଷା ଅଭାବରୁ ଚାଷ ଜମି ପାଟି ଆଁ କଲାଣି । କୌଣସି ସ୍ଥାନରେ ଉଠା ଜଳସେଚନ କାର୍ଯ୍ୟ କରୁନଥିବା ବେଳେ ବର୍ଷାକୁ ଚାହିଁ ଚାଷ କରିବା ଅସମ୍ଭବ ହୋଇଛି । ୭ ଦିନରେ ଅକ୍ଷମ ଉଠାଜଳସେଚନକୁ ସକ୍ଷମ କରିବା ଲାଗି ଚାଷୀ ଦାବି କରିଛନ୍ତି । ସେପଟେ ଚାଷ ଜମିକୁ ପାଣି ଯୋଗାଇବା ଲାଗି ଶୀଘ୍ର ପଦକ୍ଷେପ ନିଆଯିବ ବୋଲି ଅତିରିକ୍ତ ଜିଲ୍ଲାପାଳ କହିଛନ୍ତି ।

ଅନ୍ୟପଟେ ଅଗଷ୍ଟ ୩୧ ତାରିଖରେ ରାଜ୍ୟରେ ସମ୍ଭାବ୍ୟ ମରୁଡ଼ି ସ୍ଥିତିର ସମୀକ୍ଷା ମଧ୍ୟ କରିଥିଲେ ମୁଖ୍ୟମନ୍ତ୍ରୀ । ଭିଡିଓ କନଫରେନସିଂରେ ବିଭିନ୍ନ ବିଭାଗ ସହ ସମୀକ୍ଷା ବେଳେ ମୁଖ୍ୟମନ୍ତ୍ରୀ ଜରୁରୀକାଳୀନ ଫସଲ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ । ଦୈନିକ ଭିତ୍ତିରେ ପରିସ୍ଥିତି ଉପରେ ନଜର ରଖିବାକୁ ନିର୍ଦ୍ଦେଶ ଦେବା ସହ ୭ଦିନ ଭିତର ସବୁ ଉଠା ଜଳସେଚନ ପଏଣ୍ଟ କାର୍ଯ୍ୟକ୍ଷମ କରିବାକୁ କହିଥିଲେ । 

ଏହାସହ ମହାତ୍ମାଗାନ୍ଧୀ ନିଶ୍ଚିତ କର୍ମନିଯୁକ୍ତି ଯୋଜନାକୁ ଗୁରୁତ୍ୱ ଦେବା ସହ ଫସଲ ନଷ୍ଟ ହେଉଥିବା ସ୍ଥାନରେ ଦ୍ୱିତୀୟ ଫସଲ ପାଇଁ ବିହନ ଓ ମିନିକିଟ୍ ଯୋଗାଇବାକୁ କହିଥିଲେ । ଖାଲି ସେତିକି ନୁହେଁ କ୍ଷେତ୍ରସ୍ତରରେ ତୁରନ୍ତ ପଦକ୍ଷେପ ନେବାକୁ ଜିଲ୍ଲାପାଳମାନଙ୍କୁ ମଧ୍ୟ ପରାମର୍ଶ ଦେଇଥିଲେ । ଅଗଷ୍ଟ ମାସ ସୁଦ୍ଧା ରାଜ୍ୟରେ ବୃଷ୍ଟିପାତ ୩୦ ପ୍ରତିଶତ କମ୍ ରହିଛି । ଫଳରେ ୨୧୩ ବ୍ଲକ୍‌ରେ ଚାଷ କାମ ପ୍ରଭାବିତ ହୋଇଥିବା ଜଣାପଡ଼ିଛି ।