ଅଫିସ୍‌ରେ ଘଣ୍ଟା ଘଣ୍ଟା ଧରି ଡେସ୍କରେ ବସି କାମ କରିବା ଦ୍ୱାରା ମେରୁଦଣ୍ଡଜନିତ ଅନେକ ସମସ୍ୟାର ସମ୍ମୁଖୀନ ହେବାକୁ ପଡେ।

ଅଧିକାଂଶ ଅଫିସ୍ କାମ ପ୍ରାୟ ୯ ରୁ ୧୦ ଘଣ୍ଟା ପର୍ଯ୍ୟନ୍ତ ରହିଥାଏ, ଯେଉଁ କାରଣରୁ କର୍ମଚାରୀଙ୍କ ମନ ଏବଂ ଶରୀର ଅନେକ ମାତ୍ରାରେ ପ୍ରଭାବିତ ହୋଇପାରେ।

ଦିନସାରା ବସି କାମ କରିବା କାରଣରୁ ମୁଣ୍ଡବିନ୍ଧା, ଥକାପଣ ଏବଂ ଚାପ ଭଳି ଅନେକ ସମସ୍ୟା ଆସିବା ସ୍ୱାଭାବିକ।

ଅନେକ ଲୋକ ଅଣ୍ଟା ଏବଂ ପିଠି ଯନ୍ତ୍ରଣାକୁ ନେଇ ଅସୁବିଧାର ସମ୍ମୁଖିନ ହୁଅନ୍ତି। ଏହା ବ୍ୟତୀତ ଚର୍ବି ମଧ୍ୟ ବୃଦ୍ଧି ପାଇବାରେ ଲାଗେ।

ଶାରୀରିକ କାର୍ଯ୍ୟକଳାପ ବିନା ଚେୟାରରେ ବସି ବସି କାମ କରିବା ଦ୍ୱାରା ମୋଟାପା ବଢେ ଏବଂ ପେଟ ମଧ୍ୟ ବାହାରି ପଡେ।

ଅବଶ୍ୟ, ଅଫିସ୍ କାମରେ କ୍ରମାଗତ ବସିବା କାରଣରୁ ହେଉଥିବା ସମସ୍ୟାରୁ ମୁକ୍ତି ପାଇବା ପାଇଁ ଅନେକ ଯୋଗ ଅଭ୍ୟାସ ରହିଛି।

ଯୋଗ ଶାରୀରିକ ଏବଂ ମାନସିକ ସ୍ତରରେ ଫିଟ୍ ରଖେ। ଯଦି ଜଣେ ବ୍ୟସ୍ତବହୁଳ ଜୀବନଶୈଳୀରେ ଯୋଗ ଅଭ୍ୟାସ କରିବାକୁ ସମୟ ନ ପାଏ, ତେବେ ଏମିତି କିଛି ଯୋଗ ମଧ୍ୟ ଅଛି ଯାହାକୁ ଅଫିସରେ ଅଭ୍ୟାସ କରାଯାଇପାରେ।

ଅଫିସ୍‌ରେ ବସି ବସି ଆପଣ ଦିନର ଥକ୍କାପଣ ଏବଂ ଶରୀରର ଯନ୍ତ୍ରଣାରୁ ସହଜରେ ଆରାମ ପାଇପାରିବେ। ରକ୍ତ ସଞ୍ଚାଳନକୁ ଉନ୍ନତ କରିବା ଏବଂ ମାଂସପେଶୀ ଯନ୍ତ୍ରଣାରୁ ମୁକ୍ତି ଦେବା ପାଇଁ ଷ୍ଟ୍ରେଚିଂ ଏକ ଭଲ ପ୍ରକ୍ରିୟା।

ଚାପ, ମୁଣ୍ଡବିନ୍ଧା, ପିଠି ଯନ୍ତ୍ରଣା ଏବଂ ଶରୀର ଯନ୍ତ୍ରଣାରୁ ମୁକ୍ତି ପାଇବା ପାଇଁ ଆପଣ ଅଫିସ୍‌ରେ ଚେୟାର ପୋଜ୍ ଅଭ୍ୟାସ କରିପାରିବେ। ଏହି ଅଭ୍ୟାସ ଅଣ୍ଟା, ମେରୁଦଣ୍ଡ ଏବଂ ଗୋଡକୁ ମଜବୁତ କରେ।

ଉର୍ଦ୍ଧ୍ୱ ହସ୍ତାସନ କରିବା ଦ୍ୱାରା ଚାପ କମିଥାଏ। ଶାରୀରିକ ସନ୍ତୁଳନକୁ ଉନ୍ନତ କରିଥାଏ ଏବଂ ମେରୁଦଣ୍ଡକୁ ସିଧା ରଖିବାରେ ସାହାଯ୍ୟ କରିଥାଏ, ଯାହା ବେକ, ଅଣ୍ଟା ଏବଂ ପିଠି ଯନ୍ତ୍ରଣାକୁ ହ୍ରାସ କରିଥାଏ।