ପରିବାରଟିଏ ଅଛି ମାନେ କଳି-ଝଗଡା ଅଛି। କିଛି ଘଟଣାକୁ ନେଇ ଝଗଡା ହେବା ଏକ ସାଧାରଣ କଥା। ସ୍ୱାମୀ-ସ୍ତ୍ରୀଙ୍କ ମଧ୍ୟରେ କଳି ବ୍ୟତୀତ, ଶାଶୁ-ବୋହୂ କଳି ପ୍ରାୟ ସବୁ ଘରେ ଦେଖିବାକୁ ମିଳେ।

ପ୍ରତ୍ୟେକ ଶାଶୁ ନିଜ ବୋହୂକୁ ପୁଅ ସହିତ ତାଙ୍କ ଅଧିକାର ଏବଂ ଦାୟିତ୍ୱକୁ ହସ୍ତାନ୍ତର କରନ୍ତି ଏବଂ ଆଶା କରନ୍ତି ଯେ ତାଙ୍କ ବୋହୂ ପରିବାରର ସମ୍ଭାଳୁ। ଏନେଇ ସେ ବୋହୂକୁ ବୁଝାନ୍ତି।

ଅନେକ ସମୟରେ କିନ୍ତୁ ବୋହୂ ଏହାକୁ ଶାଶୁଙ୍କ ଦବଦବା ବୋଲି ଭାବି ତାଙ୍କ କଥାକୁ ଅଣଦେଖା କରନ୍ତି। ଶାଶୁ ଅନୁଭବ କରନ୍ତି ଯେ ବୋହୂ ତାଙ୍କ କଥା ମାନୁ ନାହିଁ କିମ୍ବା ତାଙ୍କୁ ସମ୍ମାନ ଦେଉ ନାହିଁ।

ଏଭଳି ପରିସ୍ଥିତିରେ ଶାଶୁ ଏବଂ ବୋହୂ ମଧ୍ୟରେ ଖେଟ୍‌ଖାଟ୍ ହେବା ସ୍ୱାଭାବିକ କଥା। ବେଳେବେଳେ ଏହି ମତଭେଦ ଏମିତି ବଢିଯାଏ ଯେ ବୋହୂ ଶାଶୁ ଘରେ ରହିବାକୁ ପସନ୍ଦ କରେ ନାହିଁ।

ଯଦି ଆପଣଙ୍କ ବୋହୂ ଶାଶୁ ଘରେ ରହିବାକୁ ଚାହୁଁ ନାହାଁନ୍ତି କିମ୍ବା ଶାଶୁ-ଶଶୁରଙ୍କ କଥା ମାନୁ ନାହାନ୍ତି, ତେବେ ଏହି ଉପାୟ ମାନନ୍ତୁ ଯାହା ଦ୍ୱାରା ସମ୍ପର୍କକୁ ଭାଙ୍ଗିବା ଠାରୁ ରକ୍ଷା କରାଯାଇ ପାରିବ।

ଶାଶୁ ନିଜ ବୋହୂ ସହିତ ଖୋଲାଖୋଲି ଭାବେ କଥା ହେବା ଉଚିତ। ଏକାଠି ବସି ଆଲୋଚନା କଲେ ଭୁଲ ବୁଝାମଣାର ସମାଧାନ ହୋଇପାରେ।

ବୋହୂର ରାଗ ଏବଂ ଜିଦଖୋର ମନୋଭାବର କାରଣ କ’ଣ ବୁଝିବାକୁ ଚେଷ୍ଟା କରନ୍ତୁ। ଏହା ହୋଇପାରେ ଯେ ବୋହୂକୁ ଶିଖାଇ ଓ ବୁଝାଇବା ନେଇ ଆପଣ ଯେଉଁ ଉପାୟ ଗ୍ରହଣ କରୁଛନ୍ତି ତାହା ତାଙ୍କର ପସନ୍ଦ ନୁହେଁ।

ଆପଣଙ୍କ ବୋହୂର ଭିନ୍ନ ଚିନ୍ତାଧାରା ଏବଂ ଦୃଷ୍ଟିକୋଣ ଥାଇପାରେ। ବିଶେଷକରି ଯଦି ଆପଣଙ୍କ ବୋହୂ ପାଠସାଠ ପଢି ଚାକିରି କରିଥାଏ ତେବେ ବିଚାରରେ ମତଭେଦ ହେବା ସ୍ୱାଭାବିକ।

ଜଣେ ଶାଶୁ ଭାବରେ ଆପଣ ଆଶା କରୁଥିବେ ଯେ ବୋହୂ ଆପଣଙ୍କୁ ନିଜ ମା’ ପରି ବ୍ୟବହାର କରୁ। ଏଥିପାଇଁ ଏହା ଜରୁରୀ ଯେ ଆପଣ ବୋହୂକୁ ନିଜ ଝିଅ ପରି ବ୍ୟବହାର କରନ୍ତୁ।

ଅଧିକାଂଶ କ୍ଷେତ୍ରରେ, ବୋହୂ ସ୍ୱାଧୀନତା ଚାହୁଁଥିବାରୁ ସେ ନିଜ ସ୍ୱାମୀ, ପିଲା କିମ୍ବା ଘର ପାଇଁ ନିଜେ ନିଷ୍ପତ୍ତି ନେବାକୁ ଚାହାଁନ୍ତି। ତେଣୁ ପରିବାର ସହ ଜଡିତ ମାମଲା ଉପରେ ବୋହୂକୁ ନିଷ୍ପତ୍ତି ନେବାକୁ ଦିଅନ୍ତୁ।